თელავში, სასტუმრო „Agarani Estate“-ში მომხდარი ინციდენტის საქმეზე დაკავებულ გიორგი ჭიღლაძეს ბრალი წარუდგინეს

ჭიღლაძეს დადგენილება გურჯაანის დროებითი მოთავსების იზოლატორში ცოტა ხნის წინ გააცნეს.

დაკავებულს გამოძიება  სისხლის სამართლის კოდექსის 120-ე მუხლის პირველი ნაწილით გათვალისწინებული დანაშაულის ჩადენას ედავება, რაც ჯანმრთელობის განზრახ მსუბუქ დაზიანებას გულისხმობს.

პროკურატურა ჭიღლაძისთვის აღკვეთის ღონისძიების სახით 5 000 ლარიანი გირაოს პატიმრობის უზრუნველყოფით გამოყენებას ითხოვს.

ამ ეტაპზე დაზუსტებული არ არის, გაიმართება თუ არა სასამართლო პროცესი დღესვე.

შეგახსენებთ, ინციდენტი 18 ივლისს, თელავის მუნიციპალიტეტის სოფელ რუისპირში მდებარე სასტუმრო „Agarani Estate“-ში მოხდა.

ქორწილის სტუმრებსა და სასტუმროში მყოფ რუსულენოვან მოქალაქეებს შორის დაპირისპირება მუსიკის გამო დაიწყო, რასაც მოგვიანებით ფიზიკური დაპირისპირება მოჰყვა.