ტენდერი

თბილისის მასშტაბით დაზიანებული საგზაო ინფრასტრუქტურა უახლოეს პერიოდში, ღამის საათებში მოწესრიგდება

დედაქალაქის მასშტაბით დაზიანებული საგზაო ინფრასტრუქტურის აღდგენა უახლოეს პერიოდში, ძირითადად ღამის საათებში განხორციელდება, - ამის შესახებ თბილისის მუნიციპალიტეტის მთავრობის სხდომაზე დედაქალაქის მერმა კახა კალაძემ განაცხადა.მისი თქმით, უკვე გამოვლენილია გამარჯვებული კომპანია, რომელიც მთელი ქალაქის მასშტაბით განახორციელებს შესაბამის პროექტებს.„ზამთრის სეზონიდან მოყოლებული უამინდობამ და ტემპერატურის მკვეთრმა ცვალებადობამ დედაქალაქში ძალიან დააზიანა საგზაო ინფრასტრუქტურა. არის კონკრეტული გზის მონაკვეთები, რომლებიც დაზიანებულია და აუცილებელ ჩარევას საჭიროებს. ჩვენ გამოცხადებული გვქონდა ტენდერი აღნიშნული მიმართულებით, უკვე გვყავს გამარჯვებული კომპანია, რომელიც მთელი ქალაქის მასშტაბით, განსაკუთრებით ღამის საათებში, არა მხოლოდ ცენტრალურ ქუჩებზე, არამედ შიდა საუბნო გზებზეც მოახდენს შესაბამის რეაგირებას, რათა საგზაო ინფრასტრუქტურა დედაქალაქის მასშტაბით იყოს მოწესრიგებული“, - განაცხადა კახა კალაძემ.თბილისის მერმა მოსახლეობას ჩართულობისა და მხარდაჭერისთვის მადლობა გადაუხადა.„რაც შეეხება დაზიანებული მონაკვეთების აღდგენას, ძირითადად ღამის საათებში ჩატარდება სამუშაოები, რასაც ახლავს გარკვეული დისკომფორტი ხმაურის სახით, თუმცა ეს არ იქნება ხანგრძლივად. იქიდან გამომდინარე, რომ დღის განმავლობაში გზის გადაკეტვა ძალიან დიდ პრობლემებს იწვევს, თან სამუშაოები ერთდროულად რამდენიმე ქუჩაზე ჩატარდება, შესაბამისად, მუშაობა მხოლოდ ღამის საათებში მოგვიწევს“, - განაცხადა კახა კალაძემ.

დედაქალაქი • 1779263818

N96 საბავშვო ბაგა-ბაღის მშენებლობაზე ტენდერი გამოცხადდა

ჩუღურეთის რაიონში, ნინო ჩხეიძის ქუჩაზე მდებარე N96 საბავშვო ბაგა-ბაღის შენობის მშენებლობაზე ტენდერი გამოცხადდა.ამის შესახებ თბილისის მერმა კახა კალაძემ დღეს დედაქალაქის მთავრობის სხდომაზე განაცხადა.მისივე თქმით, გამომდინარე იქიდან, რომ ქალაქი ყოველწლიურად იზრდება, თავისთავად იზრდება მოთხოვნა სკოლამდელი აღზრდის დაწესებულებებზეც, რადგან არსებული რესურსი გაზრდილ მოთხოვნას ვერ აკმაყოფილებს, შესაბამისად, აღნიშნული მიმართულება მერიის ერთ-ერთი პრიორიტეტია.„თბილისის საბავშვო ბაგა-ბაღების მართვის სააგენტომ ბოლო წლების განმავლობაში არაერთი მასშტაბური პროექტი განახორციელა. ეს იყო როგორც ახალი ბაღების მშენებლობა, ისე არსებული შენობების განახლება და მოწესრიგება. უკვე ათასობით მშობელი და პატარა გავახარეთ, თუმცა ჩვენ, რა თქმა უნდა, ამაზე არ ვჩერდებით და სააგენტო კიდევ ერთი მნიშვნელოვანი პროექტის განხორციელებას იწყებს. უკვე გამოცხადდა ტენდერი ჩუღურეთის რაიონში, ნინო ჩხეიძის ქუჩაზე მდებარე N96 საბავშვო ბაგა-ბაღის შენობის მშენებლობაზე. საბავშვო ბაღის ამჟამინდელი შენობა არქიტექტურულად არ შეესაბამება თანამედროვე სტანდარტებს, რის გამოც, პროექტის ფარგლებში მოხდება მისი დემონტაჟი და აშენდება ახალი, თანამედროვე სტანდარტების, სამსართულიანი შენობა, სადაც უზრუნველყოფილი იქნება ბავშვთა უსაფრთხოების ყველა სტანდარტი“, - განაცხადა თბილისის მერმა.მისივე თქმით, საბავშვო ბაღი ექვს ჯგუფზე იქნება გათვლილი და 170 აღსაზრდელს მოემსახურება.ამასთან, როგორც მერმა აღნიშნა, ტენდერის დასრულების შემდეგ, გამარჯვებულ კომპანიასთან გაფორმდება ხელშეკრულება, რის შემდეგაც, შენობის დემონტაჟი და ახალის მშენებლობა დაიწყება.„რაც მთავარია, სამუშაოების მიმდინარეობისას N96 ბაგა-ბაღი ფუნქციონირებას არ შეწყვეტს, რადგან მისი კონტინგენტი ახლომდებარე ბაღებში გადანაწილდება“, - აღნიშნა დედაქალაქის მერმა.

პოლიტიკა • 1779263582

კახა კალაძე: ტრამვაის ხაზის პროექტირება-მშენებლობის ტენდერში მონაწილეებთან დეტალების დაზუსტება მიმდინარეობს, რის შემდეგაც გამარჯვებული კომპანია გვეყოლება

ტრამვაის ხაზის პროექტირებისა და მშენებლობის მიზნით გამოცხადებულ ტენდერში მიღებული წინადადებების შეფასების პირველი ეტაპი დასრულებულია.როგორც დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე აღნიშნა, ამ ეტაპზე პრეტენდენტებთან დეტალების დაზუსტება მიმდინარეობს, რის შემდეგაც გამარჯვებული კომპანია გამოვლინდება.„დიდი დიღმისა და მეტროსადგურ „დიდუბის“ დამაკავშირებელი ტრამვაის ხაზის პროექტირებისა და მშენებლობის მიზნით გამოცხადებული ტენდერი მიმდინარე წლის 31 მარტს გაიხსნა. ტენდერი მიმდინარეობს აზიის განვითარების ბანკის შესყიდვის წესებით. მოცემულ ტენდერში მონაწილეობის სურვილი გამოთქვა და შესაბამისი სატენდერო წინადადებები წარმოადგინა ოთხმა მსხვილმა კომპანიამ და ერთობლივმა საწარმომ. დღეის მდგომარეობით, წარმოდგენილი წინადადებების შეფასების პირველი ეტაპი დასრულებულია და პრეტენდენტებთან მიმდინარეობს დეტალების დაზუსტება. დაზუსტებული ინფორმაციის წარმოდგენის შემდეგ გამოვლინდება გამარჯვებული კომპანია, რომელთანაც ივნისის ბოლომდე გაფორმდება ხელშეკრულება და დაუყოვნებლივ დაიწყება პროექტის განხორციელება“, – აღნიშნა კახა კალაძემ.რაც შეეხება მშენებლობის ძირითად პარამეტრებს, თბილისის მერის თქმით, ტრამვაის ხაზი დაიწყება დიდი დიღმის მე-3 და მე-4 მიკრორაიონების გადაკვეთის მიმდებარე ტერიტორიიდან და დავით აღმაშენებლის ხეივნისა და დიღმის მასივის გავლით დაუკავშირდება მეტროსადგურ „დიდუბის“ მიმდებარე ტერიტორიას.„ტრამვაის ხაზის საორიენტაციო სიგრძე შეადგენს 7.5 კმ-ს, სადაც განთავსებული იქნება 11 გაჩერება. პროექტი ასევე მოიცავს შესაბამისი დეპოს მოწყობას, რომელიც გათვლილი იქნება ტრამვაის 11 შემადგენლობის მომსახურება-ექსპლუატაციაზე. პროექტი, რომლის სავარაუდო ღირებულება შეადგენს 417 მლნ ლარს, სახელმწიფო ბიუჯეტიდან სრულად დაფინანსდება. მოგეხსენებათ, პროექტი ისტორიული მნიშვნელობისაა, რადგან ტრანსპორტის აღნიშნული სახეობა წლების შემდეგ უბრუნდება დედაქალაქს. ამასთან, მისი ამოქმედება და ერთიან სატრანსპორტო ქსელში ინტეგრირება, მნიშვნელოვნად გააუმჯობესებს დიდი დიღმის მოსახლეობის წვდომას საზოგადოებრივი ტრანსპორტის სხვა სახეობებთან და მნიშვნელოვნად შეამცირებს როგორც მოლოდინის, ისე გადაადგილების დროს. ძალიან დიდი იმედი მაქვს, რომ ეს არ იქნება ტრამვაის პირველი და ბოლო პროექტი“, – განაცხადა კახა კალაძემ.

პოლიტიკა • 1778054969

ანაკლიის საზღვაო ნავსადგურის დირექტორი: კონტრაქტორ კომპანიასთან მოლაპარაკებით შევძელით ანაკლიის პროექტის ბიუჯეტის ოპტიმიზება დაახლოებით 52 მილიონი დოლარით, თუმცა ხარისხი საერთაშორისო საზღვაო პრაქტიკასთან შესაბამისი იქნება

„ანაკლიის ღრმაწყლოვანი ნავსადგურის განვითარების ერთ-ერთ მნიშვნელოვან კომპონენტს წარმოადგენს საზღვაო ინფრასტრუქტურის განვითარება, რომელსაც სახელმწიფო ახორციელებს. პროექტი შედგებოდა ორი ეტაპისგან - მობილიზაცია/პროექტირება და სამშენებლო სამუშაობის წარმოება, მობილიზაცია/პროექტირება დასრულებულია და შესაბამისად სამუშაოები გადავიდა აქტიურ რეჟიმში“ - ამის შესახებ შპს „ანაკლიის საზღვაო ნავსადგურის“ დირექტორმა, ზურაბ სიჭინავამ განაცხადა, რომელმაც ეკონომიკისა და მდგრადი განვითარების მინისტრს ანაკლიის პორტში მიმდინარე სამუშაოები გააცნო.როგორც ზურაბ სიჭინავამ აღნიშნა, ხაზგასასმელია, რომ სახელმწიფომ კონტრაქტორ კომპანიასთან ეფექტიანი მოლაპარაკებით შეძლო პროექტის ბიუჯეტის ოპტიმიზაცია დაახლოებით 52 მილიონი აშშ დოლარით.„საერთაშორისო ტენდერის გზით შერჩეული ბელგიური კომპანია Jan De Nul N.V. ევროპული ბაზრის „დიდი ოთხეულის“ წევრია, რაც ხარისხისა და გარანტიის მნიშვნელოვან საფუძველს წარმოადგენს. ჩვენ მოლაპარაკება ვაწარმოეთ კონტრაქტორთან და შევძელით ბიუჯეტის ოპტიმიზება დაახლოებით 52 მილიონი დოლარით, თუმცა, პროექტის პარამეტრებს ცვლილება არ შეხებია, ხარისხი საერთაშორისო საზღვაო პრაქტიკასთან შესაბამისი იქნება. ეს არის ნათელი მაგალითი, თუ როგორ არის შესაძლებელი მაღალი ხარისხის და სტანდარტის მიღება ბიუჯეტის ეფექტიანი გამოყენებით", - აღნიშნა ზურაბ სიჭინავამ.

პოლიტიკა • 1777980292

შალვა პაპუაშვილი: ჩვენთვის მნიშვნელოვანი არის, რომ ანაკლიის პორტი აშენდეს და ჰქონდეს დატვირთვა. ამ პორტს მნიშვნელობა აქვს ევროპისთვის და აზიისთვის, ვინაიდან მთავარი დატვირთვა იქნება სწორედ ევროპისა და აზიის ერთმანეთთან დაკავშირება

ჩვენთვის მთავარია, რომ ის პორტი, რომელიც უნდა აშენდეს, საქართველოს სახელმწიფოს ექნება 51% წილი მთლიან პორტში, რაც გულისხმობს, რომ ეს იქნება საქართველოს საკუთრება, - განაცხადა საქართველოს პარლამენტის თავმჯდომარემ შალვა პაპუაშვილმა ანაკლიის პორტზე საუბრისას.მისივე თქმით, რომელი ინვესტორი იქნება ამაში ჩართული, ვინ რა პროცესში იქნება ჩართული, ეს არის ტექნიკური საკითხი, რომელსაც მთავრობა წყვეტს.„ჩვენთვის მნიშვნელოვანი არის, რომ ეს პორტი აშენდეს, პორტს ჰქონდეს დატვირთვა, ამ პორტს მნიშვნელობა აქვს ევროპისთვის და აზიისთვის, ვინაიდან ამ პორტის მთავარი დატვირთვა იქნება სწორედ ევროპისა და აზიის ერთმანეთთან დაკავშირება. ჩატარდა საჯარო ტენდერი, ვისაც ჰქონდა ინტერესი მიიღო მონაწილეობა, ვისაც არა, არ მიიღო მონაწილეობა. მთავარი არის, რომ საქართველო იყოს ძლიერად და კარგად და განხორციელდეს ის პროექტები, რომელიც ჩვენს ქვეყანას მოუტანს სარგებელს“, - აღნიშნა შალვა პაპუაშვილმა.

საზოგადოება • 1777911000

პირველი არხი განცხადებას ავრცელებს

ფეხბურთში 2026 წლის მსოფლიო ჩემპიონატის ლიცენზიასთან დაკავშირებით პირველი არხი განცხადებას ავრცელებს.„2026 წლის მსოფლიო ჩემპიონატის ლიცენზიის შესყიდვასთან დაკავშირებით საზოგადოებრივმა მაუწყებელმა ინტერესი ჯერ კიდევ 2023 წელს გამოხატა და დაიწყო შესაბამისი მოლაპარაკებები.ლიცენზიის შეძენა შესაძლებელი იყო FIFA-ს დახურული ტენდერის საშუალებით, რომელშიც მონაწილეობენ დაინტერესებული მხარეები. პირველი არხი ტენდერში მონაწილეობდა ევროპის მაუწყებელთა კავშირის (EBU) ეგიდით. ევროპის სხვადასხვა ქვეყნის, მათ შორის, საქართველოს სახელით ტენდერში ე.წ. ბიდინგს (ფასდადება) აწარმოებს ევროპის მაუწყებელთა კავშირი.პირველი არხი ტენდერში მონაწილეობდა, როგორც საერთო მაუწყებელი (ორი სატელევიზიო არხი, რადიოარხი და ციფრული პლატფორმა) ყველა მატჩის ექსკლუზიური ტრანსლაციის უფლებისთვის როგორც ღია სიგნალის (DVBT2), ასევე სატელიტური სიგნალისთვის, რითაც სრულად უზრუნველყოფდა აუდიტორიის მომსახურებას ყველა შესაძლო პლატფორმაზე.აღსანიშნავია, რომ პირველი არხის მიერ გაკეთებული პირველი ბიჯი შეადგენდა 61%-ით მეტს, ვიდრე 2022 წლის მსოფლიო ჩემპიონატის ლიცენზიის ღირებულება იყო. ბიდინგის დროს მაუწყებელმა მეორე ბიჯზე თანხა გაზარდა კიდევ 20%-ით და, ჯამში, 2026 წლის ლიცენზიისთვის FIFA-ს ორჯერ მეტი თანხა შესთავაზა. მიუხედავად ამისა, FIFA-ს კომერციული ინტერესიდან გამომდინარე, მაღალი ფასით ბიდინგი მოიგო ერთ-ერთმა კერძო სამაუწყებლო პლატფორმამ, რომელმაც ლიცენზია შეისყიდა რეგიონის რამდენიმე ქვეყნის, მათ შორის, საქართველოს ტერიტორიაზე.გვსურს, საზოგადოებას ვაცნობოთ, რომ იმავე დღიდან მიმდინარეობს კომპანიასთან მოლაპარაკება საქართველოს ტერიტორიაზე ღია სიგნალის საშუალებით ტრანსლაციის ლიცენზიის თანაშესყიდვაზე (Sub license), რის შესახებაც მოლაპარაკებები ჯერ არ დასრულებულა“, - ნათქვამია განცხადებაში.

პოლიტიკა • 1777360621

პროექტების განხორციელებისას პრიორიტეტი ოპტიმალური ფასისა და მაღალი ხარისხის უზრუნველყოფაა - რევაზ სოხაძე

,,ინფრასტრუქტურული პროექტების განხორციელების პროცესში მთავრობის მთავარი პრიორიტეტი ოპტიმალური ფასისა და მაღალი ხარისხის უზრუნველყოფაა - აღნიშნული პრინციპი წარმოადგენს გადაწყვეტილებების მიღების განმსაზღვრელ კრიტერიუმს,''- ამის შესახებ ინფრასტრუქტურის მინისტრმა, რევაზ სოხაძე, ტელეკომპანია რუსთავი 2-ის გადაცემაში „დებატები“ განაცხადა.მინისტრის თქმით, არ შეესაბამება რეალობას გავრცელებული მოსაზრება, თითქოს უცხოურ კომპანიებს ტენდერებში პრივილეგირებული მდგომარეობა აქვთ. მისი განმარტებით, ყველა ტენდერი ეფუძნება მკაფიო საკვალიფიკაციო მოთხოვნებს, რომელთა დაკმაყოფილებაც აუცილებელია მონაწილეობისათვის. ამასთან, ხშირად სწორედ ამ მოთხოვნების დაკმაყოფილება წარმოადგენს გამოწვევას ადგილობრივი კომპანიებისთვის, განსაკუთრებით მსხვილ საერთაშორისო ტენდერებში.რევაზ სოხაძემ აღნიშნა, რომ ბოლო თვეების განმავლობაში მთავრობამ მნიშვნელოვანი ნაბიჯები გადადგა ქართული სამშენებლო კომპანიების შესაძლებლობების გასაძლიერებლად. შედეგად, უკვე დაფიქსირდა პირველი შემთხვევა, როდესაც თბილისის შემოვლითი გზის პირველი ეტაპის საერთაშორისო ტენდერში ქართულმა კონსორციუმმა მიიღო მონაწილეობა, რაც მინისტრის შეფასებით, მნიშვნელოვანი წინგადადგმული ნაბიჯია, მიუხედავად იმისა, რომ წარმოდგენილი ფასი განსხვავდება სხვა პრეტენდენტების შეთავაზებებისგან.მინისტრმა, ასევე ისაუბრა ბიზნესთან აქტიურ დიალოგზე, მათ შორის ინფრასტრუქტურის მშენებელთა ასოციაციის ფარგლებში გამართულ შეხვედრებზე, რომელშიც მონაწილეობდა პრემიერ-მინისტრიც. მისი თქმით, აღნიშნულ ფორმატში განიხილება ყველა მნიშვნელოვანი საკითხი, მათ შორის ადგილობრივი კომპანიების მხარდაჭერის მექანიზმები და საერთაშორისო ტენდერებში მათი ჩართულობის გაზრდის გზები.მისივე განცხადებით, მთავრობა განაგრძობს მუშაობას აღნიშნული მიმართულებით და უახლოეს პერიოდში მოსალოდნელია დამატებითი პოზიტიური ნაბიჯები, როგორც ინფრასტრუქტურის, ისე სხვა სექტორებში.ფასწარმოქმნის კუთხით, მინისტრმა აღნიშნა, რომ უკვე განხორციელდა მნიშვნელოვანი ცვლილებები, მან გამოთქვა იმედი, რომ ოპონენტები შეძლებენ როგორც მიღწეული პროგრესის, ისე არსებული გამოწვევების ობიექტურად შეფასებას.რევაზ სოხაძემ ხაზი გაუსვა, რომ ხელისუფლების ეფექტიანობა პრობლემების არარსებობით არ იზომება. მისი თქმით, ხელისუფლების სიძლიერე გამოიხატება იმაში, თუ რამდენად ეფექტიანად რეაგირებს ის გამოწვევებზე.მინისტრის შეფასებით, ბოლო პერიოდში მთავრობა ადეკვატურად პასუხობს, მათ შორის, ბიზნესის მოთხოვნებს, თუმცა მისი მთავარი ამოცანა უცვლელია - საჯარო ინტერესის დაცვა, რაც გულისხმობს ხარისხიანი ინფრასტრუქტურის მიღებას ოპტიმალური დანახარჯებით.

პოლიტიკა • 1777317510

ჩვენ ვუყურებთ კერძო სექტორს, როგორც ჩვენს პარტნიორებს... მინდა, რომ კერძო სექტორის წარმომადგენლები მეტ ინვესტიციას ახდენდნენ საკუთარი ტექნიკური საშუალებების გაუმჯობესებასა და კადრების გადამზადებაში - რევაზ სოხაძე

"როდესაც ნდობის დაბრუნებაზე ვსაუბრობ, იგულისხმება, პირველ რიგში, სახელმწიფო, ჩვენი სისტემა და ჩვენ მაქსიმალურად ვცდილობთ, ვიყოთ გამჭვირვალეები და ყველა ტენდერი იყოს აბსოლუტურად თავისუფალი, მაგრამ კომპანიებმაც, კერძო სექტორმაც უნდა დაიბრუნოს ეს ნდობა," - განაცხადა ინფრასტრუქტურის მინისტრმა, რევაზ სოხაძემ "რუსთავი 2-ის" გადაცემა "დებატებში".მისივე თქმით, კერძო კომპანიებმა მეტი ფული უნდა დახარჯონ ტექნიკური საშუალებების გაუმჯობესებასა და კადრების გადამზადებაში."ინფრასტრუქტურას, რომელსაც ჩვენ ვაშენებთ, არ ვაშენებთ ვიღაცის დასანახად. ჩვენ, ყველამ ერთად უნდა გავიაზროთ, რომ ეს ინფრასტრუქტურა უნდა მოემსახუროს თაობებს. ჩვენ არ ვართ იმდენად მდიდარი ქვეყანა და, მგონი, არც მდიდარი ქვეყნები არ მისცემენ თავს იმის უფლებას, რომ უყაირათოდ ვხარჯოთ ფული. შესაბამისად, როდესაც ნდობის დაბრუნებაზე ვსაუბრობ, იგულისხმება, პირველ რიგში, სახელმწიფო, ჩვენი სისტემა და ჩვენ მაქსიმალურად ვცდილობთ, ვიყოთ გამჭვირვალეები და ყველა ტენდერი იყოს აბსოლუტურად თავისუფალი, მაგრამ კომპანიებმაც, კერძო სექტორმაც უნდა დაიბრუნოს ეს ნდობა.მე ხშირად მითქვამს, რომ ჩვენ ვუყურებთ კერძო სექტორს, როგორც ჩვენს პარტნიორებს და ჩვენ ერთად უნდა მივაღწიოთ ამ შედეგს, თუმცა კერძო სექტორმაც თავის თავზე უნდა იმუშაოს - ბოდიში ასეთი გამოთქმისთვის. მინდა, რომ კერძო სექტორის წარმომადგენლები მეტ ინვესტიციას ახდენდნენ საკუთარი ტექნიკური საშუალებების გაუმჯობესებაში, მეტ ფულს ხარჯავდნენ, თუნდაც, კადრების გადამზადებაში," - განაცხადა რევაზ სოხაძემ.

პოლიტიკა • 1777316889

მიუხედავად იმისა, რომ 30 წლის განმავლობაში არაერთი მილიარდი დაიხარჯება [სამშენებლო] სექტორში, სამწუხაროდ, დღეს არ არსებობს ერთი სამშენებლო კომპანიაც, რომელიც ამ მოთხოვნებს დააკმაყოფილებს - ირაკლი გიორგობიანი

"დღეს ერთი სამშენებლო კომპანიაც კი არ არსებობს, რომელიც ამ მოთხოვნებს დააკმაყოფილებს" - ამის შესახებ ინფრასტრუქტურის მშენებელთა ასოციაციის პრეზიდენტმა, ირაკლი გიორგობიანმა, "ღამის კურიერის" ეთერში განაცხადა.მისი თქმით, ერთ-ერთ შემოვლითი გზის ტენდერზე ქართულ კომპანიებს მონაწილეობის შესაძლებლობა მიეცათ, თუმცა, მოთხოვნების დასაკმაყოფილებლად, სამი კომპანიის გაერთიანება გახდა საჭირო, რაც სექტორში არსებულ პრობლემებზე მიუთითებს.გიორგობიანის განცხადებით, სამშენებლო სფეროს განსაკუთრებული მხარდაჭერა და განვითარება სჭირდება."როგორც მინისტრმა აღნიშნა ერთ-ერთ შემოვლითი გზის ტენდერზე განსაკუთრებულად მიეცათ ქართულ კომპანიებს [მონაწილეობის] საშუალება, თუმცა ეს კარგი დიაგნოზის საშუალებას გვაძლევს, რომ, ფაქტობრივად, სამი კომპანია გაერთიანდა იმისთვის, რომ დაეკმაყოფილებინათ ტენდერის საკვალიფიკაციო მოთხოვნები. ეს პირველი შემთხვევა არის.აქ შეფასების კრიტერიუმში ერთ-ერთი არის მათ შორის ბრუნვის ნაწილი, თუ რამდენი საშუალო ბრუნვა ჰქონდა კომპანიას. მაგ ნაწილში მნიშვნელოვნად დაიწია მოთხოვნა, რამაც მისცა საშუალება კონსორციუმს, დაეკმაყოფილებინა ეს მოთხოვნა. ამით იმის თქმა მინდა, რომ მიუხედავად იმისა, რომ 30 წლის განმავლობაში არაერთი მილიარდი დაიხარჯება ამ სექტორში, სამწუხაროდ, არ არსებობს დღეს ერთი სამშენებლო კომპანია თუნდაც, რომელიც ამ მოთხოვნებს დააკმაყოფილებს. ეს ცალსახად მიგვითითებს იმისკენ, რომ განსაკუთრებული ყურადღება სჭირდება ამ სექტორს. ეს სექტორი არის, ციფრებში რომ ვისაუბროთ, დაახლოებით 16 მილიარდი ლარი, საიდანაც დაახლოებით ნახევარს ქმნის სახელმწიფო ბიუჯეტი, ნახევარს კერძო სექტორი", - აცხადებს გიორგობიანი.

პოლიტიკა • 1777274952

რევაზ სოხაძის განცხადებით, ანაკლია-განმუხური მნიშვნელოვანი ტურისტული ცენტრი გახდება

ინფრასტრუქტურის მინისტრმა რევაზ სოხაძემ გადაცემაში ,,მოამბე რეგიონები’’ ანაკლიისა და განმუხურის სანაპირო ზოლის განვითარების პერსპექტივებზე ისაუბრა და აღნიშნა, რომ ამ ტერიტორიას აქვს პოტენციალი, ერთ-ერთ ყველაზე მიმზიდველ ტურისტულ მიმართულებად ჩამოყალიბდეს.მინისტრის განცხადებით, სახელმწიფოს მიერ ინფრასტრუქტურაში განხორციელებული ინვესტიციები პირდაპირ აისახება ქვეყნის ეკონომიკურ ზრდაზე და რეგიონების განვითარებაზე.„განმუხური და ანაკლია შეიძლება გახდეს ერთ-ერთი ყველაზე საინტერესო და მიმზიდველი ტურისტული ადგილი და დარწმუნებული ვარ, რომ ეს ასეც იქნება“ -განაცხადა სოხაძემ.მისივე თქმით, ამ ეტაპზე მზადდება მასშტაბური პროექტი, რომელიც მოიცავს ანაკლია-განმუხურის სანაპირო ზოლის სრულ რეაბილიტაციას და თანამედროვე ტურისტული ინფრასტრუქტურის შექმნას. პროექტის დასრულებისთანავე გამოცხადდება ტენდერი სამშენებლო სამუშაოებზე.მან ასევე აღნიშნა, რომ მანამდე უკვე დაწყებულია გადაუდებელი სამუშაოები სანაპიროს დასაცავად. კერძოდ, საავტომობილო გზების დეპარტამენტი ახორციელებს ეროზირებული ნაპირის აღდგენას.„განმუხურის სანაპიროზე ზღვა დაახლოებით 100 მეტრით არის შემოწეული, რის შედეგადაც ხმელეთის ნაწილი დაიკარგა. მიმდინარე წელს დავიწყეთ შესაბამისი სამუშაოები, რომლებიც მომავალშიც რეგულარულად გაგრძელდება სანაპირო ზოლის შესანარჩუნებლად“ - აღნიშნა მინისტრმა.სამინისტრომ ასევე დაიწყო ფართომასშტაბიანი კვლევა შავი ზღვის სანაპირო ზოლის სუსტი წერტილების გამოსავლენად, სადაც ეროზიის პრობლემა განსაკუთრებით მწვავედ დგას. პროექტში ჩართული არიან საერთაშორისო ექსპერტები, კვლევის მიზანია პრობლემის გრძელვადიანი და სისტემური გადაწყვეტა.„ჩვენი მიზანია, ერთხელ და სამუდამოდ შევიმუშაოთ ეფექტიანი მიდგომები, რომლებიც შავი ზღვის სანაპირო ზოლის დაცვას უზრუნველყოფს“ -განაცხადა მინისტრმა.სოხაძის თქმით, აღნიშნული პროექტების განხორციელება მნიშვნელოვნად შეუწყობს ხელს ტურიზმის განვითარებას და ქვეყნის ეკონომიკის გაძლიერებას.

პოლიტიკა • 1777273900

საგანმანათლებლო ინფრასტრუქტურის გაუმჯობესება მთავრობის ერთ-ერთი პრიორიტეტია - რევაზ სოხაძე

ინფრასტრუქტურის მინისტრმა რევაზ სოხაძემ გადაცენმაში "მოამბე რეგიონები" საგანმანათლებლო ინფრასტრუქტურის მდგომარეობაზე ისაუბრა და აღნიშნა, რომ არსებული ვითარება სერიოზულ გამოწვევას წარმოადგენს, რომელსაც ხელისუფლება ღიად აღიარებს და აქტიურად მუშაობს მის გადასაჭრელად.მინისტრის განცხადებით, მთავრობის გადაწყვეტილებით, გასული წლის სექტემბერში საგანმანათლებლო ინფრასტრუქტურის მშენებლობა სრულად გადაეცა ინფრასტრუქტურის სამინისტროს, მას შემდეგ რაც გაუქმდა სააგენტო „ესიდა“, რომელიც სკოლების მშენებლობას ახორციელებდა."როდესაც ეს პროცესები სამინისტროში გადმოვიდა, საკმაოდ მძიმე რეალობასთან მოგვიწია შეხება - მოუწესრიგებელი დოკუმენტაცია, გაჩერებული მშენებლობები, არასრულყოფილი და ზოგ შემთხვევაში საერთოდ არარსებული პროექტები", - განაცხადა მინისტრმა.მისივე თქმით, სამინისტრო სრულად იზიარებს მშობლებისა და მოსწავლეების უკმაყოფილებას, რადგან წლების განმავლობაში ბავშვებს ხშირად არ ჰქონდათ სრულფასოვანი განათლების მიღების შესაძლებლობა."ეს არის სახელმწიფოსთვის ერთ-ერთი ყველაზე მნიშვნელოვანი გამოწვევა და პრიორიტეტი, რომელზეც ყოველდღიურად ვმუშაობთ", - აღნიშნა სოხაძემ.მინისტრის განმარტებით, განათლების სამინისტრო განსაზღვრავს პრიორიტეტებს, ხოლო ინფრასტრუქტურის სამინისტრო ახორციელებს შესაბამის პროექტებს. მისი თქმით, სამინისტრო აქტიურად ურთიერთობს ადგილობრივ მოსახლეობასთან და უზრუნველყოფს პროცესების გამჭვირვალობას.როგორც მინისტრმა აღნიშნა, მანავის სკოლის შესახებ უახლოეს დღეებში გამოცხადდება ტენდერი და გამარჯვებული კომპანიის გამოვლენისთანავე დაიწყება სარეაბილიტაციო სამუშაოები.რაც შეეხება მოხისის სკოლას, მინისტრის თქმით, მიმდინარეობს შესაბამისი პროცედურები - შენობის მდგომარეობა შეფასდება ექსპერტიზის ეროვნული ბიუროს მიერ, რის შემდეგაც გადაწყდება, საჭიროა არსებული შენობის რეაბილიტაცია თუ ახალი სკოლის მშენებლობა.მინისტრმა ასევე აღნიშნა, რომ მსგავსი პრობლემები მწვავედ დგას არა მხოლოდ რეგიონებში, არამედ დედაქალაქშიც. ამ გამოწვევის დასაძლევად სამინისტრომ მიიღო გადაწყვეტილება, შეიმუშაოს სკოლების ტიპიური პროექტები, რაც მნიშვნელოვნად დააჩქარებს მშენებლობის პროცესს."მზა პროექტების არსებობა საშუალებას მოგვცემს, აღარ დავკარგოთ დრო თითოეული სკოლის ინდივიდუალური პროექტირების პროცესში და სამუშაოები გაცილებით სწრაფად განხორციელდეს", - განაცხადა მინისტრმა.სოხაძემ კიდევ ერთხელ გაუსვა ხაზი, რომ სკოლების მშენებლობა და რეაბილიტაცია მთავრობის ერთ-ერთი მთავარი პრიორიტეტია და პროცესში ჩართულია მრავალი სახელმწიფო უწყება, რათა უზრუნველყოფილი იყოს სამუშაოების შეუფერხებლად მიმდინარეობა.მისივე განცხადებით, სამინისტრო ყოველდღიურად მუშაობს იმისთვის, რომ მრავალწლიანი პრობლემები დროულად გადაიჭრას და მოსწავლეებისთვის ღირსეული სასწავლო გარემო შეიქმნას.

საზოგადოება • 1776858849

გლდანის რაიონში თბილისის N14 საბავშვო ბაგა-ბაღის ახალი შენობის მშენებლობა დაიწყება

თბილისის საბავშვო ბაგა-ბაღების მართვის სააგენტო წელს კიდევ ერთ ახალ ინფრასტრუქტურულ პროექტს განახორციელებს - გლდანის რაიონში, სარაჯიშვილის ქუჩის N13-ში, თბილისის N14 საბავშვო ბაგა-ბაღის ახალი შენობის მშენებლობა დაიწყება, - ამის შესახებ დედაქალაქის მერმა კახა კალაძემ თბილისის მუნიციპალიტეტის მთავრობის სხდომაზე დღეს განაცხადა.მისი თქმით, ტენდერი სამშენებლო სამუშაოების შესყიდვაზე უკვე გამოცხადებულია და განაცხადების მიღება 11 მაისს დასრულდება.„ჩვენს ერთ-ერთ მთავარ პრიორიტეტს წარმოადგენს სკოლამდელი აღზრდის დაწესებულებების მშენებლობა, არსებული შენობების რეაბილიტაცია, პატარებისთვის უსაფრთხო გარემოს შექმნა და მათი განვითარებისთვის საჭირო ინფრასტრუქტურის მოწყობა. გაზრდილი მოთხოვნიდან გამომდინარე, თბილისის საბავშვო ბაგა-ბაღების მართვის სააგენტო წელს კიდევ ერთ ახალ ინფრასტრუქტურულ პროექტს დაიწყებს. პროექტი ითვალისწინებს გლდანის რაიონში, სარაჯიშვილის ქუჩის N13-ში, თბილისის N14 საბავშვო ბაგა-ბაღის ახალი შენობის მშენებლობას. გასულ კვირას გამოცხადდა ტენდერი სამშენებლო სამუშაოების შესყიდვაზე, განაცხადების მიღება კი დასრულდება 11 მაისს. უახლოეს მომავალში გაფორმდება ხელშეკრულება გამარჯვებულ კომპანიასთან და დაიწყება ახალი, თანამედროვე სტანდარტების შესაბამისი შენობის მშენებლობა“, - აღნიშნა კახა კალაძემ.მისი თქმით, პროექტის თანახმად, ახალი ბაღი რვაჯგუფიანი იქნება და 250-მდე აღსაზრდელს მოემსახურება.„ბაგა-ბაღის ტერიტორია 3 500-მდე კვადრატული მეტრია, სადაც აშენდება თანამედროვე, ევროპული სტანდარტების შენობა და უზრუნველყოფილი იქნება ბავშვთა უსაფრთხოების ყველა სტანდარტი. ჩვენ ძალიან დიდ ყურადღებას ვუთმობთ, რომ ყველა ნივთი აკმაყოფილებდეს საერთაშორისო სტანდარტებს და ჰქონდეს შესაბამისი სერტიფიკატი. ეს მიდგომა მომავალშიც გაგრძელდება“, - განაცხადა თბილისის მერმა.