ამ წუთებში, ისრაელის ძალები იერიშებს ახორციელებენ თეირანსა და ბეირუთზე - დარტყმის სამიზნეა ირანის სახელმწიფო მაუწყებლის შენობაც

 ამ წუთებში, ისრაელის ძალები იერიშებს ახორციელებენ თეირანსა და ბეირუთზე, მათ შორის დარტყმის სამიზნეა ირანის სახელმწიფო მაუწყებლის შენობაც. ბოლო 24 საათში, განადგურებულ სამხედრო ობიექტებს შორის არის ქალაქ სანან-დაჯის სამართალდამცავი სტრუქტურებისა და სასაზღვრო დაცვის სარდლობის შტაბ-ბინები. ასევე დაზიანდა ისპაჰანის ავიაბაზა და თეირანის არმიის ბაზა.

სარაკეტო იერიშების შედეგად, დაზიანდა რელიგიური ნაგებობები და საცხოვრებელი კორპუსები, ასევე ადმინისტრაციული შენობები.

აშშ-ის სარდლობის ცნობით, შაბათს, ოპერაციის დაწყების შემდეგ, დარტყმა განხორციელდა ირანის ტერიტორიაზე 1 250-ზე მეტ სამიზნეზე. საომარი მოქმედებების ფონზე, იზრდება მსხვერპლის რაოდენობაც. უფლებადამცველი ორგანიზაციების შეფასებით, ირანში იერიშების შედეგად, 742 მშვიდობიანი მოქალაქე დაიღუპა, მათ შორის 176 ბავშვია. დაშავებულთა რაოდენობა 900-ს აჭარბებს. მხოლოდ ბოლო 24 საათის განმავლობაში, დაიღუპა 85 ადამიანი.