კატები რკინიგზის სადგურის ხელმძღვანელებად - უჩვეულო ტრადიცია იაპონიაში

სამხრეთ იაპონიაში, ვაკაიამას პრეფექტურაში, ორი კატა რკინიგზის სადგურის ხელმძღვანელებად დაინიშნა. ინფორმაციას unian-ი სარკინიგზო კომპანია Wakayama Electric Railway-ის ოფიციალური ვებსაიტზე დაყრდნობით ავრცელებს.

კატებმა ახალი პოზიციები ოფიციალურ ცერემონიაზე მიიღეს, რომელსაც კომპანიის წარმომადგენლები, ადგილობრივი ხელისუფლება და მოსახლეობა ესწრებოდა. ცერემონიაში 200-ზე მეტმა ადამიანმა მიიღო მონაწილეობა.

სადგურის „ხელმძღვანელების“ მთავარი მოვალეობაა სპეციალურად მოწყობილ ოფისში — გადაკეთებულ ბილეთების ჯიხურში — ყოფნა და ტურისტების მოზიდვა, რაც კიშიგავას რკინიგზის ხაზის პოპულარიზაციას ემსახურება.

კატები მუშაობენ განსაზღვრული გრაფიკის მიხედვით, აცვიათ სადგურის მენეჯერის სპეციალური ქუდები და ხელფასს საკვების სახით იღებენ.

ცნობისთვის, რკინიგზის სადგურების „ოსტატებად“ კატების დანიშვნის ტრადიცია ვაკაიამაში 2007 წლის იანვარში დაიწყო.

პირველი ასეთი „ხელმძღვანელი“ კიშის სადგურზე რვა წლის კატა ტამა იყო. ინიციატივის მიზანი მგზავრთა ნაკადის გაზრდა იყო, რადგან კიშიგავას ხაზი ფინანსური სირთულეების გამო დახურვის საფრთხის წინაშე იდგა.

ტამას გამოჩენამ შედეგი მალევე მოიტანა — პირველივე თვეში მგზავრთა რაოდენობა 17 პროცენტით გაიზარდა, ხოლო ტურიზმის ზრდის შედეგად ადგილობრივ ეკონომიკაში დაახლოებით 1.1 მილიარდი იენი შევიდა.

ვაკაიამაში სარკინიგზო კატების ტრადიცია უფრო ფართო ეკონომიკური და კულტურული პროცესის ნაწილია, რომელიც იაპონიაში ცნობილია როგორც „ნეკონომიკა“ („კატონომიკა“).

სპეციალური თილისმა-კატების გამოყენება ბიზნესში ეფექტურად იზიდავს მომხმარებლებს და მნიშვნელოვან ეკონომიკურ სარგებელს ქმნის.