Sky News: უკრაინამ კურსკის ოლქზე შეტევის დროს ბრიტანული ტანკები Challenger 2 გამოიყენა

უკრაინულმა ჯარმა რუსეთის კურსკის ოლქზე შეტევით ოპერაციაში ბრიტანული Challenger 2 ტიპის ტანკები გამოიყენა. ინფორმაციას ამის შესახებ Sky News-ი ავრცელებს.

დიდი ბრიტანეთის თავდაცვის სამინისტროს და უკრაინულ მხარეს ეს ცნობები ჯერ არ დაუდასტურებიათ, თუმცა, როგორც არაერთხელ ითქვა, უკრაინას ბრიტანული იარაღის გამოყენება რუსეთის ტერიტორიაზე თავისუფლად შეუძლია.

ეს Challenger 2 ტიპის ტანკებსაც ეხება. სად, როგორ და რა რაოდენობის ტანკი იყო ჩართული შეტევით ოპერაციაში, უცნობია, თუმცა ტელეარხი აღნიშნავს, რომ უკრაინის შეიარაღებული ძალების 82-ე სადესანტო-მოიერიშე ბრიგადა გასული წლიდან იყენებს მათ.

ბრიტანული ტელეარხის განმარტებით, თუ ეს ცნობები ოფიციალურად დადასტურდა, ეს იქნება პირველი შემთხვევა, როცა ბრიტანული ტანკები რუსეთის ტერიტორიაზე ომის საწარმოებლად გამოიყენეს.