ცნობილ ინფლუენსერს ეთერში ფილტრი გაეთიშა - რეალური კადრის შემდეგ, 140 ათასი გამომწერი დაკარგა

ჩინელმა ინფლუენსერმა ათიათასობით გამომწერი დაკარგა მას შემდეგ, რაც პირდაპირი ეთერის დროს სილამაზის ფილტრი მოულოდნელად გამოირთო და მაყურებელმა მისი ბუნებრივი გარეგნობა იხილა.

გავრცელებულ კადრებში ინფლუენსერი მაკიაჟითა და მოვლილი იერსახით ჩნდება. თუმცა ერთ მომენტში ტექნიკური ხარვეზის გამო ფილტრი ითიშება და ეკრანზე მისი რეალური სახე ჩანს. გავრცელებული ინფორმაციით, ინციდენტის შედეგად მან დაახლოებით 140 000 გამომწერი დაკარგა.

მიუხედავად ამისა, აუდიტორიის ნაწილი მის ბუნებრივ გარეგნობას დადებითად აფასებს. სოციალური ქსელების ერთ-ერთმა მომხმარებელმა დაწერა: „ვფიქრობ, ბუნებრივად უფრო ლამაზია — ფილტრი უსიცოცხლო იერს აძლევდა.“

აღსანიშნავია, რომ ეს არ არის პირველი შემთხვევა, როდესაც ინფლუენსერებს აუდიტორიის შეცდომაში შეყვანაში ადანაშაულებენ.

2019 წელს პირდაპირი ეთერის დროს ტექნიკურმა შეფერხებამ გამოავლინა, რომ ერთ-ერთი ცნობილი ახალგაზრდა ბლოგერი სინამდვილეში შუახნის ქალი იყო.

რამდენიმე წლის წინ ასევე დიდი განხილვა მოჰყვა TikTok-ის ფილტრს — Bold Glamour-ს. მომხმარებლების შეფასებით, აღნიშნული ეფექტი იმდენად ძლიერია, რომ რეალურ გარეგნობას სრულად ფარავს. სწორედ ამიტომ, ინფლუენსერთა ნაწილმა მისი გამოყენების შეზღუდვაც კი მოითხოვა.

ბოლო შემთხვევამ კიდევ ერთხელ გააჩინა დისკუსია სოციალური მედიის რეალობასა და ფილტრების გავლენაზე — რამდენად მისაღებია ვიზუალური იერსახის რადიკალური ცვლილება და რა პასუხისმგებლობა ეკისრებათ კონტენტის შემქმნელებს საკუთარი აუდიტორიის წინაშე.