საგარეო უწყება - მაკა ბოჭორიშვილის ფრანგ კოლეგასთან შეხვედრაზე გამოითქვა იმედი, რომ ევროკავშირთან ურთიერთობები ჩვეულ დღის წესრიგს დაუბრუნდება, ხაზი გაესვა საფრანგეთის მხარდაჭერის მნიშვნელობას

ნიუ-იორკში, გაერო-ს გენერალური ასამბლეის ფარგლებში, საქართველოს საგარეო საქმეთა მინისტრი, მაკა ბოჭორიშვილი საფრანგეთის რესპუბლიკის ევროპისა და საგარეო საქმეთა მინისტრს, ჟან-ნოელ ბაროს შეხვდა.

საქართველოს საგარეო უწყების ინფორმაციით, საუბრისას, მხარეებმა ორ ქვეყანას შორის თანამშრომლობის საკითხები განიხილეს. ყურადღება გამახვილდა პოლიტიკური დიალოგის მნიშვნელობასა და აქტიური კომუნიკაციის აუცილებლობაზე საერთო გამოწვევების დაძლევის მიზნით.

საგარეო უწყების ცნობითვე, მინისტრებმა საქართველოს ევროინტეგრაციის პროცესზე იმსჯელეს. გამოითქვა იმედი, რომ ევროკავშირთან ურთიერთობები ჩვეულ დღის წესრიგს დაუბრუნდება. ხაზი გაესვა საფრანგეთის მხრიდან ამ პროცესის მხარდაჭერის მნიშვნელობას.

„საუბარი ასევე შეეხო რეგიონში უსაფრთხოების მხრივ არსებულ გამოწვევებს და რუსეთის ფედერაციის მიერ საქართველოს ტერიტორიების ოკუპაციას.

მაკა ბოჭორიშვილმა ფრანგ კოლეგას საერთაშორისო ფორმატებში საქართველოს აქტიური მხარდაჭერისთვის მადლობა გადაუხადა.

შეხვედრაზე ასევე მიმოიხილეს სხვადასხვა სფეროში ორი ქვეყნის თანამშრომლობის საკითხები“, – აღნიშნულია ინფორმაციაში.