20 ოპოზიციური პარტია საარჩევნო სისტემასთან დაკავშირებით მოლაპარაკებებში ახალ პირობებს აყენებს

15:45 06-30-2019
112

საპარლამენტო და არასაპარლამენტო ოპოზიცია საარჩევნო სისტემასთან დაკავშირებით საკონსტიტუციო ცვლილებებზე ხელისუფლებასთან დიალოგისთვის მზად არის, თუმცა მმართველ გუნდს საკუთარ პირობებს უყენებს. 

ამ საკითხზე დღეს ოპოზიციის წარმომადგენლებმა, მათ შორის ევროპული საქართველოს და ნაციონალური მოძრაობის ლიდერებმა, ჯამში 20-მა პარტიამ ერთობლივი განცხადება გააკეთა. 

„ჩვენ, 20 პოლიტიკურ ორგანიზაციას კარგა ხანია წარდგენილი გვაქვს საქართველოს პარლამეტში გაცილებით უფრო მეტი ხელმოწერა, 300 000-მდე ხელმოწერა ჩვენი მოქალაქეებისა, საკონსტიტუციო ცვლილებებთან დაკავშირებით, რომლებიც ითვალისწინებს ასევე პროპორციულ წესით არჩევნების ჩატარებას, 3%-იანი ბარიერით და უახლოეს დღეებში აღნიშნული საკითხი პასუხგაცემული უნდა იყოს პარლამენტის მხრიდან ჩვენდამი. ამიტომ, პირველ რიგში ჩვენ, ოპოზიციური პოლიტიკური პარტიების წარმომადგენლები, როგორც საპარლამენტო, ასევე არასაპარლამენტო ოპოზიციიდან ვაცხადებთ, რომ პირველ რიგში დარეგისტრირდეს, როგორც საინიციატივო ჯგუფის მიერ, ანუ ჩვენ მიერ ინიცირებული კანონპროექტი. ასევე „ქართული ოცნების“ მიერ დარეგისტრირებული კანონპროექტი საქართველოს პარლამენტში. მეორე, სასწრაფოდ და გადაუდებლად შეიქმნას საკონსტიტუციო ცვლილებისათვის საერთო სახალხო განხილვის კომისია, ანუ ფორმატი, რომელიც იქნება იდეალური საშუალება იმ დიალოგის საწარმოებლად, რაც განაცხადა „ქართულმა ოცნებამ“ და სადაც მოხდება ჩვენი, შეიძლება მცირედი, მაგრამ განსხვავებული პოზიციების დაახლოება. მესამე, შევეცადოთ, აღნიშნული კომისია იყოს მაქსიმალურად წარმომადგენლობითი, მასში ბუნებრივია, შევლენ ხელისუფლების წარმომადგენლები, საპარლამენტო ოპოზიციის წარმომადგენლები, არასაპარლამენტო ოპოზიციისა და საზოგადოების წარმომადგენლები. არ არის გამორიცხული, რომ შევთავაზოთ კარგი იქნება, რომ შევთავაზოთ, აღნიშნული კომისიის წევრობა იმ საპროტესტო ტალღის წარმომადგენელსაც, რომელმაც თავისი წვლილი შეიტანა აღნიშნულ გარღვევაში. ეს არის ჩვენი მკაფიო, ჩამოყალიბებული პოზიცია, რომ მზად ვართ დიალოგისათვის. მზად ვართ იმისათვის, რომ ჩვენი წინადადება, ჩვენი პაკეტი და ხელისუფლების მიერ შემოთავაზებული პაკეტი შევაჯეროთ და ერთ მთლიან დოკუმენტად ვაქციოთ და 2020 წლის არჩევნები ყოველგვარი კითხვის ნიშნის გარეშე იყოს ჩატარებული,“- განაცხადა „ახალი მემარჯვენეების“თავმჯდომარემ მამუკა კაციტაძემ.