მოსალოდნელია სიცოცხლისთვის საშიში შტორმი, იამაიკაში ქარიშხალი „მელისა“ მეხუთე კატეგორიამდე გაძლიერდა - SKY NEWS

ქარიშხალი „მელისა“ მეხუთე კატეგორიამდე გაძლიერდა და რამდენიმე საათში იამაიკას „სიცოცხლისთვის საშიში შტორმი“ დაატყდება თავს. ამის შესახებ „სქაინიუსი“ ქარიშხლების ეროვნულ ცენტრზე დაყრდნობით ავრცელებს ინფორმაციას.

მედიასაშუალება წერს, რომ დამანგრეველი ქარი და ძლიერი ტალღები კუნძულოვან სახელმწიფოს სერიოზულ საფრთხეს შეუქმნის.

ქარიშხლების ეროვნული ცენტრის განახლებული ინფორმაციით, ამ დროისთვის ქარიშხალ „მელისიას“ სიჩქარე საათში 260 კმ-ს შეადგენს.

„„მელისა“ მე-5 კატეგორიის ქარიშხალია. დღეს მისი დამატებითი გაძლიერებაა პროგნოზირებული. სავარაუდოდ, მელისა იამაიკას ორშაბათს, ღამით ან სამშაბათს, დილით დაატყდება თავს. ზოგიერთ რაიონში სიცოცხლისთვის საშიში შტორმული ტალღებია მოსალოდნელი“, – ნათქვამია ქარიშხლების ეროვნული ცენტრის განცხადებაში.