ჩინეთს ცენტრალური ადგილი უკავია საქართველოსთვის, როგორც საექსპორტო ბაზარს, ის ძალიან მნიშვნელოვანი პარტნიორია - ირაკლი ნადარეიშვილის ინტერვიუ ჩინეთის ტელეარხთან

ჩინეთში ვიზიტის ფარგლებში, ეკონომიკისა და მდგრადი განვითარების მინისტრის მოადგილე ირაკლი ნადარეიშვილმა ინტერვიუ ჩინეთის ტელეარხ CGTN-ს მისცა. მინისტრის მოადგილემ ჩინეთში მომსახურებით ვაჭრობის საერთაშორისო გამოფენაში CIFTIS 2026 მიიღო მონაწილეობა, სადაც საქართველოს ეროვნული პავილიონი პირველად იყო წარდგენილი.

როგორც ინტერვიუში ირაკლი ნადარეიშვილმა განაცხადა, CIFTIS-ის პლატფორმა მონაწილე ქვეყნებსა და კომპანიებს დიდ შესაძლებლობებს აძლევს, გამოფენაში მონაწილეობა კი მნიშვნელოვანია არა მხოლოდ გამოცდილების გაზიარებისთვის, არამედ კონტაქტების დამყარებისა და ახალი პარტნიორობების ჩამოყალიბებისთვისაც.

"საქართველო ამ გამოფენაში მონაწილეობას ნამდვილად პირველად იღებს. მოხარულები და აღფრთოვანებულები ვართ იმ შესაძლებლობებით, რომლებსაც ეს პლატფორმა მონაწილე კომპანიებსა და ქვეყნებს სთავაზობს.

ეს ასევე ეხება კონტაქტების დამყარებასა და ახალი პარტნიორობის ჩამოყალიბებას. მოუთმენლად ველოდებით, რომ ქართული ბიზნესი და კერძო სექტორი ახალ პარტნიორებს შეხვდება.

მაგალითად, IT და ტექნოლოგიების სექტორს თუ ავიღებთ, ბოლო ხუთი წლის განმავლობაში ეს საქართველოსთვის ძალიან საინტერესო წარმატების ისტორიად იქცა, ვინაიდან თითქმის ნულოვანი ნიშნულიდან განვითარდა და დღეს საქართველოს მშპ-ის (GDP) თითქმის 10%-ს შეადგენს. ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს. შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან.

ჩინეთს ცენტრალური ადგილი უკავია საქართველოსთვის, როგორც საექსპორტო ბაზარს. უპირველეს ყოვლისა, ეს ერთ-ერთი უდიდესი ბაზარია, საქართველოს კი ნამდვილად სჭირდება ბაზრების დივერსიფიკაცია ერთი კონკრეტული რეგიონიდან უფრო ფართო გეოგრაფიაზე.

ჩინეთი ძალიან მნიშვნელოვანი პარტნიორია. თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება. როდესაც CIFTIS-სა და მომსახურების სექტორზე ვსაუბრობთ, ვფიქრობ, ეს ჩვენს ორმხრივ თანამშრომლობას კიდევ ერთ ახალ განზომილებას შემატებს, რათა ანალოგიურად ვიმუშაოთ მომსახურების სფეროს განვითარებაზე, ექსპორტსა და ინვესტიციებზე. სწორედ ამის მიღწევას ველით ამ ღონისძიებიდან და ზოგადად, ჩვენი ორმხრივი ურთიერთობების დღის წესრიგიდან,"- განაცხადა ირაკლი ნადარეიშვილმა ინტერვიუში.