„იტალფარმაკო ჯგუფის“ აღმასრულებელი დირექტორი: განსაკუთრებული შთაბეჭდილება მოახდინა საქართველოს ჯანდაცვის სამინისტროს მტკიცე სურვილმა, რომ ქვეყნის პაციენტებისთვის „ჯივინოსტატი“ ხელმისაწვდომი გახდეს

გასული კვირის განმავლობაში საქართველოს ჯანდაცვის სამინისტროსთან ძალიან მჭიდროდ ვთანამშრომლობდით, რათა გვეპოვა გზა, რომელიც დიუშენის კუნთოვანი დისტროფიის მქონე პაციენტებისთვის საქართველოში „ჯივინოსტატის“ ხელმისაწვდომობას უზრუნველყოფს, – ამის შესახებ „იტალფარმაკო ჯგუფის“ აღმასრულებელმა დირექტორმა, ფრანჩესკო დი მარკომ განაცხადა.

მისი თქმით, განსაკუთრებული შთაბეჭდილება მოახდინა სამინისტროს ერთგულებამ და მტკიცე სურვილმა, რომ „ჯივინოსტატი“ საქართველოს პაციენტებისთვის ხელმისაწვდომი გახდეს.

„ეს შეთანხმება პარტნიორობის ძალას ნათლად აჩვენებს. როდესაც პაციენტები, სახელმწიფო და ინდუსტრია ერთიანდებიან, შეუძლებელი არაფერია და სწორედ პაციენტი ხდება ყველა ძალისხმევის მთავარი ცენტრი. ამ თანამშრომლობით ნამდვილად ვამაყობ და საქართველოს მთავრობასთან და პაციენტთა საზოგადოებასთან ერთად მუშაობას გავაგრძელებთ, რათა ეს შესაძლებლობა ყველა პაციენტამდე მივიდეს“, – განაცხადა ფრანჩესკო დი მარკომ.

ცნობისთვის, იტალიურ კომპანია „იტალფარმაკოსთან“ გაფორმდა ხელშეკრულება ​მედიკამენტ „ჯივინოსტატის“ შეძენაზე, რომელიც განკუთვნილია დიუშენის კუნთოვანი დისტროფიის მქონე პაციენტებისთვის.