ლევან მახაშვილი: იმედია, სტრასბურგის სასამართლო საბოლოოდ დაუსვამს წერტილს იმ უსამართლო კრიტიკას, რომელსაც ადგილი ჰქონდა საპარლამენტო არჩევნების დროს

ჩვენ მივესალმებით ამ პროცესს, გვაქვს იმედი, რომ ის ერთხელ და სამუდამოდ დაუსვამს წერტილს იმ სიყალბეს, რა სიყალბეც იხილა საზოგადობამ 2024 წლის არჩევნებთან დაკავშირებით, – ამის შესახებ საპარლამენტო უმრავლესობის წევრმა, ლევან მახაშვილმა 2024 წლის საპარლამენტო არჩევნებთან დაკავშირებით სტრასბურგის სასამართლოში საიას მიერ შეტანილ საჩივარზე დასმული კითხვის საპასუხოდ განაცხადა.

მისი თქმით, ხელისუფლება სასამართლოსთან მაქსიმალურად ითანამშრომლებს, რათა დროულად მიიღონ კონკრეტული გადაწყვეტილება.

„გვაქვს ძალიან დიდი იმედი და სურვილი, მალე დასრულდეს ეს სასამართლო პროცესი. ბუნებრივია, სასამართლო პროცესები რამდენიმე თვეს წაიღებს, შეიძლება წელიწადზე მეტიც გასტანოს, მაგრამ მაქსიმალურად ვითანამშრომლებთ სასამართლოსთან, რომ დროულად მიიღონ კონკრეტული გადაწყვეტილება, რათა საბოლოოდ დაესვას წერტილი იმ უსამართლო კრიტიკას, სიყალბეს და დეზინფორმაციულ შეტევას, რომელსაც ადგილი ჰქონდა საქართველოზე საპარლამენტო არჩევნების დროს, რასაც დღემდე ბევრი ევროპელი ვითომ საქართველოს მეგობარი იყენებს უსამართლო კრიტიკისთვის“, – განაცხადა ლევან მახაშვილმა.

ცნობისთვის, ახალგაზრდა იურისტთა ასოციაციის ინფორმაციით, სტრასბურგის სასამართლომ 2024 წლის საპარლამენტო არჩევნებთან დაკავშირებით საჩივრების განხილვა დაიწყო. როგორც საია-ში აცხადებენ, მათ მოთხოვნებში არჩვენების შედეგების გაუქმება არ არის.