ევროპარლამენტის 100-ზე მეტმა წევრმა ევროკავშირის ლიდერებს მოუწოდა, ხელახლა დაიწყონ მოლაპარაკებები რუსეთის გაყინული აქტივების უკრაინის მხარდასაჭერად გამოყენების შესახებ

ევროპარლამენტის 100-ზე მეტმა წევრმა ევროკავშირის ლიდერებს მოუწოდა, ხელახლა დაიწყონ მოლაპარაკებები რუსეთის გაყინული აქტივების უკრაინის მხარდასაჭერად გამოყენების შესახებ.

ეს მოწოდება მას შემდეგ გაჟღერდა, რაც კიევმა თავდაცვის დაფინანსებაში 23 მილიარდი ევროს დეფიციტზე განაცხადა, ევროკავშირის ქვეყნები კი კვლავ ერიდებიან ეროვნული ბიუჯეტებიდან დამატებითი სახსრების გამოყოფას.

ოთხშაბათს გაგზავნილ წერილში, რომელიც Euronews-მა იხილა, აღნიშნულია, რომ მოსკოვმა უნდა დაფაროს თავისი ომით მიყენებული ზარალი.

წერილი მხარს უჭერს ევროკავშირის ოთხი ქვეყნის მიერ აგვისტოს ბოლოს წამოყენებულ ხელახალ ინიციატივას გაყინული აქტივების განბლოკვის შესახებ.

ევროკავშირში რუსეთის 200 მილიარდ ევროზე მეტი აქტივია განთავსებული, რომლის უდიდესი ნაწილიც ბელგიაშია.

გასულ დეკემბერს ევროკომისიამ წამოაყენა გეგმა, რომლის მიხედვითაც ეს აქტივები უპროცენტო სესხად უნდა გარდაიქმნას, რათა დაფინანსდეს უკრაინის თავდაცვა მოსკოვის სრულმასშტაბური აგრესიისგან.