რა მდგომარეობაშია ახლა სიკვდილმისჯილი ქალი, რომელიც ორჯერ სასიკვდილო ინექციის შეყვანის მიუხედავად გადარჩა

ამერიკის ტენესის შტატში სიკვდილით დასჯის მცდელობას გადარჩენილმა კრისტა გეილ პაიკმა, შესაძლოა, ტვინის შეუქცევადი დაზიანება მიეღო. ასეთი ვარაუდი გამოთქვა ანესთეზიოლოგმა ჯოელ ზივოტმა, რომელიც პროცედურამდე მსჯავრდებულის ადვოკატებს უწევდა კონსულტაციას.

ექიმმა ყურადღება გაამახვილა იმ გარემოებაზე, რომ პაიკის ჰოსპიტალიზაცია პრეპარატის შეყვანიდან ერთ საათზე მეტი დროის შემდეგ მოხდა. მისი შეფასებით, სასიკვდილო ინექციის შემდეგ ასეთმა ხანგრძლივმა მდგომარეობამ, შესაძლოა, მძიმე შედეგები გამოიწვიოს.

„იმის გათვალისწინებით, რომ პაიკის ჰოსპიტალიზაცია გვიან მოხდა,  სავარაუდოა, რომ მან ტვინის მუდმივი ტრავმა მიიღო“, — დაწერა ზივოტმა The New York Times-ის სვეტში.

სპეციალისტმა ასევე დაუშვა, რომ პროცედურის დროს წარმოქმნილი პრობლემები, შესაძლოა, პაიკის ვენების თავისებურებებს ან თავად პრეპარატს უკავშირდებოდეს. ქალის ადვოკატები მანამდე აცხადებდნენ, რომ ინტრავენური კათეტერები, შესაძლოა, არასწორად ჩაიდგა, რის გამოც პენტობარბიტალი გარშემომყოფ ქსოვილებში მოხვდა.