მებაჟე ოფიცრებმა დიდი ოდენობით არადეკლარირებული სიგარეტის შემოტანის მცდელობის ფაქტები აღკვეთეს

საბაჟო გამშვებ პუნქტში "ყაზბეგი" დიდი ოდენობით არადეკლარირებული სიგარეტის ქვეყნის საზღვარზე კანონდარღვევით შემოტანის მცდელობის 2 ფაქტი აღიკვეთა. ინფორმაციას შემოსავლების სამსახური ავრცელებს.

უწყების ცნობით, ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, უცხო ქვეყნის მოქალაქეების, კუთვნილი ბარგის და ავტომობილის დეტალური დათვალიერების შედეგად, ჯამში - 436 ცალი არადეკლარირებული ელექტრო სიგარეტი აღმოაჩინეს.

"ერთ-ერთ სამართალდამრღვევ მოქალაქეს აღნიშნული ელექტრო სიგარეტები მანქანის სალონში წინასწარ მოწყობილ სამალავებში ჰქონდა განთავსებული და საბაჟო კონტროლის ფარგლებში მიმდინარე გასაუბრებისას, მან განზრახ უარყო არადეკლარირებული საქონლის არსებობა, რითაც შეეცადა საბაჟო ორგანოსგან მალულად/გვერდის ავლით გადმოეტანა საქონელი და ამით თავი აერიდებინა საბაჟო გადასახადისგან.

საქართველოს საბაჟო კოდექსის 168-ე მუხლის მე-3 ნაწილის შესაბამისად, კანონდამრღვევ მოქალაქეს სანქციის სახით 1000 ლარი შეეფარდა, ხოლო მეორე სამართალდამრღვევის მიმართ, საბაჟო კოდექსის 168-ე მუხლის 1-ელი ნაწილის შესაბამისად გამოყენებული იქნა ჯარიმა ღირებულების 100% - ის 9880 ლარის ოდენობით. ამასთან, ორივე მოქალაქეს არადეკლარირებული საქონელი სრულად ჩამოერთვა", - ნათქვამია ინფორმაციაში.