ლავროვი: მოსკოვს სურს გაიგოს, რას გულისხმობდა დონალდ ტრამპი უკრაინის კონფლიქტის მოსაგვარებლად 50 დღის შესახებ გაკეთებულ განცხადებაში

რუსეთის საგარეო საქმეთა მინისტრმა, სერგეი ლავროვმა განაცხადა, რომ მოსკოვს სურს გაიგოს, რას გულისხმობდა აშშ-ის პრეზიდენტი, დონალდ ტრამპი უკრაინის კონფლიქტის მოსაგვარებლად 50 დღის შესახებ გაკეთებულ განცხადებაში.

„ჩვენ, რა თქმა უნდა, გვსურს გავიგოთ, რა დგას ამ განცხადების [ტრამპის] უკან - 50 დღე. ადრე იყო 24 საათიც, იყო 100 დღეც, ჩვენ ეს ყველაფერი გამოვიარეთ და ნამდვილად გვინდა გავიგოთ, რა ამოძრავებს შეერთებული შტატების პრეზიდენტს“, - აღნიშნა რუსეთის საგარეო უწყების ხელმძღვანელმა.

„ნათელია, რომ ის [ტრამპი] იმყოფება უზარმაზარი წნეხის ქვეშ ევროკავშირისა და ნატოს ამჟამინდელი ხელმძღვანელობის მხრიდან, რომელიც უცერემონიოდ უჭერს მხარს ზელენსკის მოთხოვნებს, აგრძელებს მისთვის თანამედროვე, მათ შორის შეტევითი იარაღის მიწოდებას“, - დასძინა მან.

ტრამპმა ორშაბათს განაცხადა, რომ თუ 50 დღეში სამშვიდობო შეთანხმება არ იქნება მიღწეული, რუსეთს ცალმხრივად დაუწესებს „100 პროცენტიან“ ტარიფებს.