ტბა, რომელმაც ერთ ღამეში 1 700 ადამიანი მოკლა - ქუჩები ცხედრებით იყო სავსე

ტბა, რომელმაც ერთ ღამეში 1 700 ადამიანი მოკლა… ქუჩებში, სახლებსა და გზებზე ადამიანებისა და ცხოველების ცხედრები ეყარა. გარეგანი დაზიანება არავის აღენიშნებოდა. თითქოს მთელი სოფელი უბრალოდ ერთ ღამეში დადუმდა. ეს რეალური ამბავია, რომელიც 1986 წლის 21 აგვისტოს, კამერუნის ჩრდილო-დასავლეთში, სოფელ ნიოსთან ახლოს მოხდა.

ზაფხულის ერთი ჩვეულებრივი, არაფრით გამორჩეული საღამო იყო - როცა ადგილობრივებმა ტბიდან ძლიერი, აფეთქების მსგავსი ხმა გაიგეს. მალევე, სოფლის მცხოვრებლებმა, ერთმანეთის მიყოლებით, გონება დაკარგეს. თავდაპირველად არავინ იცოდა, რა მოხდა. არსებობდა უამრავი ვერსია, მაგრამ რეალური პასუხი იმაზე უცნაური აღმოჩნდა, ვიდრე მოსალოდნელი იყო.

აღმოჩნდა, რომ ნიოსის ტბის სიღრმეში წლების განმავლობაში უზარმაზარი რაოდენობით ნახშირორჟანგი, CO₂, გროვდებოდა. იმ ტრაგიკულ ღამეს კი ეს გაზი წყლიდან ერთბაშად გათავისუფლდა და ჰაერში უზარმაზარი, უხილავი ღრუბელი წარმოქმნა. CO2 ტბიდან სოფლების მიმართულებით გავრცელდა. ადამიანებს ჟანგბადი აღარ ეყოთ… ყველაზე შემზარავი ის იყო, რომ ეს ყველაფერი თითქმის უხილავად მოხდა. არ იყო ცეცხლი. არ იყო აფეთქება. არ იყო გამაფრთხილებელი სუნი. იყო მხოლოდ გაზი, რომელსაც ვერავინ ხედავდა.

1986 წლის კატასტროფის შემდეგ ნიოსის ტბაში სპეციალური მილები დაამონტაჟეს, რათა გაზის დაგროვება აღარ მომხდარიყო. ტრაგედიის მეორე დღეს ტბა ისევ ისეთი მშვიდი იყო… თითქოს არაფერი მომხდარა.