Reuters: „რესპუბლიკურ“ პარტიასთან დაახლოებული დონორი საქართველოს მიმართ ზეწოლის კანონპროექტს ეწინააღმდეგება

აშშ-ის „რესპუბლიკურ“ პარტიასთან დაახლოებული დონორი ბოლო კვირების განმავლობაში კერძოდ ლობირებდა კონგრესში იმ საკანონმდებლო აქტის წინააღმდეგ, რომელიც ზეწოლას მოახდენდა საქართველოს მმართველ პარტიაზე. ინფორმაციას ამის შესახებ სააგენტო Reuters-ი ავრცელებს.

ტეხასში მდებარე ნავთობკომპანიის აღმასრულებელმა პირმა და „რესპუბლიკელების“ დონორმა, სტივ ნიკანდროსმა 30 სექტემბერს წერილი გაუგზავნა წარმომადგენელთა პალატის საგარეო საქმეთა კომიტეტის „რესპუბლიკელ“ წევრებს, რომელშიც მათ მადლობას უხდის ამ საკანონმდებლო ინიციატივის მიმართ წინააღმდეგობისთვის.

მისი წერილი, რომელსაც Reuters-ი გაეცნო, ასევე მოუწოდებდა კანონმდებლებს, რომ გადაედგათ დამატებითი ნაბიჯები ამ საკანონმდებლო აქტის საბოლოო მიღების საწინააღმდეგოდ.

ჯო უილსონმა, რომელიც ამ კანონპროექტის ინიციატორია, განაცხადა, რომ შეშფოთებულია ნიკანდროსის ძალისხმევით, ხელი შეუშალოს ამ კანონპროექტს.

თავის წერილში, ნიკანდროსმა, რომელიც ენერგეტიკული კომპანია TXN Energy-ის აღმასრულებელი დირექტორია, განაცხადა, რომ „ქართული ოცნება“ დემოკრატიულად არის არჩეული და რომ მსგავსმა საკანონმდებლო აქტმა შეიძლება ზიანი მიაყენოს აშშ-ის ბიზნეს ინტერესებს.

საქართველოს ელჩმა ვაშინგტონში, თამარ ტალიაშვილმა, განცხადებაში დაწერა, რომ მიუხედავად იმისა, რომ ნიკანდროსი ნოვატორია, საქართველოს მთავრობას არ აქვს ლობისტური კავშირები შეერთებულ შტატებში.

ტალიაშვილმა აღნიშნა, რომ ორმხრივი ურთიერთობები გაუარესდა აშშ-ის ყოფილი პრეზიდენტის, ჯო ბაიდენის დროს, თუმცა, ტრამპის მმართველობისას ურთიერთობების გაუმჯობესების შანსი აქვთ.