ევროკავშირი სირიის წინააღმდეგ ეკონომიკურ სანქციებს აუქმებს

ევროკავშირის საბჭომ მიიღო სამართლებრივი აქტები, რომლებიც სირიის წინააღმდეგ ყველა ეკონომიკურ შემზღუდავ ზომას ხსნის. საბჭოს განცხადების თანახმად, სანქციები იხსნება უსაფრთხოების საფუძვლებზე დაფუძნებული შემთხვევების გარდა.

განცხადების თანახმად, ევროკავშირის გადაწყვეტილება აფორმებს 2025 წლის 20 მაისს გამოცხადებულ პოლიტიკურ გადაწყვეტილებას და მიზნად ისახავს სირიელი ხალხის მხარდაჭერას ახალი, ინკლუზიური, პლურალისტური და მშვიდობიანი ქვეყნის გაერთიანებასა და აღდგენაში.

საბჭომ ასევე ამოიღო 24 სუბიექტი ევროკავშირის იმ პირთა სიიდან, რომლებიც ექვემდებარებიან სახსრებისა და ეკონომიკური რესურსების გაყინვას. ამ ორგანიზაციებიდან რამდენიმე ბანკია, მათ შორის სირიის ცენტრალური ბანკი, ან კომპანიები, რომლებიც სირიის ეკონომიკური აღდგენის ძირითად სექტორებში მოქმედებენ, როგორიცაა ნავთობის წარმოება და გადამუშავება, ბამბა და ტელეკომუნიკაციები – ზოგი კი მედია და ტელევიზიაა.

მშვიდობიანი გარდამავალი პერიოდის მხარდაჭერის შესაბამისად, საბჭომ ასადის რეჟიმთან დაკავშირებული ფიზიკური და იურიდიული პირების სია 2026 წლის 1 ივნისამდე გაახანგრძლივა.

„საბჭო გააგრძელებს ადგილზე მიმდინარე მოვლენების მონიტორინგს და მზადაა, დააწესოს შემდგომი შემზღუდავი ზომები ადამიანის უფლებების დამრღვევებისა და სირიაში არასტაბილურობის ხელშემწყობი პირების წინააღმდეგ“, – აღნიშნულია განცხადებაში.