დააკავეს ქალი, რომელიც თავს სტომატოლოგად ასაღებდა და პროცედურაში სუპერწებოს იყენებდა

35 წლის ფლორიდელი ქალი ცოტა ხნის წინ დააკავეს არალიცენზირებული სტომატოლოგიური პროცედურების ჩატარების ბრალდებით, მათ შორის მაღაზიაში ნაყიდი სუპერ წებოთი ვინირების მიმაგრებისთვის.

პროკურორების თქმით, ემელი მარტინესთან პროცედურის ჩატარება საკმაოდ იაფი ჯდებოდა, სხვა ლიცენზირებულ სტომატოლოგიურ კლინიკებთან შედარებით. შედარებისთვის, ლიცენზირებულ კლინიკაში ერთი კბილის ვინირის ღირებულება შეიძლება 900-დან 1500 დოლარამდე მერყეობდეს, თუმცა, როგორც ამბობენ, მარტინესმა ერთ კლიენტს 2500 დოლარი სთხოვა სრული თვის ვინირების მიმაგრების პროცედურისთვის. სამწუხაროდ, მარტინესის დაბალი ფასებით მოხიბლულ ბევრ მათგანს კბილები მძიმედ დაუზიანდა, მოგვიანებით კი ინფექციები და ტკივილი განუვითარდა.

სინამდვილეში, მარტინესს საკუთარი მაღაზია ჰქონდა გახსნილი, სადაც თავი სტომატოლოგად წარმოადგინა. თაღლითობა მას შემდეგ გამოვლინდა, რაც ორმა უკმაყოფილო კლიენტმა მის წინააღმდეგ კბილების სერიოზული დაზიანებისთვის საჩივარი შეიტანა. ნამდვილ სტომატოლოგებთან ვიზიტის შემდეგ, ისინი შოკირებულები დარჩნენ, როდესაც შეიტყვეს, რომ მათ ვინირების პროცედურა საყოფაცხოვრებო სუპერწებოთი ჰქონდათ გაკეთებული.

ერთ-ერთ დაზარალებულს არალიცენზირებული ტექნიკოსის მიერ მიყენებული დაზიანების გამოსასწორებლად სასწრაფო ოპერაცია დასჭირდა. მათი თქმით, მარტინესმა არა მხოლოდ უარი თქვა თანხის დაბრუნებაზე, არამედ უარყო ნებისმიერი პასუხისმგებლობა.

„მას ვინირების დადების ლიცენზია არ აქვს. მას ვინირების გასაკეთებლად განათლება არ აქვს“, - განაცხადა პოლიციელმა.

ემელის ბრალი წაუყენეს თაღლითობასა და მოქმედი ლიცენზიის გარეშე სტომატოლოგიურ საქმიანობაში.