პოლიტიკა • 1714626859

მზად ვარ ავიღო პასუხისმგებლობა, უბრალოდ ამისთვის დამსახურება გჭირდება, რომ შენ ახალგაზრდების ქმედებაზე აიღო პასუხისმგებლობა - იაგო ხვიჩია

მზად ვარ მე ავიღო პასუხისმგებლობა, უბრალოდ ამისთვის დამსახურება გჭირდება, რომ შენ ახალგაზრდების ქმედებაზე აიღო პასუხისმგებლობა. შენ ჯერ ახალგაზრდებმა მოსმენის ღირსი უნდა გაგხადონ, - ამის შესახებ პარტია „გირჩის“ ლიდერმა იაგო ხვიჩიამ აქციაზე ვანდალიზმისა და ძალადობრივი ქმედებების შეფასებისას განაცხადა.„მე არ ვიცი ახლა ისინი ვის უსმენენ და ვის დავაკისრო პასუხისმგებლობა, მაგრამ შეიძლება ეს სპონტანური და ემოციური იყოს. ამიტომაც არის საშიში ახალგაზრდების გაღიზიანება“, - აღნიშნა ხვიჩიამ.

მსოფლიო • 1714626687

შეერთებულმა შტატებმა უკრაინაში ომისა და ქიმიური იარაღის გამოყენების გამო, რუსეთს ახალი სანქციები დაუწესა

შეერთებულმა შტატებმა უკრაინაში ომისა და ქიმიური იარაღის გამოყენების გამო, რუსეთს ახალი სანქციები დაუწესა. როგორც სახელმწიფო დეპარტამენტის განცხადებაშია აღნიშნული, სიაში 280 ფიზიკური და იურიდიული პირი მოხვდა.დეპარტამენტი ასევე სანქციებს უწესებს რუსეთის სამ სამთავრობო უწყებას, რომლებიც დაკავშირებული არიან რუსული ქიმიური და ბიოლოგიური იარაღის პროგრამებთან და ოთხ კომპანიას, რომლებმაც ხელი შეუწყვეს აღნიშნულ უწყებებს. ახალი სანქციები რუსეთს, შტატების სახაზინო დეპარტამენტმაც დაუწესა.ნუსხაში 200 ფიზიკური და იურიდიული პირია, რომლებიც ხელს უწყობენ რუსეთის სამხედრო-სამრეწველო კომპლექსს და ეხმარებიან მას დაწესებული სანქციებისთვის თავის არიდებაში.

პოლიტიკა • 1714626620

სამეზობლოსა და გაფართოების შესახებ მოლაპარაკების საკითხებში ევროკომისიის გენერალური დირექტორი დღეს „ქართულ ოცნების“ წევრებს შეხვდება

სამეზობლოსა და გაფართოების შესახებ მოლაპარაკების საკითხებში ევროკომისიის გენერალური დირექტორი გერტ იან კოპმანი საქართველოშია . ევროკომისიის დირექტორი დღეს „ქართულ ოცნების“ წევრებს შეხვდება, მანამდე კი შეხვედრა გამართა საქართველოს პრემიერ-მინისტრთან.პრემიერ-მინისტრმა ხაზგასმით აღნიშნა, რომ ევროკავშირის წევრობა საქართველოს მთავრობის საგარეო პოლიტიკის ერთ-ერთი პრიორიტეტია და ამ მიმართულებით რეფორმები გაგრძელდება. შეხვედრაზე საუბრის ერთ-ერთი თემა იყო კანონპროექტი „უცხოური გავლენის გამჭვირვალობის შესახებ“

პოლიტიკა • 1714626512

პარლამენტის მიმდებარე ტერიტორია დასუფთავებულია და აღდგენილია ტრანსპორტის მოძრაობა

უკვე რამდენიმე საათია, სიმშვიდეა თბილისის ცენტრში - პარლამენტის მიმდებარე ტერიტორია დასუფთავებულია და აღდგენილია ტრანსპორტის მოძრაობა.გამჭვირვალობის კანონპროექტის მოწინააღმდეგეთა აქცია გამთენიისას დასრულდა. პროტესტი მიმდებარე ტერიტორიაზე 9 საათზე მეტხანს, ხმაურითა და დაპირისპირებებით მიმდინარეობდა. 9 აპრილისა და ჭიჭინაძის ქუჩებზე შეკრებილმა დემონსტრანტებმა ტერიტორია სპეცაღჭურვილობის გარეშე მყოფი სამართალდამცველების გამოჩენის შემდეგ დატოვეს.ცოტა ხნით, მათ რუსთაველის გამზირზე გადაინაცვლეს, რის შემდეგაც, დაახლოებით 5 საათისთვის, დაიშალნენ. ამას წინ უძღოდა 9 აპრილის ქუჩაზე, პარლამენტის შესასვლელის შტურმის მორიგი მცდელობა.ჭიშკართან მიახლოებას დემონსტრანტები სახელდახელოდ გაკეთებული ფარის საშუალებით ცდილობდნენ. პარლამენტის ეზოდან სამართალდამცველები წყლის ჭავლს, ცრემლსადენ გაზსა და ე.წ. წიწაკის სპრეის ეტაპობრივად უშვებდნენ.

საზოგადოება • 1714625350

დღეს ვნების შვიდეულის დიდი ხუთშაბათია

დღეს ვნების შვიდეულის დიდი ხუთშაბათია, სამების საკათედრო ტაძარში საღვთო ლიტურგიას სრულიად საქართველოს კათოლიკოს-პატრიარქის მოსაყდრე, მეუფე შიო აღავლენს. ყველა მოქმედ ტაძარში აღევლინება წირვა და ტრადიციულად წაიკითხება 12 ვნების სახარება, ლიტურგიის შემდეგ, ფეხთბანის რიტუალი შესრულდება.დიდი ხუთშაბათი იმითაცაა გამორჩეული, რომ ეს ერთადერთი დღეა მთელი წლის განმავლობაში, როცა საჭიროების შემთხვევაში, მირონის კურთხევა შეიძლება. დიდი ხუთშაბათის საღამოს სრულდება დიდი პარასკევის ცისკარი, როდესაც ე.წ. „თორმეტი სახარება“ ანუ ოთხი სახარებიდან ამოკრეფილი 12 ნაწყვეტი იკითხება, რომელშიც იესო ქრისტეს ის ვნებებია აღწერილი, რომლებიც ჯვარცმამდე გადახდა.