რამდენად ხშირად უნდა დაიბანოთ თმა - დერმატოლოგის რჩევები

ყველას გვსმენია, რომ თმის ყოველდღიური დაბანა საუკეთესო იდეა არ არის, თმის ტექსტურის მიუხედავად.

რამდენად ხშირად გვირჩევენ ექიმები თმის დაბანას?

თმის დაბანის სიხშირეზე რამდენიმე ფაქტორი მოქმედებს, მათ შორის, რამდენად ხშირად ვარჯიშობთ და ყოველდღიურად იყენებთ თუ არა სტილის საშუალებებს. საბოლოო ჯამში, ეს ყველაფერი თქვენი თმის ტექსტურაზეა დამოკიდებული.

„ხუჭუჭა თმა უფრო სწრაფად შრება და უფრო მყიფეა“,- ამბობს ექსპერტი. რადგან ის უფრო მეტად მიდრეკილია მტვრევისკენ, ის გვირჩევს, რომ კვირაში ერთხელზე მეტად არ დავიბანოთ და შესაძლოა ორ კვირაში ერთხელაც კი.

თუ თხელი თმა გაქვთ, ექსპერტი გვირჩევს მის დაბანას ორ-სამ დღეში ერთხელ. ის განმარტავს, რომ თხელი თმის კვირაში ერთზე ნაკლებად დაბანამ ხშირად შეიძლება გამოიწვიოს თავის კანის პრობლემები, როგორიცაა სებორეული დერმატიტი (ქერტლი).

შესაძლებელია თუ არა თმის ყოველდღე დაბანა?

თუ შესაძლებელია, უმჯობესია, თავი აარიდოთ თმის ყოველდღიურ დაბანას. ჩვენი თმა კერატინისგან შედგება და მიუხედავად იმისა, რომ ის უკიდურესად ძლიერი და მდგრადი ცილაა, ის მაინც მგრძნობიარეა სიმშრალისა და დაზიანების მიმართ.

თუ თმას ძალიან ხშირად დაიბანთ, არსებითად თმას აშორებთ დამცავ ზეთებს (ცხიმს). ამან შეიძლება გამოიწვიოს თავის კანის სიმშრალე და ქავილი. გარდა ამისა, თმის ბოლოები თანდათან ძალიან მშრალი და მსხვრევადი გახდება.

რატომ ცხიმიანდება თმა მეორე დღეს?

ეს ხშირად გენეტიკას უკავშირდება. ორგანიზმში ცხიმის გამომუშავებას ანდროგენული ჰორმონები განსაზღვრავს და სქესობრივი მომწიფების მიღწევის შემდეგ, თქვენი სხეული ბუნებრივად იწყებს მათი უფრო მეტი რაოდენობით გამომუშავებას. იმავე მიზეზით, „ადამიანები შეიძლება მიდრეკილნი იყვნენ აკნესკენ - ცხიმოვანი ჯირკვლები სტიმულირდება მეტი ცხიმის გამოსამუშავებლად“.

რა უნდა გააკეთოთ, თუ თმა ჩვეულებრივზე მეტად ცხიმიანი გახდება? ცხიმის წყლით ჩამობანის ნაცვლად, დერმატოლოგი გვირჩევს მშრალი შამპუნის გამოყენებას, რომელიც ხელს შეუწყობს ცხიმის შეწოვას და შემდეგ დაბანამდე გაძლებს. თუმცა, პროდუქტის დაგროვების თავიდან ასაცილებლად, თავის კანის დაბანისას განსაკუთრებული სიფრთხილე გმართებთ, რათა დარწმუნდეთ, რომ მთლიანად მოიშორებთ პროდუქტს, განმარტავს ის.

რატომ ცვივა თმა უფრო ხშირად დაბანის დროს?

„თმის დაბანა თმის ცვენას არ იწვევს. დაბანის დროს ცვივა ის თმა, რომელიც ისედაც უნდა ჩამოცვენილიყო“, - გვარწმუნებს დერმატოლოგი.

ამერიკის დერმატოლოგიის აკადემიის მონაცემებით , ადამიანი, როგორც წესი, ყოველდღიურად 50-დან 100-მდე თმას კარგავს.

როგორ დავიბანოთ თმა სწორად, რომ თავიდან ავიცილოთ თმის ცვენა და ცხიმიანობა - რჩევები პროფესიონალებისგან

შამპუნი ძირებზე წაისვით და არა ბოლოებზე. შამპუნი თავის კანსა და ძირებზე უნდა წაისვათ, სადაც ცხიმი და ჭუჭყი გროვდება. ბოლოების ქაფის გამო, თმის ბოლოები ძალიან გამოშრება. მშრალი ბოლოები უფრო მეტად მიდრეკილია მტვრევისკენ.

კონდიციონერი ბოლოებში წაისვით. ყურადღება თმის ქვედა ნახევარზე გაამახვილეთ და არა ძირებზე. თუ თქვენი თმა განსაკუთრებით მტვრევადია, ტენიანობის აღსადგენად შეგიძლიათ დროდადრო ღრმად დამატენიანებელი ნიღაბი გამოიყენოთ.

თუ გაღიზიანება გაგრძელდა, მიმართეთ ექიმს. თუ თავის კანის მუდმივ ანთებას, ქავილს, სიწითლეს ან აქერცვლას განიცდით, დერმატოლოგთან ვიზიტის დროა. ეს სიმპტომები შეიძლება კონტაქტური დერმატიტის (რომელიც ხშირად გამოწვეულია თმის მოვლის საშუალებების ინგრედიენტებზე ალერგიით) ან თუნდაც თავის კანის ისეთი მდგომარეობის ნიშანი იყოს, როგორიცაა ფსორიაზი.