კაცმა ბანკი გაძარცვა, რომ ციხეში ჩაესვათ და ცოლს გაქცეოდა... - სასამართლოს მოულოდნელი განაჩენი

2016 წელს აშშ-ში, კანზას სიტიში მომხდარი უჩვეულო შემთხვევა სოციალურ ქსელებში კვლავ აქტიურად განიხილება. საქმე 70 წლის ლოურენს ჯონ რიპლს ეხება, რომელმაც ბანკში ყაჩაღობის მცდელობა მხოლოდ იმისთვის მოაწყო, რომ დააკავებდნენ და ციხეში აღმოჩნდებოდა.

ინციდენტი 2016 წლის სექტემბერში მოხდა. რიპლი ბანკში შევიდა და მოლარეს ბარათი გადასცა, რომელზეც ეწერა: „იარაღი მაქვს, მომეცი ფული“. რეალურად მას იარაღი არ ჰქონია. ბანკის თანამშრომელმა მას 2 924 დოლარი გადასცა. თუმცა მამაკაცს გაქცევა არც უცდია — პირიქით, ბანკის ფოიეში ჩამოჯდა და პოლიციის მოსვლას დაელოდა.

გამოძიების მასალების მიხედვით, რიპლმა მოგვიანებით განაცხადა, რომ შინ დაბრუნება არ სურდა და დააკავებდნენ თუ არა, მისთვის მნიშვნელობა აღარ ჰქონდა. როგორც თავად ამბობდა, ციხეში ყოფნა მისთვის „უკეთესი იქნებოდა, ვიდრე სახლში დარჩენა ცოლთან მუდმივი კონფლიქტის პირობებში“.

სასამართლო პროცესზე რიპლმა დანაშაული აღიარა. მან განმარტა, რომ მძიმე ემოციურ მდგომარეობაში იმყოფებოდა — 2015 წელს ჩატარებული გულის ოპერაციის შემდეგ დეპრესია განუვითარდა, რასაც ოჯახური დაძაბულობაც დაერთო. მისი თქმით, ანტიდეპრესანტების მიღების შემდეგ მდგომარეობა გაუმჯობესდა. რიპლმა ისიც აღნიშნა, რომ პატიმრობა სასჯელი იქნებოდა არა იმდენად მისთვის, რამდენადაც მისი მეუღლისთვის.

მიუხედავად იმისა, რომ ბანკის ძარცვის ბრალდება კანონით მრავალწლიან პატიმრობას ითვალისწინებს, სასამართლომ ხანდაზმული მამაკაცის მიმართ შედარებით მსუბუქი გადაწყვეტილება მიიღო. მოსამართლემ რიპლს ექვსთვიანი შინაპატიმრობა, 50 საათი საზოგადოებრივი სამუშაო და სამწლიანი პირობითი მსჯავრი შეუფარდა. გარდა ამისა, მას დაეკისრა ბანკისთვის 227,27 დოლარის ანაზღაურება და 100 დოლარის გადარიცხვა დანაშაულის მსხვერპლთა ფონდში.

საქმე იმ დროისთვის მსოფლიო მედიის ყურადღების ცენტრში აღმოჩნდა და დღემდე ხშირად მოჰყავთ მაგალითად, როგორც ერთ-ერთი ყველაზე პარადოქსული სასამართლო ისტორია — როდესაც ბრალდებულს ციხეში მოხვედრა სურდა, თუმცა მოსამართლემ იგი შინ დაბრუნება აიძულა.