მსოფლიო • 1788954195

ნიდერლანდებში 24-საათიანი გაფიცვის გამო საზოგადოებრივმა ტრანსპორტმა მუშაობა შეაჩერა

ნიდერლანდებში 24-საათიანი გაფიცვის გამო მუშაობა შეაჩერა საზოგადოებრივმა ტრანსპორტმა.მედიის ცნობით, გაფიცვა გავლენას მოახდენს ქვეყნებს შორის სარკინიგზო გადაადგილებაზე, კერძოდ, ბელგიის, გერმანიის, საფრანგეთისა და დიდი ბრიტანეთის მიმართულებით.პროფკავშირები ნიდერლანდების ხელისუფლების გადაწყვეტილებას აპროტესტებდნენ, რომლის მიხედვითაც, ქვეყანაში სოციალური ხარჯები 6.5 მილიარდ ევრომდე უნდა შემცირდეს. ცვლილება ძირითადად უმუშევრობის შემწეობის შეზღუდვას და თავდაცვის ხარჯების მნიშვნელოვან ზრდას გულისხმობს.„როიტერი“ წერს, რომ გაფიცვა კიდევ უფრო ზრდის იმ სირთულეებს, რაც წელს ნიდერლანდებში ჩამოყალიბებული მემარჯვენე-ცენტრისტული უმცირესობის მთავრობას უკვე აქვს. უმრავლესობის არარსებობის გამო კოალიციას სხვა პარტიების მხარდაჭერაც სჭირდება, თუმცა ოპოზიციის ლიდერმა პროფკავშირების მოთხოვნას მხარი დაუჭირა.

მსოფლიო • 1788801896

არქტიკა იქცა ერთ-ერთ ადგილად, სადაც გეოპოლიტიკის ტექტონიკური ფილები ერთმანეთს ეჯახება, ევროკავშირი სრულ სოლიდარობას უცხადებს დანიის სამეფოსა და გრენლანდიის ხალხს - ურსულა ფონ დერ ლაიენი

ურსულა ფონ დერ ლაიენმა მხარი დაუჭირა გრენლანდიის ტერიტორიულ მთლიანობას და განააცხადა 200 მილიონი ევროს საინვესტიციო პაკეტი, რომელიც დონალდ ტრამპის მხრიდან კუნძულზე განხორციელებულ ზეწოლასთან გამკლავებას ისახავს მიზნად, – ამის შესახებ „ევრონიუსი“ წერს. როგორც „ევრონიუსის“ სტატიაშია ნათქვამი, აშშ-ის პრეზიდენტი არაერთხელ დაიმუქრა გრენლანდიის ანექსიით.ურსულა ფონ დერ ლაიენმა, არქტიკულ კუნძულზე ვიზიტისას განაცხადა, რომ ევროკავშირი მომდევნო ორი წლის განმავლობაში გრენლანდიაში დამატებით 200 მილიონ ევროს ჩადებს, რათა გააღრმაოს ეკონომიკური კავშირები და ხელი შეუწყოს ნედლეულის მოპოვებას.„ჩვენ ვიცით, რომ არქტიკა იქცა ერთ-ერთ ადგილად, სადაც გეოპოლიტიკის ტექტონიკური ფილები ერთმანეთს ეჯახება, ამიტომ ჩვენ უშუალოდ ვართ დაინტერესებული იმით, რაც აქ ხდება“, – განაცხადა ევროკომისიის პრეზიდენტმა​.ევროკომისიის პრეზიდენტმა გრენლანდიაში ვიზიტი გამოიყენა იმისთვის, რომ გრენლანდიის მიმართ ევროპის მხარდაჭერა დაეფიქსირებინა იმ ფონზე, რასაც მან „უზარმაზარი ზეწოლა“ უწოდა, თუმცა ტრამპის სახელი პირდაპირ არ უხსენებია.„ევროკავშირი სრულ სოლიდარობას უცხადებს დანიის სამეფოსა და გრენლანდიის ხალხს. ჩვენ ასე გაგრძელებას ვაპირებთ. და გვინდა, აქ კიდევ ერთხელ მკაფიოდ განვაცხადოთ: გრენლანდიის მომავალს გრენლანდიის ხალხი და დანია გადაწყვეტენ. სხვა არავინ“, – განაცხადა ფინ დერ ლაიენმა ჟურნალისტებთან საუბრისას.„ტერიტორიული მთლიანობა, სუვერენიტეტი, საზღვრების ხელშეუხებლობა – ეს საერთაშორისო სამართლის ფუნდამენტური პრინციპებია“, – აცხადებს ევროკომისიის პრეზიდენტი.მის გვერდით მყოფმა გრენლანდიის პრემიერ-მინისტრმა, იენს-ფრედერიკ ნილსონმა და დანიის პრემიერ-მინისტრმა, მეტე ფრედერიქსენმა ფონ დერ ლაიენს მისი განცხადებებისთვის მადლობა გადაუხადეს.„გრენლანდიას სჭირდება ევროკავშირი და ევროკავშირს სჭირდება გრენლანდია“, – განაცხადა ნილსონმა.ცნობისთვის ევროკავშირის მიერ გამოცხადებული 200-მილიონი ევროს ღირებულების საინვესტიციო პაკეტი სამ ძირითად მიმართულებაზე გადანაწილდება: ციფრული კავშირების განვითარებაზე, მათ შორის წყალქვეშა კაბელებსა და სატელიტურ ინფრასტრუქტურაზე; სუფთა ენერგიაზე, განსაკუთრებული აქცენტით ჰიდროენერგეტიკაზე და კრიტიკული მნიშვნელობის ნედლეულის მდგრად მოპოვებაზე. „ევრონიუსის“ მიხედვით, გრენლანდიაში კრიტიკულად მნიშვნელოვანი 34 მინერალიდან 25 მოიპოვება. ამ მინერალებს ბრიუსელი განახლებადი ენერგიის სისტემებისა და უახლესი ტექნოლოგიების საკუთარი ძალებით განვითარებისთვის კრიტიკულად მნიშვნელოვან რესურსად მიიჩნევს. თუმცა, კუნძულზე სამთო მოპოვების სექტორი ჯერ კიდევ არააა სათანადოდ განვითარებული. მკაცრი კლიმატური პირობების გამო ინვესტორები ძვირადღირებული პროექტების განხორციელებას ერიდებიან.„ევრონიუსი“ ასევე წერს, რომ ევროკომისია მუშაობს არქტიკის სტრატეგიის განახლებაზეც და ევროკავშირის მომდევნო ბიუჯეტის პროექტში გრენლანდიისთვის კონკრეტულად 530 მილიონი ევროს გამოყოფა აქვს გათვალისწინებული.

მსოფლიო • 1788165790

დანია უკრაინელ მამაკაცებს ქვეყანაში ბინადრობის უფლებას აღარ მისცემს

დანიის პარლამენტმა მხარი დაუჭირა კანონპროექტს, რომლის თანახმადაც 23-დან 60 წლამდე უკრაინელ მამაკაცებს ქვეყანაში ბინადრობის უფლება აღარ ექნებათ. ინფორმაციას დანიური მედია ავრცელებს.მედიის ცნობით, ცვლილებები შედის დანიის სპეციალურ კანონში უკრაინელების შესახებ, რომელიც პარლამენტმა ჯერ კიდევ 2022 წელს უკრაინაში რუსეთის შეჭრის შემდეგ მიიღო.„ჩვენს ქვეყანაში ცხოვრების წესები არ არის შექმნილი იმისთვის, რათა ისინი უკრაინის დაცვისთვის საჭირო მობილიზაციისგან თავის ასარიდებლად გამოიყენონ. ეს უკრაინის სამხედრო ძალისხმევას ძირს უთხრის“, - განაცხადა დანიის იმიგრაციისა და ინტეგრაციის მინისტრმა მორტენ ბედსკოვმა.მისი თქმით, დანიის კანონმდებლობამ უნდა უზრუნველყოს ის, რომ უკრაინელებს თავისი ქვეყნის თავისუფლებისთვის ბრძოლის გაგრძელების საშუალება ჰქონდეთ.როგორც მედია იუწყება, 2022 წლის მარტში მიღებული სპეციალური კანონი უფლებას აძლევდა უკრაინის მოქალაქეებს დანიაში სტანდარტული პროცედურების გავლის გარეშე თავშესაფარი მიეღოთ. აღნიშნული წესი ვრცელდებოდა ყველა უკრაინელზე, სქესის, ასაკისა და სამხედრო ვალდებულების მიუხედავად.ახლა, ახალი კანონის მიხედვით, უკრაინელებს, რომელთა ასაკი 23-60 წელია, თავშესაფარს აღარ მისცემენ.

მსოფლიო • 1788080160

ისლანდიამ ევროკავშირში გაწევრიანების შესახებ მოლაპარაკებების დაწყებაზე უარი თქვა - რეფერენდუმის შედეგები ცნობილია

 ისლანდიელებმა ევროკავშირში გაწევრიანებას მხარი არ დაუჭირეს. ამის შესახებ უცხოური მედია წერს. ისლანდიაში 29 აგვისტოს ჩატარებული რეფერენდუმის შედეგები გამოქვეყნდა - ქვეყანამ ევროკავშირში გაწევრიანების შესახებ მოლაპარაკებების დაწყებაზე უარი თქვა. წინასწარი საბოლოო შედეგებით, 52.5%-მა წინადადების წინააღმდეგ მისცა ხმა, ხოლო 47.5%-მა — მხარი დაუჭირა.ისლანდიის მთავრობის ოფიციალური განმარტებით, დადებითი პასუხის შემთხვევაში ბრიუსელთან მოლაპარაკებები ხელახლა დაიწყებოდა, ხოლო საბოლოო წევრობაზე გადაწყვეტილება მოგვიანებით, ცალკე რეფერენდუმით მიიღებოდა.კუნძულოვანმა სახელმწიფომ ევროკავშირში გაწევრიანების განაცხადი ჯერ კიდევ 2009 წელს, ფინანსური კრიზისისა და ისლანდიის საბანკო სისტემის კოლაფსის შემდეგ დაიწყო, თუმცა მოლაპარაკების პროცესი მთავრობამ 2013 წელს შეაჩერა.

მსოფლიო • 1787294814

Financial Times: უკრაინა ილონ მასკს Starlink-ის გამოყენების ნებართვას სთხოვს, რათა რუსულ სარაკეტო დანადგარებს დაარტყას

უკრაინა ცდილობს მიიღოს ნებართვა Starlink-ით აღჭურვილი დრონების გამოყენებაზე რუსული ბალისტიკური სარაკეტო დანადგარების წინააღმდეგ, რუსეთის ტერიტორიის სიღრმეში 200 კილომეტრამდე მანძილზე. ბრიტანული გამოცემა Financial Times-ი, საკუთარ წყაროებზე დაყრდნობით წერს, რომ ამისთვის ილონ მასკის თანხმობა იქნება საჭირო.გამოცემის ინფორმაციით, წლის ბოლომდე უკრაინას რუსული ბალისტიკური რაკეტების ჩამოსაგდებად Patriot-ის სისტემების ასობით რაკეტა დასჭირდება. ამ პრობლემის საპასუხოდ, კიევი გამოსავალს ეძებს და საკუთარ დრონებზე Starlink-ის ინტეგრირების ნებართვას ითხოვს, რათა რუსეთის ტერიტორიაზე არსებულ საკვანძო სამიზნეებს უფრო მაღალი სიზუსტით დაარტყას.Starlink-ის სისტემით აღჭურვილი დრონები SpaceX-ის თანამგზავრულ ქსელს იყენებენ, რაც ოპერატორებთან დიდ მანძილზე ბევრად უფრო სტაბილურ კავშირს უზრუნველყოფს, ვიდრე სტანდარტული რადიოარხები. ამასთან, ისინი ნაკლებად მგრძნობიარენი არიან ჩვეულებრივი რადიოელექტრონული დაბრკოლებებისადმი.აღნიშნულმა დრონებმა უკრაინის ტერიტორიაზე, საბრძოლო მოქმედებებისას, საკუთარი ეფექტიანობა უკვე დაამტკიცეს. ანალიტიკოსების შეფასებით, უკრაინის საზღვრებს მიღმა მათი გამოყენების ნებართვა რუსულ სარაკეტო დანადგარებზე ნადირობის პროცესს მნიშვნელოვნად წაადგება.Financial Times-ის წყაროების ინფორმაციით, თეთრ სახლში ივლისში გამართული შეხვედრისას, უკრაინის პრეზიდენტმა, ვოლოდიმირ ზელენსკიმ დონალდ ტრამპს სთხოვა, ილონ მასკთან ეშუამდგომლა Starlink-ის გამოყენების ნებართვაზე.თუმცა ტრამპს მკაფიო პასუხი არ გაუცია და, ოვალურ კაბინეტში შეხვედრაზე მყოფთა ცნობით, აღნიშნული გეგმა არ მოუწონებია.გამოცემის წყაროები დასძენენ, რომ, მათი შეფასებით, მასკი კიევს ამის ნებართვას არ მისცემს. მანამდე მასკმა მხარი დაუჭირა უკრაინის მიერ Starlink-ის აქტიურ გამოყენებას კავშირგაბმულობისა და თავდაცვითი ოპერაციებისთვის. თუმცა, მან უკრაინულ მხარეს უარი უთხრა სისტემის გამოყენებაზე უშუალოდ რუსეთის ტერიტორიაზე იერიშების მისატანად.

ტაბლოიდი • 1786882950

ქორწილის წინ ჯორჯინას სქელი უწოდეს - ფეხბურთელის პასუხმა კრიტიკოსები გააჩუმა

41 წლის კრიშტიანუ რონალდუ და 32 წლის ჯორჯინა როდრიგესი, რომლებიც 2016 წლის შემდეგ ერთად არიან, 8 აგვისტოს ფეხბურთელის მშობლიურ ქალაქ ფუნშალში დაქორწინდნენ. მას შემდეგ, რაც ჯორჯინამ ოჯახური ფოტო სოციალურ ქსელში გააზიარა, გამომწერებისგან წონის გამო კრიტიკა დაიმსახურა. რონალდუმ საყვარელი ქალი ასე დაამშვიდა: „ულამაზესი ხარ, შესანიშნავი ტანი გაქვს, საუკეთესო დედა ხარ, წარმატებული და სიყვარულით სავსე ადამიანი. მეტი რა უნდა გინდოდეს? ბუნებრივია, როცა შენი შურთ“.ჯორჯინას მხარი დაუჭირა ცნობილმა ტელეწამყვანმა და რონალდუს გულშემატკივარმა პირს მორგანმაც: „დაუჯერებელია, საერთოდ რატომ გიწევს თავის მართლება. ბრწყინვალედ გამოიყურები, კრიშტიანუ კი შენ გვერდით ბედნიერია“.

პოლიტიკა • 1786094680

იუსტიციის მინისტრის მოადგილე თამარ ზოდელავა გაერო-ს გლობალური ღონისძიების თემატურ სესიებში მონაწილეობს

საქართველოს იუსტიციის მინისტრის მოადგილე თამარ ზოდელავა გაერო-ს გლობალური გეოსივრცითი ინფორმაციის მართვის ექსპერტთა კომიტეტის (UN-GGIM) მე-16 სესიის ფარგლებში გამართულ თემატურ სესიებსა და დისკუსიებში მონაწილეობს.სესიის ფარგლებში საქართველომ მხარი დაუჭირა ეფექტიანი მიწის ადმინისტრირების ჩარჩოს (Framework for Effective Land Administration – FELA) შემდგომ განვითარებას, ასევე, ეფექტიანი მიწის ადმინისტრირების ჰაბის შექმნის ინიციატივას, რომელიც მიზნად ისახავს ქვეყნებს შორის ცოდნის, გამოცდილებისა და საუკეთესო პრაქტიკის გაზიარებას და მიწის ადმინისტრირების სისტემების გაძლიერებას.მიწის ადმინისტრირებისა და გეოსივრცითი ინფორმაციის მართვის სფეროში დაგროვილი მნიშვნელოვანი გამოცდილებისა და ექსპერტული ცოდნის საფუძველზე, საქართველომ გამოთქვა მზაობა, შეუერთდეს გაერო-ს ახლად შექმნილ მიწის ადმინისტრირებისა და მართვის ექსპერტთა ჯგუფს (Expert Group on Land Administration and Management – EG-LAM), რომელიც გლობალურ დონეზე მიწის ადმინისტრირების პოლიტიკის, ძირითადი მიდგომებისა და განვითარების პრიორიტეტების ჩამოყალიბებაში მონაწილეობს.ჯგუფში საქართველოს ჩართულობა ქმნის შესაძლებლობას, ქვეყნის გამოცდილება და ექსპერტული ცოდნა გამოყენებულ იქნეს გაერო-ს მდგრადი განვითარების მიზნების მიღწევისა და შემდგომი დღის წესრიგის ფორმირების პროცესში.UN-GGIM-ის მე-16 სესიაში საქართველოს მონაწილეობა კიდევ ერთხელ ადასტურებს ქვეყნის მზარდ როლს მიწის ადმინისტრირებისა და გეოსივრცითი ინფორმაციის მართვის საერთაშორისო პროცესებში, ამასთან, ხელს უწყობს საქართველოს ექსპერტული გამოცდილების საერთაშორისო დონეზე გაზიარებისა და თანამშრომლობის შემდგომი გაღრმავებისთვის.

პოლიტიკა • 1786090985

ირაკლი ზარქუა: ლუზერი სააკაშვილი კიდევ ბედავს და 2008 წლის ომზე ხმას იღებს, რუსების ინტერესებს ატარებდა, სტრატეგიული ობიექტები გადასცა, მსოფლიო სავაჭრო ორგანიზაციაში რუსეთის შესვლას მხარი დაუჭირა

2008 წელს, დაგვჩაგრეს, ტერიტორიები წაგვართვეს, ხალხი დაგვიხოცეს, ამაზე დასავლეთს არც რეაგირება ჰქონია და არც სანქცია დაუწესებია, აქაურებსაც ხმა არ ამოუღიათ, – ამის შესახებ პარლამენტის დიასპორის კომიტეტის თავმჯდომარემ, ირაკლი ზარქუამ განაცხადა.მისი თქმით, მიხეილ სააკაშვილი რუსეთის ინტერესებს ატარებდა.„ლუზერი სააკაშვილი კიდევ რომ ბედავს და 2008 წლის ომზე ხმას იღებს. თავისი პროვოკაციული განცხადებებით და მოქმედებებით ომის ესკალაცია განაპირობა. იცით, ტალიავინის დასკვნაში რაც წერია. ევროპის რეზოლუციას თავადაც დაუჭირეს მხარი. რას არ მიაღწია რუსეთმა? – სტამბოლის ხელშეკრულება არსებობდა, რომლითაც რუსეთს აფხაზეთიდან და ცხინვალიდან თავისი ჯარები და ბაზები უნდა გაეყვანა. ეს პროცესი დაიწყო. სააკაშვილს რუსეთთან ერთად საქართველოს წინააღმდეგ შეთქმულება რომ არ მოეწყო – რა მოჰყვა ამას, რუსეთმა აფხაზეთსა და ე.წ. სამხრეთ ოსეთში პოზიციები უფრო გაიმყარა და კონტინგენტი გაზარდა. რას არ მიაღწია რუსეთმა? – ყველაფერი მიიღო, რაც უნდოდა, ასობით სოფელი და ოკუპაციის ხაზი გაავლო. აბა, ერთი თქვას, დასავლეთიდან რუსეთს სანქცია ვინ დაუწესა საქართველოსთან ომის გამო? – პირიქით, გადატვირთვის პოლიტიკა დაიწყეს, თითქოს რუსეთს საქართველოს ტერიტორიები არ წაუღია, არ ამოუხოცია ჯარისკაცები, არ უქცევია დევნილად ათასობით ადამიანი.2009 წელს ურთიერთობა რუსეთთან გადატვირთეს და ვითომ არაფერი. ახლა ეს საზოგადოება უკრაინაზეა გადართული და პატრიოტობას იქ აწვება. როცა 2008 წელს, დაგვჩაგრეს, ტერიტორიები წაგვართვეს, ხალხი დაგვიხოცეს, ამაზე დასავლეთს არც რეაგირება ჰქონია და არც სანქცია დაუწესებია. აქაურებსაც ხმა არ ამოუღიათ, პირიქით, რუს ტურისტებს საქართველოში ეპატიჟებოდნენ. სააკაშვილი აქ არავის სჭირდებოდა, პირიქით, მისი აქ ყოფნით რუსების ინტერესებს ატარებდა – სტრატეგიული ობიექტები გადასცა, მსოფლიო სავაჭრო ორგანიზაციაში რუსეთის შესვლას მხარი დაუჭირა, მეტი რა უნდოდათ რუსებს, რასაც საქართველოში სააკაშვილი აკეთებდა? – ვიცით, რას წარმოადგენდა სააკაშვილი და მისი ხროვა“, – განაცხადა ზარქუამ.ცნობისთვის, საქართველოს ყოფილმა პრეზიდენტმა, მიხეილ სააკაშვილმა სოციალურ ქსელში დაწერა: „არ მივატოვე ხალხი განსაცდელში, ფეხზე დავაყენე საქართველო, მთელი დემოკრატიული სამყარო და ქვეყანა გადავარჩინეთ იმას, რომ რუსეთმა ვერ მიაღწია იმ ომის ვერცერთ სტრატეგიულ მიზანს“.

პოლიტიკა • 1786090906

ირაკლი ზარქუა: ბარამიძის განცხადება არის ქვეყნის, ჯარის, ხალხის მტრობა, ვფიქრობ, ამაზე შესაბამისი სტრუქტურები რეაგირებას მოახდნენ

ბარამიძე არის შტერი, ამ ადამიანის განცხადებაზე სერიოზულად როგორ უნდა ვისაუბროთ, გონებაშეზღუდულია. სიგიჟე თქვა, იმის ნაცვლად, ამ სისულელის გამო ბოდიში მოეხადა, უფრო უარესი თქვა, ტყვეებს არა მხოლოდ ჯარისკაცები ხვრეტდნენ, არამედ მოსახლეობაცო, – ამის შესახებ პარლამენტის დიასპორის კომიტეტის თავმჯდომარემ, ირაკლი ზარქუამ განაცხადა.მისი თქმით, ამას ქართველ ერზე ამბობს, რომელსაც მსოფლიოსთვის ვაჟკაცობის არაერთი მაგალითი მიუცია.„ეს თქვა სააკაშვილის თავდაცვის მინისტრმა. აი, ასეთი ლაჩრები ჰყავდა და ამ ლაჩრებით ქართველი ხალხის დაჩაგვრა უნდოდა. არ გამოვრიცხავ, ეს შორს მიმავალი განცხადება იყოს, რომ მტრებს საშუალება მისცეს, თუ დასჭირდათ, საერთაშორისო არენაზე, საქართველოს წინააღმდეგ თავდაცვის ყოფილი მინისტრის ეს განცხადება გამოიყენონ. არ ვიცი, მსგავსი სიშლეგე. იმის ნაცვლად, ბოდიში მოეხადა და ეთქვა, სხვა რამეს ვგულისხმობდიო, უარესი თქვა, ტყვეებს მოხალისეებიც არ ინდობდნენო. მისი განცხადება მტრული დამოკიდებულებაა საკუთარი ხალხისა და სახელმწიფოს მიმართ. ახლაც მავნებლობას აგრძელებენ, რომ ქვეყანა გააშავონ და მტერს საშუალება მისცენ, ქვეყნის წინააღმდეგ რაღაც არგუმენტები ჰქონდეთ. სააკაშვილი და მისი გუნდი მეხუთე კოლონაა. ეს ხალხი აგენტურაა, რომელიც საქართველოს წინააღმდეგ ხან ერთ, ხან მეორე სახელმწიფოს ემსახურებოდა. ბარამიძემ საქართველოს „ესენგეში“ შესვლას და იქ დარჩენას მხარი დაუჭირა. ბარამიძე ლაჩარი, რიგითი ქართველია, რომელსაც ქვეყნის წინააღმდეგ არაერთი საქმე ჩაუდენია. სვანეთში მის მიერ დატრიალებული ტრაგედიები გახსოვთ?  რუსებზე აღტაცებული საუბრობს, დისციპლინირებული ხალხი იყვნენ, თურმე, ისინი ტყვეებს კეთილშობილებით ექცეოდნენ და ჩვენ ვხვრეტდით. ეს ნაგვები გამოდიან და ამბობენ, რომ საქართველოს ინტერესებს იცავენ. დარწმუნებული ვარ, ამ განცხადებაზე რეაგირება იქნება, რადგან არ შეიძლება, რეაგირების გარეშე დავტოვოთ. ეს არის მტრობა საკუთარი ქვეყნის, ჯარის, ხალხის. მგონია, რომ ამაზე შესაბამისი სტრუქტურები რეაგირებას მოახდნენ“, – განაცხადა ირაკლი ზარქუამ.

მსოფლიო • 1785430034

„მსოფლიო ჩემპიონატი არ შეიძლება განხილული იყოს, როგორც საინვესტიციო პროდუქტი“ - UEFA-მ მხარი დაუჭირა მომავალი მსოფლიო ჩემპიონატების ბოიკოტირებას, აღნიშნული გადაწყვეტილება მოჰყვა FIFA-ს ინიციატივას, რომლის მიხედვითაც, მის ეგიდით გამართულ შეჯიბრებებში კერძო ინვესტიციების ჩართვა იგეგმება

UEFA-მ, ევროპული ფეხბურთის მმართველმა ორგანომ, ხუთშაბათს მხარი დაუჭირა მომავალი მსოფლიო ჩემპიონატების ბოიკოტირებას როგორც კაცების, ისე ქალების ტურნირებში. აღნიშნული გადაწყვეტილება მოჰყვა FIFA-ს ინიციატივას, რომლის მიხედვითაც, მის ეგიდით გამართულ შეჯიბრებებში კერძო ინვესტიციების ჩართვა იგეგმება.55 წევრი ასოციაციის საგანგებო შეხვედრის შემდეგ გავრცელებულ განცხადებაში UEFA-მ აღნიშნა, რომ მსოფლიო ჩემპიონატი „არ შეიძლება განხილული იყოს, როგორც საინვესტიციო პროდუქტი“.„მსოფლიოს ეროვნული ასოციაციების წინაშე დღეს ულტიმატუმი დგას: ან დათანხმდნენ საფეხბურთო სამყაროს უმნიშვნელოვანესი ჩემპიონატების შეუქცევად მიტაცებას, ან იკისრონ პასუხისმგებლობა მოსალოდნელ შედეგებზე“, - ნათქვამია განცხადებაში.UEFA-მ დასძინა, რომ მისი წევრი ასოციაციების არცერთი ეროვნული ნაკრები არ მიიღებს მონაწილეობას FIFA-ს არცერთ ტურნირში „მანამ, სანამ ეს წინადადებები ძალაში რჩება“, თუ FIFA მთლიანად არ იტყვის უარს ამ გეგმაზე და „არ მოგვაწოდებს სავალდებულო გარანტიებს იმისა, რომ საკუთარ მართვასა თუ ჩემპიონატებს კერძო მფლობელობისთვის აღარასდროს გახსნის“.

მსოფლიო • 1785308442

აშშ-ის სენატმა პროცედურულ კენჭისყრაზე რუსეთისა და ირანის წინააღმდეგ სანქციების შემოღებას მხარი დაუჭირა

აშშ-ის სენატმა იშვიათი ორპარტიული მხარდაჭერით მხარი დაუჭირა კანონპროექტს, რომელიც რუსეთისა და რუსული ნავთობისა და გაზის მყიდველების წინააღმდეგ უფრო მკაცრი სანქციების დაწესებას, ასევე ირანის მიმართ უკვე არსებული სანქციების გაფართოებას ითვალისწინებს. ინფორმაციას The Hill-ი ავრცელებს.გამოცემის ცნობით, ინიციატივის მიზანია, მიმდინარე სამხედრო კონფლიქტების ფონზე, ეკონომიკური ზეწოლა გააძლიეროს ორივე ქვეყანაზე.კანონპროექტი მისი თანაავტორის, გარდაცვლილი რესპუბლიკელი სენატორის ლინდსი გრემის სახელს ატარებს. დოკუმენტი უკვე წელიწადზე მეტია ორივე პარტიის წარმომადგენლების ფართო მხარდაჭერით სარგებლობს, როგორც უკრაინაში ომის გამო რუსეთის დამატებით სადამსჯელო მექანიზმი.როგორც გამოცემა იუწყება, აშშ-ის პრეზიდენტმა დონალდ ტრამპმა კანონპროექტის ერთ-ერთ ვერსიას მხოლოდ ცოტა ხნის წინ დაუჭირა მხარი და მოითხოვა, რომ მასში ირანის წინააღმდეგ სანქციების გამკაცრებაც შესულიყო.პროცედურულ კენჭისყრაზე კანონპროექტს მხარი 86-მა სენატორმა დაუჭირა, წინააღმდეგ კი 12 წავიდა.კანონპროექტის მიხედვით, სანქციები შეეხება რუსეთის ოფიციალურ პირებს, ოლიგარქებს, მათი ოჯახის წევრებს, უკრაინის წინააღმდეგ რუსეთის მოქმედებების მხარდამჭერ სხვა პირებს, ასევე ბანკებს, საფინანსო ინსტიტუტებსა და რუსეთის ე.წ. ჩრდილოვან ფლოტს - გემების ფარულ ქსელს, რომელსაც მოსკოვი ნედლი ნავთობის გადასაზიდად და სანქციებისთვის გვერდის ასავლელად იყენებს.დოკუმენტი ასევე პრეზიდენტ დონალდ ტრამპს უფლებას აძლევს მიზნობრივი ტარიფები დააწესოს იმ ხუთი უმსხვილესი ქვეყნის იმპორტზე, რომლებიც რუსული ნავთობისა და გაზის ყველაზე დიდი მყიდველები არიან, მათ შორის ჩინეთზე, ასევე იმ ხუთი ქვეყნის მიმართ, რომლებიც რუსეთს ნავთობის სანქციებისთვის გვერდის ავლაში ეხმარებიან.კანონპროექტში დამატებული ახალი დებულება ირანის საფინანსო და შეიარაღების ინდუსტრიის წინააღმდეგ სანქციების მოქმედებასაც ახანგრძლივებს. აღნიშნული სასანქციო მექანიზმი 1996 წელს ამოქმედდა და მისი ვადა მიმდინარე წლის ბოლოს იწურებოდა.

მსოფლიო • 1785227812

გაერო-ს უშიშროების საბჭოს სესიაზე საფრანგეთის წარმომადგენლის სიტყვით გამოსვლისას, აშშ-ის დელეგაციამ პროტესტის ნიშნად დარბაზი დატოვა

შეერთებული შტატების დელეგაციამ გაერო-ს უშიშროების საბჭოს სესია პროტესტის ნიშნად იმ დროს დატოვა, როდესაც სიტყვით საფრანგეთის წარმომადგენელი გამოდიოდა. აშშ-ის პროტესტი უკავშირდება ფრანგი დიპლომატების გამონათქვამებს, რომლებმაც შეერთებული შტატები ადამიანის უფლებებთან დაკავშირებულ საკითხების გამო გააკრიტიკეს. ამის შესახებ ინფორმაციას „ესოშიეთიდ პრესი“ ავრცელებს.მედიის ინფორმაციით, დიპლომატების მიერ კრიტიკული მოსაზრებების გაცვლა გაერო-ს ადამიანის უფლებათა უმაღლეს კომისრად ვოლკერ ტურკის ხელახალ დანიშვნას მოჰყვა.ცნობისთვის, 24 ივლისს გაერო-ს გენერალურმა ასამბლეამ ტურკი ოთხწლიანი ვადით ხელახალ დანიშვნას მხარი დაუჭირა. ტურკს წევრი ქვეყნების უმრავლესობის, მათ შორის საფრანგეთის მხარდაჭერა ჰქონდა, თუმცა შეერთებული შტატები ამ გადაწყვეტილებას ეწინააღმდეგებოდა. კენჭისყრის შემდეგ გაერო-ში საფრანგეთის წარმომადგენლობამ სოციალურ ქსელ X-ში გამოაქვეყნა განცხადება, რომელშიც ვაშინგტონის პოზიცია გააკრიტიკა.„აშშ ოდესღაც ადამიანის უფლებების დაცვის შუქურა იყო. ახლა ასე აღარ არის. დღესამერიკა ჩრდილოეთ კორეის, ნიკარაგუის, მალისა და რუსეთის გვერდით აღმოჩნდა იზოლაციაში და მსოფლიო მას აღარ უსმენს“, – ნათქვამია განცხადებაში.საპასუხოდ გაერო-ში აშშ-ის ელჩმა, მაიკ უოლცმა განაცხადა, რომ საფრანგეთი მხარს უჭერს „ადამიანის უფლებების ყველაზე მძიმე დამრღვევებს“ და ხმას აძლევს ადამიანს, რომელიც თავისუფალ და სუვერენულ დემოკრატიებს, მათ შორის შეერთებულ შტატებს, დიდ ბრიტანეთსა და ისრაელს „ლექციებს უკითხავს“.