მილიონერმა დედამ ვაჟი ცოლის ღალატის გამო, მემკვიდრეობის გარეშე დატოვა

ბრიტანეთში 70 წლის გერი მაკდუგალი სასამართლოში ცდილობს დედის, ჯინ მაკდუგალის ანდერძის გასაჩივრებას, რომელმაც იგი მრავალმილიონიანი მემკვიდრეობის გარეშე დატოვა. ამის შესახებ გამოცემა Daily Mail იუწყება.

ჯინი 2020 წლის აპრილში გარდაიცვალა. მისი ვაჟი ელოდებოდა, რომ დაახლოებით ხუთ მილიონ ფუნტ სტერლინგს მიიღებდა, თუმცა 2011 წელს შედგენილი საბოლოო ანდერძით იგი ქონების განაწილებიდან სრულად ამოირიცხა. ოჯახის წევრები ვარაუდობენ, რომ ეს გადაწყვეტილება ჯინმა შვილის დასასჯელად მიიღო — გერის 2008 წელს ცოლის ღალატში ამხილეს და დედა ამ ფაქტს ვერ პატიობდა.

გერი ადასტურებს, რომ მეუღლეს უღალატა, თუმცა აცხადებს, რომ იმავე წელს შედგენილი სხვა ანდერძით დედამ ქონება მას, მის დას — სანდრა ტომასსა და მის მეუღლეს — ლლოიდ ტომასს თანაბრად გაუნაწილა. მისი თქმით, თუ დედა მასზე განაწყენებული იქნებოდა, ამას პირდაპირ ეტყოდა. გერი ვარაუდობს, რომ საბოლოო გადაწყვეტილებაზე გავლენა მისმა დამ მოახდინა.

სანდრასა და ლლოიდ ტომასის ადვოკატები კი ამტკიცებენ, რომ დროთა განმავლობაში ჯინის დამოკიდებულება შვილთან შეიცვალა. მათი განცხადებით, დედა განსაკუთრებულად ახლოს იყო ქალიშვილთან, მაშინ როცა გერისთან ურთიერთობა დაძაბული ჰქონდა. ამასთან, 2011 წლისთვის გერი უკვე ფლობდა ოჯახურ ბიზნესსა და რამდენიმე უძრავ ქონებას.

საქმეში ფიგურირებს კიდევ ერთი ბრალდება: გერი ამტკიცებს, რომ დამ და მისმა მეუღლემ ჯინის სიცოცხლეში პირადი საჭიროებებისთვის დაახლოებით 1,6 მილიონი ფუნტი დახარჯეს. სანდრამ და ლლოიდმა თანხის გამოყენება აღიარეს, თუმცა აცხადებენ, რომ ეს უკანონო არ ყოფილა და აღნიშნული თანხა საბოლოოდ მათ ეკუთვნოდათ.