კბილების მდგომარეობა შეიძლება ნაადრევი სიკვდილის რისკზე მიანიშნებდეს - ახალი კვლევა

მეცნიერები სულ უფრო ხშირად საუბრობენ იმაზე, რომ კბილების რაოდენობა და მათი მდგომარეობა ადამიანის სიცოცხლის ხანგრძლივობასთანაა დაკავშირებული.

იაპონიაში ჩატარებულმა ახალმა კვლევამ აჩვენა, რომ მნიშვნელობა აქვს არა მხოლოდ დაკარგული კბილების რაოდენობას, არამედ იმასაც, რამდენი კბილია ჯანსაღი ან სტომატოლოგიურად აღდგენილი.

მკვლევრებმა 75 წელს გადაცილებული 190 ათასზე მეტი ადამიანის ჯანმრთელობისა და სტომატოლოგიური მონაცემები გააანალიზეს.

შედეგების მიხედვით, ჯანსაღი და დაპლომბილი კბილები თანაბრად უკავშირდება შედარებით დაბალ სიკვდილიანობას, ხოლო დაკარგული და კარიესული კბილების რაოდენობის ზრდასთან ერთად სიკვდილის რისკიც მატულობს.

სპეციალისტების აზრით, კბილის დაკარგვამ ან კარიესმა შეიძლება ქრონიკული ანთება გამოიწვიოს, რაც ორგანიზმის სხვა სისტემებზეც აისახება. გარდა ამისა, ნაკლები კბილის ქონა ართულებს ღეჭვას და შესაძლოა კვების რაციონიც გააუარესოს.

მსგავსი შედეგები სხვა კვლევებმაც დაადასტურა: ხანდაზმულ ადამიანებში, რომლებსაც პირის ღრუს პრობლემები ერთდროულად რამდენიმე მიმართულებით ჰქონდათ, ნაადრევი სიკვდილისა და მუდმივი მოვლის საჭიროების რისკი მნიშვნელოვნად მაღალი აღმოჩნდა.

მკვლევრები აღნიშნავენ, რომ პირის ღრუს მოვლა მხოლოდ ესთეტიკის საკითხი არ არის — ჯანსაღი და დროულად აღდგენილი კბილები შესაძლოა სიცოცხლის გახანგრძლივებასაც უწყობდეს ხელს.