სკოლამდე ერთი კვირა დარჩა - რა უნდა იცოდნენ მშობლებმა ახალი სასწავლო წლის დაწყებამდე

ახალი სასწავლო წლის დაწყებამდე სულ რამდენიმე დღე რჩება. 15 სექტემბერს საქართველოს საჯარო სკოლებში 2026-2027 სასწავლო წელი დაიწყება და მოსწავლეები საკლასო ოთახებს დაუბრუნდებიან.

სასწავლო წლის დაწყებამდე მშობლებს რამდენიმე მნიშვნელოვანი დეტალის გათვალისწინება მოუწევთ. 

განსაკუთრებული სიახლეები პირველკლასელებს ელოდებათ.

2026-2027 სასწავლო წლიდან დაწყებით საფეხურზე სასკოლო ფორმის ეტაპობრივი დანერგვა იწყება. პირველი კლასის მოსწავლეები 15 სექტემბერს უკვე ახალი ფორმით შეხვდებიან სასწავლო წელს, ხოლო პირველი სემესტრის განმავლობაში ფორმით პირველიდან მეექვსე კლასის ჩათვლით მოსწავლეების უზრუნველყოფაა დაგეგმილი.

იცვლება სახელმძღვანელოებიც.
ახალი სასწავლო წლიდან პირველ, მეშვიდე და მეათე კლასებში მოსწავლეებს ახალი სახელმძღვანელოები დახვდებათ.

მშობლებისთვის მნიშვნელოვანია, სწავლის დაწყებამდე გადაამოწმონ ბავშვის სასკოლო ნივთები, საჭირო სახელმძღვანელოები და დღის განრიგი. განსაკუთრებით პირველკლასელების შემთხვევაში, სასურველია ბავშვს წინასწარ ესაუბრონ სკოლაზე, ახალ გარემოსა და იმაზე, თუ როგორ ჩაივლის მისი პირველი დღე.

უკვე ცნობილია როგორც ოფიციალური უქმე დღეები, ასევე ზამთრის, გაზაფხულისა და სააღდგომო არდადეგების განრიგი.

ოფიციალური უქმე დღეები, როდესაც მოსწავლეები არ ისწავლიან, ასეთია:

14 ოქტომბერი – სვეტიცხოვლობა;

23 ნოემბერი – გიორგობა;

7 იანვარი – შობა;

19 იანვარი – ნათლისღება;

3 მარტი – დედის დღე;

8 მარტი – ქალთა საერთაშორისო დღე;

9 აპრილი – საქართველოს სახელმწიფოებრივი დამოუკიდებლობის აღდგენის აქტის მიღების დღე, საქართველოს ეროვნული ერთიანობის, სამოქალაქო თანხმობისა და სამშობლოსათვის დაღუპულთა მოგონების დღე;

9 მაისი – ფაშიზმზე გამარჯვების დღე;

12 მაისი – ანდრია პირველწოდებულის ხსენების დღე და ყოვლადწმინდა ღვთისმშობლისადმი საქართველოს წილხვდომილობის დღე;

17 მაისი – ოჯახის სიწმინდის დღე;

26 მაისი – საქართველოს დამოუკიდებლობის დღე.

ზამთრის არდადეგები 2026 წლის 30 დეკემბერს დაიწყება და 2027 წლის 15 იანვრამდე გაგრძელდება.

გაზაფხულის არდადეგები კი 2027 წლის 8 მარტიდან 15 მარტის ჩათვლით იქნება.