სააკაშვილმა უკან გამოიტანა სტრასბურგის სასამართლოში შეტანილი სარჩელი, რითაც ის პოლონეთში სამკურნალოდ გადაყვანას ითხოვდა

მიხეილ სააკაშვილმა უკან გამოიტანა სტრასბურგის სასამართლოში შეტანილი სარჩელი, რითაც ის პოლონეთში სამკურნალოდ გადაყვანას ითხოვდა. ინფორმაცია ამის შესახებ იუსტიციის მინისტრმა, სპეციალურ ბრიფინგზე დაადასტურა.

ირკვევა, რომ სარჩელის უკან გამოხმობა სააკაშვილის ჯანმრთელობის სტაბილურ მდგომარეობას უკავშირდება, რაც ნიშნავს, რომ ყოფილი პრეზიდენტი უცხოეთში სამკურნალოდ გადაყვანის საჭიროებას უკვე თავადაც ვერ ხედავს.

"საზოგადოების ინფორმირების მიზნით გაცნობებთ, რომ მიმდინარე წლის 25 აპრილს ადამიანის უფლებათა ევროპული სასამართლოდან იუსტიციის სამინისტროში შემოვიდა შეტყობინება, რომელსაც თან ერთვის მსჯავრდებულ სააკაშვილის წერილი სტრასბურგის სასამართლოდან მისი საჩივრის გახმობის თაობაზე.

18 აპრილით დათარიღებულ წერილში სააკაშვილის ადვოკატი აღნიშნავს, რომ ამჟამად სააკაშვილის ჯანმრთელობის მდგომარეობა არ არის სიცოცხლისთვის სახიფათო. ევროპული სასამართლოს მიერ იუსტიციის სამინისტროს ეთხოვა კომენტარის გაკეთება 10 მაისამდე, ასეთის არსებობის შემთხვევაში.

დღეს ჩვენ გავაგზავნეთ შესაბამისი პასუხი, რომელშიც აღვნიშნავთ, რომ სააკაშვილის ჯანმრთელობის მდგომარეობა ნამდვილად არ ყოფილა სიცოცხლისთვის საფრთხის შემქმნელი, რაც დადასტურდა თავად სტრასბურგის სასამართლოდან მიერ 2023 წლის 11 მაისს, როდესაც მსჯავრდებულ სააკაშვილს უარი ეთქვა მკურნალობის მიზნით პოლონეთში, ვარშავის კლინიკაში გადაყვანაზე. ასევე, ადამიანის უფლებათა ევროპულ სასამართლოს ვთხოვეთ, გვაცნობონ განსახილველ საქმეთა ნუსხიდან საქმის ამორიცხვის ფაქტი“, - აღნიშნა რატი ბრეგაძემ.