დაბადების თვე და სიცოცხლის ხანგრძლივობა - რას ამბობს სტატისტიკა

მკვლევრებმა აღმოაჩინეს სტატისტიკური კანონზომიერება დაბადების თვესა და სიცოცხლის ხანგრძლივობას შორის. ყველაზე ხშირად იმ ადამიანებს შორის, რომლებიც ძალიან ღრმა მოხუცებულობამდე აღწევდნენ, დეკემბერში დაბადებულები იყვნენ. ამავდროულად, მეცნიერები ხაზს უსვამენ: დაბადების თარიღს არ შეუძლია იწინასწარმეტყველოს, თუ რამდენ ხანს იცოცხლებს კონკრეტული ადამიანი.

Journal of Aging Research-ში გამოქვეყნებული ანალიზები მიუთითებს შესაძლო კავშირზე დაბადების სეზონსა და ხანდაზმულობას (დღეგრძელობას) შორის, წერს WP Tech. კერძოდ, დეკემბერში დაბადებული ადამიანები ზოგიერთ კვლევაში უფრო ხშირად აღწევდნენ ძალიან ღრმა ასაკს, ვიდრე სხვა თვეებში დაბადებულები.

ერთ-ერთი შესაძლო მიზეზი შეიძლება უკავშირდებოდეს გულ-სისხლძარღვთა დაავადებების რისკს. ზოგიერთი კვლევა ვარაუდობს, რომ წლის ბოლოს დაბადებულ ადამიანებში ცალკეული გულ-სისხლძარღვთა პრობლემების განვითარების ალბათობა შესაძლოა ოდნავ დაბალი იყოს. ამავდროულად, მათ შეიძლება ჰქონდეთ სხვა დაავადებების, კერძოდ, ზოგიერთი ნევროლოგიური დარღვევისა და ასთმის მომატებული რისკი.

ვინ აღწევდა უფრო ხშირად 105 წელს?

კიდევ ერთი საინტერესო კანონზომიერება  -  ნაშრომში „დაბადების თვე და 105+ წლამდე მიღწევა“. გაბრიელე დობლჰამერმა, რემბრანდტ შოლცმა და ჰაინერ მაიერმა გააანალიზეს იმ ადამიანების მონაცემები, რომლებმაც სულ მცირე 105 წელი იცოცხლეს.

აღმოჩნდა, რომ ასწლოვანთა შორის არაპროპორციულად ბევრი იყო დეკემბერში დაბადებული ადამიანი. დაბადებიდან 105 წლისა და მეტ ასაკამდე მიღწევის ფარდობითი ალბათობა ამ ჯგუფში საშუალოზე დაახლოებით 16%-ით მაღალი იყო.

მსგავსი ტენდენცია დააფიქსირეს მაქს პლანკის დემოგრაფიული კვლევების ინსტიტუტის მკვლევრებმაც. ავსტრიასა და დანიაში მონაცემთა ანალიზმა აჩვენა, რომ შემოდგომაზე, ოქტომბრიდან დეკემბრამდე დაბადებული ადამიანები , 50 წლის შემდეგ საშუალოდ უფრო დიდხანს ცოცხლობდნენ, ვიდრე გაზაფხულზე - აპრილიდან ივნისამდე დაბადებულები. კვლევისთვის გამოყენებული იყო მილიონზე მეტი დაკვირვება. მეცნიერებმა ივარაუდეს, რომ შემდგომ ჯანმრთელობაზე შესაძლოა გავლენა მოეხდინა იმ პირობებს, რომლებშიც ადამიანი ჯერ კიდევ დაბადებამდე და სიცოცხლის პირველი თვეების განმავლობაში იმყოფებოდა.

რატომ შეიძლება ჰქონდეს მნიშვნელობა დაბადების სეზონს?

მკვლევრები ვარაუდობენ, რომ მნიშვნელობა შეიძლება ჰქონდეს სეზონურ ფაქტორებს, რომლებიც მოქმედებს ორსულობასა და ბავშვის ადრეულ განვითარებაზე.

მათ შორის არის დედის კვება, მზის სინათლის რაოდენობა, D ვიტამინის დონე, სეზონური ინფექციები და გარემოს სხვა პირობები. მათ პოტენციურად შეუძლიათ გავლენა იქონიონ იმაზე, თუ რამდენად მიდრეკილი იქნება ორგანიზმი მომავალში გარკვეული დაავადებებისადმი.

ამავდროულად, ეს მიღებული შედეგების მხოლოდ ერთ-ერთი შესაძლო ინტერპრეტაციაა. თავისთავად დაბადების თვე არ განსაზღვრავს სიცოცხლის ხანგრძლივობას.

დღეგრძელობაზე ბევრად მეტ გავლენას ახდენს გენეტიკა, კვება, ფიზიკური აქტივობა, ძილი, სტრესის დონე, დაავადებათა პროფილაქტიკა და ხარისხიან სამედიცინო მომსახურებაზე ხელმისაწვდომობა.