მელია

აკადემიკოსი ვალერი ასათიანი: პატრიარქი დაიღალა საქართველოს სიყვარულში და მან ეს „დავიღალე“ არაჩვეულებრივ საგალობელში გამოხატა, რომელიც შეუძლებელია, ადამიანმა ცრემლის გარეშე მოისმინო

მან გააძლიერა დღევანდელი საქართველო. თითქოს, სულ სხვა ცხოვრება იწყება საქართველოში, - განაცხადა გადაცემაში „დღის ქრონიკა“ აკადემიკოსმა, ვალერი ასათიანმა კათოლიკოს-პატრიარქ ილია მეორეზე საუბრისას.მისივე თქმით, იგი საყოველთაო სიმშვიდეს ამკვიდრებდა და ეს სიმშვიდე გადასცა თაობებს.„არ შეიძლება მღელვარების გარეშე უყურებდე იმას, რაც ხდება დღევანდელ საქართველოში - ახალგაზრდობა, მის მიერ მონათლული ათასობით ახალგაზრდა, ბავშვები, როგორ მსჯელობენ, როგორ საუბრობენ! მან გააძლიერა დღევანდელი საქართველო. თითქოს, სულ სხვა ცხოვრება იწყება საქართველოში. ყვავილების ეს მდინარე, აურაცხელი ხალხი, საოცარი სიფაქიზით, სიყვარულითა და მადლიერებით განმსჭვალული სიტყვები! არ ვიცი, ყოველ შემთხვევაში ჩემი თაობა არ მოსწრებია ადამიანის მიმართ მადლიერების, სიყვარულისა და თაყვანისცემის ასეთ გამოხატვას! ძალიან ბევრი შეიძლება, რომ ვისაუბროთ“, - აღნიშნა აკადემიკოსმა.ვალერი ასათიანის თქმით, პატრიარქის სამძიმარზე მისული ადამიანების უწყვეტი ნაკადი ბევრის მთქმელია, რომ ერს აქვს თავისი ხმა.„ერს აქვს თავისი ხმა, რომ ერს შეუძლია იყოს ერთიანი, გამოიჩინოს სიმტკიცე, გამოხატოს სიყვარული, რომელსაც ქადაგებდა პატრიარქი და იაროს სწორი გზით. პატრიარქი სულ ცდილობდა, რომ სწორი გზა ეჩვენებინა. მოგეხსენებათ, ის თავის მოღვაწეობას აფასებდა, როგორც მზიან ღამეს. ახლა არ შემიძლია, ლადო ასათიანი არ გავიხსენო - „დავიღლები საქართველოს სიყვარულში, სასთუმალზე ერთხელაც არ დავიძინებ“. აი, პატრიარქი დაიღალა საქართველოს სიყვარულში და მან ეს „დავიღალე“ არაჩვეულებრივ საგალობელში გამოხატა, რომელიც შეუძლებელია, ადამიანმა ცრემლის გარეშე მოისმინო“, - აღნიშნა აკადემიკოსმა, ვალერი ასათიანმა.

საზოგადოება • 1773862320

პაატა სალია: საქართველო ემშვიდობება სულიერ წინამძღვარს, რომლის ღვაწლი განუზომელია და რომლის ხსოვნა განუყოფლად დარჩება ჩვენი ქვეყნის ისტორიასა და თითოეული ადამიანის გულში

საქართველო ემშვიდობება სულიერ წინამძღვარს, რომლის ღვაწლი განუზომელია და რომლის ხსოვნა განუყოფლად დარჩება ჩვენი ქვეყნის ისტორიასა და თითოეული ადამიანის გულში, - წერს სოციალურ ქსელში საქართველოს იუსტიციის მინისტრი პაატა სალია.როგორც ის აღნიშნავს, პატრიარქის წინამძღოლობით საქართველოს მართლმადიდებელმა ეკლესიამ შეასრულა განსაკუთრებული მისია საზოგადოების სულიერი კონსოლიდაციის პროცესში.„საქართველოს იუსტიციის სამინისტრო ღრმა მწუხარებას გამოხატავს სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის, ილია II-ის გარდაცვალების გამო.ნახევარი საუკუნის განმავლობაში ილია II იყო ქართველი ერის სულიერი მამა და ერთიანობის სიმბოლო. ქარტეხილებით სავსე ეპოქაში, როდესაც საზოგადოებას განსაკუთრებით სჭირდებოდა სიმტკიცე, იმედი და ზნეობრივი საყრდენი, პატრიარქმა მნიშვნელოვანი როლი შეასრულა რწმენის აღორძინებასა და ერის სულიერ გამთლიანებაში.მისი წინამძღოლობით საქართველოს მართლმადიდებელმა ეკლესიამ შეასრულა განსაკუთრებული მისია საზოგადოების სულიერი კონსოლიდაციის პროცესში და იქცა იმ საყრდენად, რომელმაც განსაცდელის წლებში გააძლიერა რწმენა, შეინარჩუნა ზნეობრივი საფუძვლები და გააერთიანა საზოგადოება საერთო ღირებულებების გარშემო.საქართველო ემშვიდობება სულიერ წინამძღვარს, რომლის ღვაწლი განუზომელია და რომლის ხსოვნა განუყოფლად დარჩება ჩვენი ქვეყნის ისტორიასა და თითოეული ადამიანის გულში.ვუსამძიმრებთ საქართველოს მართლმადიდებელ ეკლესიას, სასულიერო პირებს, საქართველოს თითოეულ მოქალაქეს და მთელ ქრისტიანულ სამყაროს.საუკუნოდ იყოს მისი ხსოვნა“, - წერს პაატა სალია.

პოლიტიკა • 1773835696

პატრიარქმა უდიდესი როლი შეასრულა საქართველოს სულიერი ერთიანობის, რწმენის განმტკიცებისა და ეროვნული ღირებულებების შენარჩუნებაში - სულხან თამაზაშვილი

უწმინდესი ათწლეულების განმავლობაში იყო ჩვენი ქვეყნის და თითოეული ჩვენგანის სულიერი საყრდენი, - აღნიშნულია აჭარის მთავრობის თავმჯდომარის განცხადებაში.მისი თქმით უწმინდესის ღვაწლი ეკლესიისა და ქვეყნის წინაშე განუზომელია.,,უდიდესი დანაკლისი განიცადა ჩვენმა ქვეყანამ საქართველოს კათოლიკოს-პატრიარქის, უწმინდესისა და უნეტარესის ილია II-ის გარდაცვალების გამო.უწმინდესი ათწლეულების განმავლობაში იყო ჩვენი ქვეყნის და თითოეული ჩვენგანის სულიერი საყრდენი. მან უდიდესი როლი შეასრულა საქართველოს სულიერი ერთიანობის, რწმენის განმტკიცებისა და ეროვნული ღირებულებების შენარჩუნებაში. მისი ღვაწლი განუზომელია, როგორც ეკლესიის, ისე ქვეყნის წინაშე.ვუსამძიმრებ სრულიად საქართველოს, ჩვენს ეკლესიას, მრევლს და ყველა მართლმადიდებელ ქრისტიანს ამ უმძიმეს დანაკლისს.საქართველოს კათოლიკოს-პატრიარქის, უწმინდესისა და უნეტარესის ილია II-ის ნათელი ხსოვნა მარადიულად დარჩება ჩვენს გულებში,” - აღნიშნულია სულხან თამაზაშვილის განცხადებაში.

საზოგადოება • 1773823925

ჯვარი-მესტიის მონაკვეთზე ავტოტრანსპორტის მოძრაობა აღდგა

საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის კმ29-კმ138 (ჯვარი-მესტია) მონაკვეთზე ავტოტრანსპორტის მოძრაობა აღდგენილია. აღნიშნული გზის კმ138-კმ185 (მესტია-უშგული) მონაკვეთზე აკრძალულია მისაბმელიანი, ნახევრადმისაბმელიანი ავტოტრანსპორტის და M3 კატეგორიის (გააჩნია 8-ზე მეტი დასაჯდომი ადგილი (მძღოლის ადგილის გარდა) და აქვს 5 ტონაზე მეტი სრული მასა) მგზავრთა გადასაყვანად განკუთვნილი ავტოსატრანსპორტო საშუალებების მოძრაობა, ხოლო დანარჩენი სახის ავტოტრანსპორტის მოძრაობა თავისუფალია.საავტომობილო გზის კმ1-კმ138 (ზუგდიდი-მესტია) მონაკვეთზე ავტოტრანსპორტის მოძრაობა თავისუფალია.

საზოგადოება • 1773820714

რელიგიის საკითხთა სახელმწიფო სააგენტო - ვუსამძიმრებთ სრულიად საქართველოს პატრიარქის გარდაცვალებას, რომელმაც უდიდესი კვალი დატოვა საქართველოს უახლეს ისტორიაში

რელიგიის საკითხთა სახელმწიფო სააგენტო უსამძიმრებს საქართველოს სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის, ილია მეორის გარდაცვალების გამო.როგორც განცხადებაშია აღნიშნული, განუზომელია პატრიარქის წვლილი საქართველოს ეკლესიის ავტოკეფალიის აღდგენაში.„რელიგიის საკითხთა სახელმწიფო სააგენტო უსამძიმრებს საქართველოს სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის, ილია მეორის გარდაცვალების გამო. საქართველოს პატრიარქი არამხოლოდ მართლმადიდებელ ქართველთა სულიერი მამა, არამედ საქართველოს ყველა მოქალაქეზე მლოცველი იყო, ამიტომაც სარგებლობდა უპირატესი ავტორიტეტითა და სიყვარულით. საქართველოს პატრიარქი განსაკუთრებული პატივისცემით სარგებლობდა ქრისტიანულ სამყაროში. მას მოღვაწეობა ურთულეს პერიოდში მოუხდა, განუზომელია პატრიარქის წვლილი საქართველოს ეკლესიის ავტოკეფალიის აღდგენაში, დამოუკიდებელი საქართველოს ისტორიაში. ბოლო ნახევარი საუკუნის მანძილზე, პატრიარქი ყველა მნიშვნელოვანი მოვლენის აქტიური მონაწილე და ხშირად, შემოქმედიც იყო. კიდევ ერთხელ ვუსამძიმრებთ სრულიად საქართველოს პატრიარქის გარდაცვალებას, რომელმაც უდიდესი კვალი დატოვა საქართველოს უახლეს ისტორიაში. დიდი პატრიარქის ეპოქა დასრულდა“,-აღნიშნულია განცხადებაში.ცნობისთვის, სრულიად საქართველოს კათოლიკოს-პატრიარქი, უწმინდესი და უნეტარესი ილია II 93 წლის ასაკში გარდაიცვალა. ილია მეორისგარდაცვალებასთან დაკავშირებით, საქართველოში გლოვა გამოცხადდა.

საზოგადოება • 1773817583

ეპისკოპოსი საბა ინწკირველი: ვუსამძიმრებ ქართველ ერს, პატრიარქის გარდაცვალება დიდი დანაკლისია არა მხოლოდ საქართველოს ეკლესიისთვის, არამედ მთელი ქართველი ერისთვის

ჩრდილოეთ ამერიკის ეპისკოპოსი საბა ინწკირველი სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის გარდაცვალების გამო მწუხარებას გამოთქვამს და ქართველ ხალხს უსამძიმრებს.„სამშობლოდან შორს მყოფმა ღრმა მწუხარებით შევიტყვე სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის გარდაცვალების შესახებ. ეს არის დიდი დანაკლისი არა მხოლოდ საქართველოს ეკლესიისთვის, არამედ მთელი ქართველი ერისთვის.მისი უწმინდესობა მრავალი ათწლეულის განმავლობაში იყო ჩვენი სულიერი მამა, მოძღვარი და მაგალითი. ურთულეს ისტორიულ პერიოდში მან ღირსეულად იტვირთა ეკლესიის საჭეთმპყრობლის მძიმე ჯვარი და სიბრძნით, სიმშვიდითა და სიყვარულით გაუძღვა საქართველოს ეკლესიას.მისი მსახურება იყო სავსე ქრისტიანული თავმდაბლობით, ლოცვითა და სამშობლოსადმი უსაზღვრო სიყვარულით. პატრიარქ ილია II-ის ღვაწლი განუზომელია: მისი ლოცვითა და ძალისხმევით განმტკიცდა ეკლესიის ერთობა, აღდგა მრავალი ტაძარი და მონასტერი, გაძლიერდა სულიერი ცხოვრება არა მხოლოდ საქართველოში არამედ ემიგრაციაში, მრავალმა ადამიანმა კვლავ იპოვა გზა ეკლესიისკენ.იგი დარჩება ქართველთა მეხსიერებაში როგორც მამობრივი სიყვარულით აღსავსე პატრიარქი, რომელმაც თავისი ცხოვრება მიუძღვნა ღმერთსა და ერს. ვმადლობ უფალს იმისთვის, რომ ჩვენს თაობას მიეცა შესაძლებლობა ეცხოვრა და ემსახურა ასეთ დიდ სულიერ მამასთან ერთად.ვუსამძიმრებ საქართველოს ეკლესიას, სამღვდელოებასა და მთელ ქართველ ერს ამ დიდ მწუხარებას. უფალმა დაამკვიდროს მისი ნეტარი სული ცათა სასუფეველში და მარადიული ხსენება დაუმკვიდროს მას. თქვენო უწმინდესობავ შევთხოვ უფალს თავის მარადიულ სასუფეველში დაგამკვიდროთ! ერთგულებით და სიყვარულით + ეპ.საბა“, - წერს სასულიერო პირი სოციალურ ქსელში.

საზოგადოება • 1773779630

გიორგი ჯინჭარაძე: პატრიარქი ყოველთვის იყო ჩვენი კუთხის დიდი გულშემატკივარი, განსაკუთრებულია მისი ღვაწლი აფხაზეთის მიმართ

განუზომელია ის ტკივილი და დანაკლისი, რომელსაც დღეს მთელი საქართველო განიცდის. მარადისობაში გადავიდა ეპოქალური მნიშვნელობის ფიგურა, სრულიად საქართველოს კათოლიკოს-პატრიარქი, რომლის სახელიც განუყოფელია ჩვენი ერის სულიერი აღორძინებისა და სახელმწიფოებრივი თვითმყოფადობისგან, - წერს აფხაზეთის მთავრობის თავმჯდომარე გიორგი ჯინჭარაძე ფეისბუქის ოფიციალურ გვერდზე.მისივე თქმით, პატრიარქი ყოველთვის იყო აფხაზეთის გულშემატკივარი."მის უწმინდესობას უდიდესი წვლილი მიუძღვის საქართველოს ეკლესიის ავტოკეფალიის საერთაშორისო აღიარების საქმეში, რითაც მან ჩვენს ქვეყანას დაუბრუნა მისი კუთვნილი, საპატიო ადგილი მსოფლიო მართლმადიდებელ სამყაროში.განსაკუთრებულია მისი ღვაწლი აფხაზეთის მიმართ. პატრიარქი ყოველთვის იყო ჩვენი კუთხის დიდი გულშემატკივარი. სწორედ მან დააწესა „აფხაზეთობის“ დღესასწაული, რითაც კიდევ ერთხელ გაუსვა ხაზი ქართველთა და აფხაზთა განუყოფელ სულიერ და ისტორიულ ერთობას. მისი მოღვაწეობა აფხაზეთში, როგორც ცხუმ-აფხაზეთის მიტროპოლიტის, დარჩება იმედისა და სიყვარულის სიმბოლოდ, რომელიც ათწლეულების განმავლობაში ათბობდა დევნილთა და აფხაზეთში მცხოვრებთა გულებს.ამ უმძიმეს წუთებში, აფხაზეთის ავტონომიური რესპუბლიკის მთავრობის სახელით, ვუერთდები სრულიად საქართველოს გლოვას. დარწმუნებული ვარ, მისი ლოცვა და კურთხევა კვლავაც იქნება ჩვენი ერის მფარველი მშვიდობისა და ქვეყნის გამთლიანების გზაზე.უფალმა დაუმკვიდროს ცათა სასუფეველი მის ნათელ სულს!“ - წერს გიორგი ჯინჭარაძე.93 წლის ასაკში საქართველოს კათოლიკოს-პატრიარქი ილია მეორე გარდაიცვალა.

პოლიტიკა • 1773748487

შალვა პაპუაშვილი ფრაქცია „საქართველოსთვის“ წევრებს - როდესაც მნიშვნელოვანი საკითხებია გადასაწყვეტი რატომ დგებით უცხოელების მხარეს და არა თქვენი ქვეყნის მხარეს?

„როდესაც მნიშვნელოვანი საკითხებია გადასაწყვეტი რატომ დგებით უცხოელების მხარეს და არა თქვენი ქვეყნის მხარეს?“- ასე მიმართა პარლამენტის თავმჯდომარემ შალვა პაპუაშვილმა ფრაქცია „საქართველოსთვის“ თავმჯდომარეს შალვა კერესელიძეს პარლამენტის პლენარულ სხდომაზე.„კორუფციაზე ბევრი ისაუბრეთ, მაგრამ გუშინ თქვენი პარტიის წარმომადგენელი პრემიერ-მინისტრთან და მთავრობის ადმინისტრაციის ხელმძღვანელთან ერთად ღია დებატებში იყო და ყველამ ნახა, რომ რეალურად პრეტენზიები იმ ანტიკორუფციული პოლიტიკის მიმართ, რომელიც ქვეყნის პრემიერ-მინისტრს აქვს, არ არსებობს. ჩემი სურვილი იქნებოდა თუკი თქვენ მართლა გულწრფელად ხართ ამ საკითხით დაინტერესებული, ვიყოთ ამ მთავრობის, პრემიერ-მინისტრის გულშემატკივრები“, - განაცხადა შალვა პაპუაშვილმა.პარლამენტის თავმჯდომარე ოჯახური ღირებულებების შესახებ კანონთან დაკავშირებულ საკითხსაც შეეხო და ოპოზიციონერ კოლეგებს საკუთარი პოზიციის დაფიქსირებისკენ მოუწოდა.„ოჯახურ ღირებულებებს შეეხეთ და ცოტა გამიკვირდა თქვენი განცხადება, რომ თითქოს იზიარებთ და ეთანხმებით ამ კანონს. მგონი თქვენ ფრაქციას ოჯახური ღირებულებების შესახებ კანონისთვის მხარი არ დაგიჭერიათ და ახლა აქ გულში მჯიღის ცემა, რომ თქვენ ხართ ოჯახის ყველაზე დიდი დამცველები, არასწორია. სწორედ აქ არის საჭირო კონსოლიდაცია. როდესაც მნიშვნელოვანი საკითხებია გადასაწყვეტი რაღა უცხოელების მხარეს დგებით და არა თქვენი ქვეყნის მხარეს? თუნდაც მაშინ, როდესაც სანქციების საკითხი იდგა და მიტინგები იმართებოდა უკრაინაში ჯარის გაშვების და საზღვრების ჩაკეტვის მოთხოვნით, მაშინ რატომ არ იღებდით ხმას და არ იყავით საქართველოს მხარეს, არა საქართველოს ხელისუფლების, არამედ საქართველოს მხარეს? იგივე მინდა ვიკითხო ოჯახური ღირებულებების შესახებ კანონზე - არ ვიცი რა უთხარით ეუთო-ს ეგიდით ჩამოსულ პოლონელ ექსპერტს, რომელსაც ეს საკითხი განსაკუთრებით აინტერესებდა და მოგვახსენა კიდეც თავის ანგარიშში, რომ ეს კანონი გავაუქმოთ. თქვით ხმამაღლა, რომ თქვენ ეწინააღმდეგებით ამ კანონის გაუქმებას.რაც შეეხება თქვენი გამოსვლის იმ ნაწილს, რომელიც დამნაშავეთა შეწყალებას და გამოშვებას შეეხება. არ ვიცი, ეს გიორგი გახარიას მხრიდან მიტევების აქტი იყო თუ არა, როდესაც მან უარი თქვა საქართველოს კანონის აღსრულებაზე და ნიკა მელიას დაკავებაზე, ალბათ მაშინაც ასე უხსნიდა მას იმ კონკრეტული ქვეყნის ელჩი, რომ „მიუტევე“, „მნიშვნელოვანია სამოქალაქო მშვიდობა“ და ასე შემდეგ და რა მოგვიტანა ასეთმა მიდგომებმა, როდესაც სხვების კარნახით ასეთი გადაწყვეტილებების მიღება ხდება, ძალიან კარგად ვნახეთ. თქვენ საუბრობთ სამოქალაქო მშვიდობაზე და რა თქმა უნდა, ეს არის დიდი ღირებულება და ფასეულობა, მაგრამ ეს კანონზე, დანაშაულზე და კონსტიტუციის დარღვევაზე თვალის დახუჭვით არ მიიღწევა. პირიქით, სამოქალაქო მშვიდობას სამართლებრივი ჩარჩო, კონსტიტუციის, კანონების მიმართ მორჩილება უზრუნველყოფს. სამართლის უზენაესობა არის ერთ-ერთი წინაპირობაა, რომ საზოგადოებაში სამოქალაქო მშვიდობა არსებობდეს. ყველა უნდა ემორჩილებოდეს კანონს და არა პირიქით, განსაკუთრებით მაშინ, როდესაც უმცირესობა ცდილობს უმრავლესობას თავს მოახვიოს საკუთარი დღის წესრიგი“, - განაცხადა შალვა პაპუაშვილმა.

პოლიტიკა • 1773746405

დღეს ბურთი ბრიუსელის მოედანზეა, მათ გააფუჭეს ეს ურთიერთობა - შალვა პაპუაშვილი

„დღეს ბურთი ბრიუსელის მოედანზეა, მათ გააფუჭეს ეს ურთიერთობა. ჩვენ არაფერს ვიშურებდით, მათ შორის, დიდი ხანი ვითმენდით რაღაცეებს, არ ვპასუხობდით, მაგრამ როდესაც არის ცალმხრივი თავდასხმები, როდესაც ამ თავდასხმას წინასწარ განზრახული მიზნები აქვს იმისთვის, რომ შეარყიონ საქართველოში დემოკრატია და ხელისუფლების მიმართ ნდობა, რა თქმა უნდა, ამას მოჰყვება პასუხები როგორც აქამდე, ისე მომავალშიც“, - განაცხადა პარლამენტის თავმჯდომარე შალვა პაპუაშვილმა პარლამენტის საქმიანობის ყოველწლიური ანგარიშის წარდგენის შემდეგ ფრაქცია „საქართველოსთვის“ წევრის, გიორგი შარაშიძის მიერ დასმული კითხვის პასუხად.შალვა პაპუაშვილის განცხადებით, პარლამენტის თავმჯდომარედ არჩევის შემდეგ ბევრი ვიზიტი განახორციელა ევროპულ ქვეყნებში, მათ შორის, კანდიდატის სტატუსის საკითხთან დაკავშირებით.„2022 წლიდან, მას შემდეგ, რაც პარლამენტის თავმჯდომარე გავხდი, პირველი ვიზიტი დიდ ბრიტანეთში მქონდა, მეორე ვიზიტი - ბრიუსელში და ბევრი ვიზიტი მივუძღვენი მაშინ, მათ შორის, კანდიდატის სტატუსის საკითხს. იცით, რა იყო ამ ვიზიტებისას, მაშინ მთავარი საკითხი - რატომ იყო მელია დაკავებული, ასევე სააკაშვილთან დაკავშირებული რაღაც საკითხები და სხვა. მაშინ ეს იყო საბაბი, რომ ჩვენთვის ბრალი დაედოთ არადემოკრატიულობასა თუ პოლიტიკურ დევნაში, მაგრამ გავიდა დრო და სტრასბურგმა თქვა, რომ მტყუანები იყვნენ და ტყუილად ესხმოდნენ თქვენს ქვეყანას თავს. ეს არ არის მხოლოდ ხელისუფლებაზე თავდასხმა. ეს მთლიანად ქვეყნისთვის ჩირქის მოცხებაა. თქვენს ქვეყანას სცხებენ ჩირქს და საბაბად ხან ერთი მიზეზია და ხან მეორე. საბაბი არ გამოილევა იმიტომ, რომ მიზეზი სინამდვილეში სხვაა და არა ის საკითხები, რომელსაც საბაბად იყენებენ“, - განაცხადა შალვა პაპუაშვილმა.პარლამენტის თავმჯდომარემ ასევე ყურადღება გაამახვილა უცხოური დაფინანსების გამჭვირვალობის საკითხზე.„ამ მიმართულებითაც არ დამიკლია მცდელობა, ამ საკითხზე მესაუბრა დონორებთან, ელჩებთან, რომ თავად ყოფილიყვნენ გამჭვირვალე. მაგრამ, სამწუხაროდ არავინ შეისმინა. პარლამენტის შენობაში ვხდებოდი ელჩებსაც, დონორებსაც და ვეუბნებოდი, თქვენი ფული პოლიტიკური მიზნებისთვის იხარჯება და დამიდასტურეს კიდეც, რომ მართალი ვიყავი. მაგრამ, რეალურად, არავინ გვაჩვენებდა, რაში იხარჯებოდა ეს ფული. ასე არ გამოვა. ეს ჩვენი ქვეყანაა. ჩვენ ხალხის მანდატი გვაქვს და აქ, რა თქმა უნდა, ჩვენ ვერ მივცემთ საშუალებას ვერცერთ უცხოელს, გვიკარნახოს ქვეყნის შიგნით წესები და მით უმეტეს, ჩვენს შიდა პოლიტიკაში ჩაერიოს“, - აღნიშნა შალვა პაპუაშვილმა.

საზოგადოება • 1773737717

აიაზმა-ნინოწმინდას მონაკვეთზე მისაბმელიანი და ნახევრადმისაბმელიანი ავტოტრანსპორტის მოძრაობა აღდგა

საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის კოდა–ფარცხისი–მანგლისი–წალკა-ნინოწმინდის საავტომობილო გზის კმ94-კმ146 (აიაზმა-ნინოწმინდა) მონაკვეთზე მისაბმელიანი და ნახევრადმისაბმელიანი ავტოტრანსპორტის მოძრაობა აღდგენილია.

პოლიტიკა • 1773736204

უნდა შეწყდეს ბრიუსელიდან და ევროკავშირის სხვა დედაქალაქებიდან მომდინარე დეზინფორმაცია და ანტიქართული რიტორიკა. პარტნიორობა შეუძლებელია იქ, სადაც სიმართლის ნაცვლად პოლიტიკური ნარატივები დომინირებს - შალვა პაპუაშვილი

საქართველოს და ევროკავშირს შორის ურთიერთობის დღევანდელი დაძაბულობის მთავარი პასუხისმგებლობა ეკისრება იმ ევროპელ მმართველებს, რომლებმაც ეს ურთიერთობა საკუთარი პოლიტიკური დღის წესრიგის მძევლად აქციეს. ჩვენ ეს არ მოგვწონს. ეს მდგომარეობა უნდა შეიცვალოს, - განაცხადა პლენარულ სხდომაზე, პარლამენტის თავმჯდომარემ შალვა პაპუაშვილმა პარლამენტის საქმიანობის ყოველწლიური ანგარიშის წარდგენისას.პარლამენტის თავმჯდომარის განცხადებით, ბრიუსელმა ძალიან კარგად იცის, რა ნაბიჯებია გადასადგმელი იმისთვის, რომ საქართველოსთან ურთიერთობა დაუბრუნდეს იმ ღირსეულ ჩარჩოს, რომელშიც ის უნდა ვითარდებოდეს.„უპირველეს ყოველისა, ევროკავშირმა პატივი უნდა სცეს დემოკრატიას, ანუ ხალხის მმართველობას. ქართველი ხალხისთვის პოლიტიკური ნების გარედან თავს მოხვევა, ან მის ნაცვლად საკუთარ გემოვნებას მორგებული სუროგატი „ქართველი ხალხის“ შექმნის მცდელობა, დემოკრატიის უხეში უარყოფაა. მისი დღევანდელი პოლიტიკით, ბრიუსელი ქართული დემოკრატიის შემაფერხებელია და არა ხელშემწყობი.მეორე, ევროკავშირმა პატივი უნდა სცეს სამართლის უზენაესობას. ბრიუსელი საკმარისზე მეტად დამარცხდა საერთაშორისო სასამართლოებში ქართულ მართლმსაჯულებასთან, იმისთვის, რომ დღეს კვლავ ქედმაღლურად ეჭვქვეშ აყენებდეს მის გადაწყვეტილებებს. დამარცხდა სტრასბურგში სააკაშვილის, მელიას, გვარამიას, ახალაიას, რუსთავი 2-ის საქმეებში; დამარცხდა პარიზის და ვაშინგტონის არბიტრაჟებში ხაზარაძის საქმეში. ყველა იმ საქმეში, რომელსაც წლების განმავლობაში პოლიტიკურ დევნად წარმოაჩენდნენ, საბოლოოდ სამართალმა სხვა რამ თქვა. ამის შემდეგაც იგივე ბრალდებების გამეორება უკვე სამართლის უზენაესობის დაცვა კი არა, უბრალოდ პოლიტიკური პროპაგანდაა. ამიტომ, ბრიუსელმა საბოლოოდ და მკაფიოდ უნდა დაადასტუროს მისი ერთგულება სამართლის უზენაესობის მიმართ და გაემიჯნოს ძალადობასა და პოლიტიკურად მოტივირებულ დანაშაულებს, როგორც პოლიტიკის წარმოების ინსტრუმენტს.დაბოლოს, უნდა შეწყდეს ბრიუსელიდან და ევროკავშირის სხვა დედაქალაქებიდან მომდინარე დეზინფორმაცია და ანტიქართული რიტორიკა. პარტნიორობა შეუძლებელია იქ, სადაც სიმართლის ნაცვლად პოლიტიკური ნარატივები დომინირებს.თუ ევროკავშირს ნამდვილად სურს საქართველოსთან ურთიერთობის გამოსწორება, გზა მარტივია: პატივი სცეს ქართველ ხალხს, პატივი სცეს მის დემოკრატიულ არჩევანს და პატივი სცეს იმ ღირებულებებს, რომლებსაც ევროპული ღირებულებები ჰქვია. სხვა გზა უბრალოდ არ არსებობს“, - განაცხადა შალვა პაპუაშვილმა

საზოგადოება • 1773726015

გუდაური–კობის მონაკვეთზე მსუბუქი ავტოტრანსპორტის მოძრაობა აღდგა

საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის კმ93-კმ107 (გუდაური(ფოსტა)–კობი) მონაკვეთზე მსუბუქი ავტოტრანსპორტის მოძრაობა აღდგენილია, ხოლო მისაბმელიანი და ნახევრადმისაბმელიანი ავტოტრანსპორტის გადაადგილება აკრძალულია.გარემოს ეროვნული სააგენტოს ცნობით, მლეთა-გუდაურის და გუდაური(ფოსტა)–კობის მონაკვეთებზე ავტოტრანსპორტის მოძრაობა განხორციელდება გაუჩერებლად გავლის რეჟიმში, გუდაური(ფოსტა)–კობის მონაკვეთზე მხოლოდ ზვავდამცავი გვირაბების გავლით.