მარტყოფში მომხდარი მკვლელობის ფაქტზე პროკურატურა ინფორმაციას ავრცელებს

სოფელ მარტყოფში მომხდარი განზრახ მკვლელობის, ცეცხლსასროლი იარაღის მართლსაწინააღმდეგო შეძენის, შენახვისა და ტარების ფაქტებზე პროკურატურამ ერთ პირს ბრალდება წარუდგინა.

გამოძიებით დადგინდა, რომ 9 თებერვალს, გარდაბნის მუნიციპალიტეტში, ბრალდებულმა უთანხმოების გამო, შურისძიების მოტივით, დაზარალებულს ცეცხლსასროლი იარაღიდან ესროლა და მას სიცოცხლისთვის შეუთავსებელი დაზიანებები მიაყენა.

მიღებული ჭრილობების შედეგად, დაზარალებული ადგილზე გარდაიცვალა. სამართალდამცველებმა ბრალდებული 10 თებერვალს დააკავეს. დანაშაულები 10-დან 15 წლამდე თავისუფლების აღკვეთას ითვალისწინებს.

გავრცელებული ცნობით, 34 წლის ნიკა სახლთხუციშვილმა გოჩა ჯერენაშვილი სოფლის ცენტრში დაიბარა, ეკლესიის მიმდებარე ტერიტორიაზე, შეხვედრის შემდეგ კი დაიწყო კონფლიქტი. ნიკა სახლთხუციშვილმა მეგობარს 5 ტყვია ესროლა. გოჩა ჯერენაშვილი ადგილზე გარდაიცვალა.