კახა კალაძე

კახა კალაძე საქართველოში ისრაელის ელჩს შეხვდა

თბილისის მერი კახა კალაძე საქართველოში ისრაელის საგანგებო და სრულუფლებიან ელჩს, ვალიდ აბუ ჰაიას შეხვდა. ინფორმაციას თბილისის მერიის პრესსამსახური ავრცელებს.მათივე ცნობით, თბილისის მერიაში გამართულ გაცნობითი ხასიათის შეხვედრაზე საუბარი შეეხო საქართველოსა და ისრაელს შორის არსებული პოზიტიური ურთიერთობების კიდევ უფრო გაღრმავების პერსპექტივებს. დედაქალაქის მერმა იმედი გამოთქვა, რომ აღნიშნული შეხვედრა ამ საკითხში მნიშვნელოვან წვლილს შეიტანს.„ჩვენი მეგობრობა უკვე 26 საუკუნეს ითვლის. საქართველოსთვის ისრაელი ძალიან ძვირფასია და მე დარწმუნებული ვარ, თქვენ ძალიან დიდ წვლილს შეიტანთ ჩვენი ურთიერთობების გაღრმავებაში. მინდა, წარმატებები გისურვოთ. ჩვენ მზად ვართ ურთიერთობებისთვის. შეგიძლიათ, ნებისმიერ თემაზე პირადად მომმართოთ“, – განაცხადა კახა კალაძემ.თავის მხრივ, ისრაელის ელჩმა, ვალიდ აბუ ჰაიამ კახა კალაძეს თბილისის მერად მესამე ვადით არჩევა მიულოცა და სამომავლო საქმიანობაში წარმატება უსურვა.„გილოცავთ არჩევნებში გამარჯვებას. დიდი სურვილი მაქვს, გამონახოთ დრო და ეწვიოთ ისრაელს ოფიციალური ვიზიტით. დარწმუნებული ვარ, იერუსალიმის, თელ-ავივისა და ჩვენი სხვა ქალაქების მერები ბედნიერები იქნებიან თქვენი ვიზიტით. ვარკვირდები რა თბილისს, ვხედავ ძალიან დიდ მსგავსებას იერუსალიმთან კულტურული და ისტორიული თვალსაზრისით. ჩვენ გვაქვს ჩვენს ქალაქებს შორის ურთიერთობების დიდი პოტენციალი. ასევე, თელ-ავივი არის განვითარებული, ინოვაციური და მაღალტექნოლოგიური ქალაქი. დარწმუნებული ვარ, თანამშრომლობისთვის ბევრ შეხების წერტილს მოვნახავთ. მოხარული ვარ, რომ აქ ვიმყოფები, რადგან თბილისში თავს ისე ვგრძნობ, როგორც საკუთარ სახლში“, – განაცხადა ისრაელის ელჩმა.შეხვედრაზე ორივე მხარემ გამოხატა სრული მზაობა თანამშრომლობისა და მეგობრობისთვის.

საზოგადოება • 1762429326

შარტავას სახელობის სკვერის რეაბილიტაცია დასრულდა, განახლებულია ყაზბეგის გამზირზე მდებარე კიდევ ერთი სკვერი

თბილისის მერიის გარემოს დაცვის საქალაქო სამსახურმა, ვაკის რაიონში, ყიფშიძის ქუჩაზე დაასრულა შარტავას სახელობის სკვერის რეაბილიტაცია, რომელიც ერთი ჰა ფართობს მოიცავს. ასევე, განახლდა ამავე ქუჩაზე, №7გ კორპუსის მიმდებარედ არსებული სკვერი.სამუშაოების ფარგლებში, მოეწყო საფეხმავლო ბილიკი, გარე განათების სისტემა, ორი დასასვენებელი პავილიონი, საბავშვო და სპორტული მოედნები. შარტავას სახელობის სკვერში არსებულ სპორტულ მოედანს ჩაუტარდა დემონტაჟი და მის ადგილას მოეწყო თანამედროვე ტიპის კომბინირებული, ფეხბურთისა და კალათბურთის მოედანი.რეაბილიტირებული სკვერები დედაქალაქის მერმა კახა კალაძემ ვიცე-მერ გიორგი ტყემალაძესთან ერთად დაათვალიერა.„ყიფშიძის ქუჩაზე შარტავას სახელობის სკვერის რეაბილიტაცია განხორციელდა. სამუშაოების ფარგლებში, რეაბილიტაცია ჩაუტარდა საფეხბურთო მოედანს. აქ იყო უკანონო შემოღობვები და ფარეხები. მინდა, მადლობა გადავუხადო ადგილობრივ მოსახლეობას თანამშრონლობისთვის, რადგან მათი უშუალო ჩართულობით და მონაწილეობით განხორციელდა ამ შემოღობვებისა და ფარეხების დემონტაჟი. საკმაოდ დიდი ტერიტორია გამოთავისუფლდა, რომელიც აღნიშნულ საპარკო სივრცეს შეუერთდა. სკვერში განთავსდა მოსასვნებელი პავილიონები, ატრაქციონები ბავშვებისთვის, სავარჯიშოები, ძაღლების სასეირნო სივრცე, დაირგო ხე-მცენარეები. აღნიშნული ქუჩისთვის ამ პროექტის განხორციელება ძალიან მნიშვნელოვანი იყო. ჩვენ გავაგრძელებთ რეკრეაციული არეალების მოწყობას ქალაქის სხვადასხვა რაიონსა და უბანში“, - განაცხადა კახა კალაძემ.აღსანიშნავია, რომ ორივე სკვერის ტერიტორიაზე ჩატარდა გამწვანების სამუშაოები, მოეწყო სარწყავი სისტემა, დაირგო 2 829 ძირი სხვადასხვა სახეობის ნერგი და 5 900 კვადრატულ მეტრ ფართობზე დაიგო ბალახის საფარი. ასევე, განთავსდა საპარკო ავეჯი და მოეწყო სასმელი წყლის შადრევანი.აღნიშნული სამუშაოები თბილისის მერიის ბიუჯეტიდან დაფინანსდა. მისი საერთო ღირებულება 3 მილიონ ლარს შეადგენს.ადგილზე ასევე იმყოფებოდნენ თბილისის მერის მოადგილე ანდრია ბასილაია, გარემოს დაცვის საქალაქო სამსახურის უფროსი პაატა ტოგონიძე და ვაკის რაიონის გამგებელი ლევან ყიფიანი.

პოლიტიკა • 1762428942

კახა კალაძე: ჩვენ არავის ვესხმით თავს, საქართველოს ხელისუფლება მზად არის, ღიად მოხდეს ამერიკასთან ურთიერთობების გადახედვა

საქართველოს ხელისუფლება მზად არის, ღიად მოხდეს ამერიკასთან ურთიერთობების გადახედვა, – ამის შესახებ თბილისის მერმა, კახა კალაძემ განაცხადა.მისივე განმარტებით, საქართველოს ხელისუფლება პრეზიდენტ ტრამპს და მის ადმინისტრაციას გულშემატკივრობენ მთავარი დაპირებების შესრულებაში, რაც გულისხმობს „დიფ სთეითის“ დამარცხებასა და უკრაინაში ომის დასრულებას.„პრეზიდენტი ტრამპი როდესაც აირჩიეს, ჩვენ გავიზიარეთ ის ნარატივი, რაზეც ის საუბრობდა – „დიფ სთეითს“ დაამარცხებდა და უკრაინაში ომს დაასრულებდა. ჩვენ ველოდებით, ვაკვირდებით. როგორც კი „დიფ სთეითი“ დამარცხდება, ჩვენც ვიგრძნობთ ამას. არავის ვესხმით თავს, ვიცავთ საკუთარ ქვეყანას. როდესაც დაფინანსებებზე ვსაუბრობდით, მაგალითად, გახსოვთ, USAID აფინანსებდა, 2020 წელს კამპანია ჰქონდათ გაჩაღებული, თითქოს არჩევნები გაყალბდა. რეალურად თვითონ გააყალბეს ეს კვლევები. ვისგან იყო ეს დაფინანსება წამოსული. იგივენაირად იყო ჩართული „ნედი“, ოღონდ აფინანსებდა ძალადობრივ ჯგუფებს. ჩვენ ამის წინააღმდეგნი ვართ. გვინდა ჯანსაღი ურთიერთობები, მეგობრობა, რაც ორმხრივია“, – განაცხადა კახა კალაძემ.მისივე თქმით, საქართველოს ხელისუფლება მზად არის ურთიერთობების გასაახლებლად, თუმცა არ დაუშვებს იმ მუქარებსა და განცხადებებს, რაც წინა ადმინისტრაციის პირობებში საქარეთველოსადმი კეთდებოდა.„რამდენიმე თვის წინ, თუნდაც ტრამპი სანამ გახდებოდა პრეზიდენტი ვამბობდით, რომ თანხები შემოდის უცხოეთიდან, ფინანსდება ექსტრემისტული ორგანიზაციები, ხმარდება შიდაპოლიტიკურ საქმიანობას, რევოლუციების მოწყობას. ამაზე ოპონენტები ამბობდნენ, რომ ჩვენ ვტყუოდით. შემდეგ გამოვიდა ამერიკის შეერთებული შტატების პრეზიდენტი და ღიად ისაუბრა იმაზე, რასაც ამ წლების განმავლობაში ვსაუბრობდით. პირდაპირ უთხრა მსოფლიოს, რომ სხვადასხვა ქვეყანაში, მათ შორის საქართველოში, ეს ორგანიზაციები თანხებს აგზავნიდნენ სახელმწიფო გადატრიალებები რომ მოხმდარიყო. საქართველოს ხელისუფლება მზად არის, ღიად მოხდეს ურთიერთობების გადახედვა. წინა ადმინისტრაციის პერიოდში რა მუქარებსაც ვისმენდით, მიუღებელია. ჩვენ დამოუკიდებელი ქვეყანა ვართ, რისთვისაც ჩვენმა წინაპრებმა იბრძოლეს და მოიპოვეს თავისუფლება, არავისზე დამოკიდებულები რომ არ ვყოფილიყავით“, – აღნიშნა კახა კალაძემ.ცნობისთვის, აშშ-ის სენატორებმა, ჯინ შაჰინმა, როჯერ უიკერმა, ჯონ კურტისმა და შელდონ უაითჰაუსმა, ასევე კონგრესმენებმა ჯო უილსონმა და სტივ კოენმა აშშ-ის სახელმწიფო მდივანს, მარკო რუბიოს ორპარტიული წერილი გაუგზავნეს, რომელშიც ადმინისტრაციას მოუწოდებენ, დაიცვას აშშ-ის ყოფილი თანამშრომლები, რომლებიც ქართველი ოფიციალური პირების მიერ ანტიამერიკული რიტორიკის შემაშფოთებელი ზრდის ფონზე უსამართლოდ გახდნენ სამიზნეები.წერილში კანონმდებლები მოუწოდებენ, რომ მდივანმა რუბიომ საქართველოს ხელისუფლებისგან მიიღოს გარანტიები, რომ აშშ-ის საერთაშორისო განვითარების სააგენტოს საგარეო სამსახურის ყოფილ თანამშრომლებსა და სხვა პერსონალს არ დასწამებენ ცილს და არ გახდებიან სამიზნეები.

პოლიტიკა • 1762427405

კახა კალაძე: ჯანსაღად მოაზროვნე ხალხი საკუთარ თავში ეძებს მარცხის მიზეზს, ეს უსამშობლოები კი ხალხს აბრალებენ ყველაფერს

როდესაც რაღაცას არასწორად აკეთებ, რაღაც არ გამოგდის, შეცდომას უშვებ, ნორმალური ადამიანი აკეთებს ანალიზს, ეს ოპოზიციური, უსამშობლო ადამიანების წარმომადგენლები კი ქართველ ხალხს აბრალებენ ყველაფერს, - ასე პასუხობს თბილისის მერი კახა კალაძე ჟურნალისტებთან საუბრისას „ლელო-ძლიერი საქართველოს“ ერთ-ერთი ლიდერის ალეკო ელისაშვილის განცხადებას იმასთან დაკავშირებით, რომ ოპოზიციის მიერ თვითმმართველობის არჩევნების ბოიკოტი „შემოგდებული რუსული სპეცოპერაცია იყო“.„მგონი, ჩვენ არ უნდა დავკავდეთ მათი განცხადებების შეფასებებით. შედეგი ხომ ყველამ კარგად ვიცით. ის, რომ მათ არ მიიღეს მონაწილეობა საპარლამენტო ცხოვრებაში, ეს იყო ძალიან დიდი მარცხი მათთვის. ის, რომ არჩევნებში ვიღაცებმა არ მიიღეს მონაწილეობა, ვიღაცებმა კი მიიღეს, ესეც, რა თქმა უნდა, დამანგრეველი იყო მათთვის. როდესაც რაღაცას არასწორად აკეთებ, რაღაც არ გამოგდის, შეცდომას უშვებ, ნორმალური ადამიანი აკეთებს ანალიზს. ყველგან ასეა, ბიზნესში, სპორტში, პოლიტიკაში, მით უმეტეს. როდესაც რაღაცას აკეთებ და შედეგს ვერ იღებ, ჯანსაღად მოაზროვნე ხალხი ჯდება და ფიქრობს, რა იყო ის მიზეზი, რამაც აქამდე მიიყვანა. პირველ რიგში, საკუთარ თავში ეძებენ მიზეზს ჯანსაღად მოაზროვნე ადამიანები.ჩვენ თუ გადავხედავთ ამ ოპოზიციური, უსამშობლო ადამიანების წარმომადგენლებს, ქართველ ხალხს აბრალებენ ყველაფერს, ყველაფერში დამნაშავე არის ქართველი ხალხი, თვითონ ყველაფერს საუკეთესოდ აკეთებენ, ყველაფერს საუკეთესოდ ალაგებენ, მხოლოდ და მხოლოდ ქართველი ხალხია დამნაშავე. ეს არის დღევანდელი მოცემულობა. როდესაც შენ ხარ უსამშობლო, ხარ აგენტი, როდესაც გარედან იღებ დავალებას, ასეთი პოლიტიკური პარტიები, პოლიტიკოსები განწირულები არიან მარცხისთვის და ვერასდროს შედეგს ვერ მიიღებენ“, - განაცხადა კახა კალაძემ.

პოლიტიკა • 1762427287

არ ვიცნობ ხაზარაძის დეკლარაციას, ეს არ არის ჩემი საქმე, თუმცა, განსაკუთრებით პოლიტიკოსები, მაქსიმალური სიზუსტით ვავსებთ ხოლმე დეკლარაციას - კახა კალაძე ხაზარაძის დაჯარიმებაზე

თბილისის მერის კახა კალაძის განცხადებით, ხაზარაძის დეკლარაციას არ იცნობს, რადგან ეს მისი საქმე არ არის, თუმცა მისი შეფასებით, პოლიტიკოსები დეკლარაციას განსაკუთრებით დიდი ყურადღებით უნდა ავსებდნენ.კალაძის თქმით, გერმანიის ელჩმა საზოგადოებას თავი ექსტრემისტული და მოძალადე ჯგუფების მხარდამჭერი განცხადებებით დაამახსოვრა, ასევე ბევრი კითხვის ნიშანი იყო მის საცხოვრებელ ფართთან დაკავშირებით."არ ვიცნობ ხაზარაძის დეკლარაციას, ეს არ არის ჩემი საქმე. თუმცა, პოლიტიკოსები განსაკუთრებით, მაქსიმალური სიზუსტით ვავსებთ ხოლმე დეკლარაციას. ელჩი, რომელიც უნდა იყოს აბსოლუტურად დამოუკიდებელი, არ უნდა ერეოდეს ქვეყნის შიდა პოლიტიკურ საქმეებში, გერმანიის ელჩმა დაგვამახსოვრა თავი თავისი განცხადებებით, რომელიც ძირითადად აღვივებდა სიძულვილს, ექსტრემიზმს ქვეყანაში, ახალისებდა ძალადობრივ ჯგუფებს და ეს, რა თქმა უნდა, ძალიან მძიმეა. ბევრი კითხვის ნიშნები იყო, თუნდაც მის საცხოვრებელ ფართთან დაკავშირებით. უამრავი მოთხოვნა იყო, რომ გამხდარიყო ეს ყველაფერი საჯარო, გამჭვირვალე, მაგრამ უშედეგოდ", - განაცხადა კახა კალაძემ.

პოლიტიკა • 1762427156

კახა კალაძე: არჩევანი, რომელიც ჩვენმა ხალხმა გააკეთა, არის ევროპული კანონები და არა ევროპული ბიუროკრატია

როდესაც სხვადასხვა საერთაშორისო ორგანიზაციის მხრიდან ქვეყნის ჯანსაღი შეფასება ხდება პოლიტიკის გარეშე, საქართველო ყოველთვის მოწინავე ქვეყანაა, ხოლო როგორც კი პოლიტიკური ნარატივი შემოდის, მაშინვე ვისმენთ სიცრუეს და მუქარას, – ამის შესახებ დღეს თბილისის მერმა ევროკავშირის გაფართოების შესახებ ევროკომისიის ანგარიშზე საუბრისას განაცხადა.მისი თქმით, არჩევანი, რომელიც ქართელმა ხალხმა გააკეთა, არის არა ევროპული ბიუროკრატია, არამედ სამართლიანობა, ობიექტური დამოკიდებულება, ქართველი ხალხისა და საქართველოს პატივისცემა.„განცხადებებს, რასაც ვისმენთ, ძირითადად, სიცრუით არის გაჯერებული, ყველაფერი დაფუძნებულია ტყუილზე. როდესაც ხდება სხვადასხვა საერთაშორისო ორგანიზაციის მხრიდან ქვეყნის ჯანსაღი შეფასება პოლიტიკის გარეშე, რა თქმა უნდა, საქართველო ყოველთვის არის მოწინავე ქვეყანა კანდიდატ ქვეყნებს შორის და თუნდაც ზოგიერთ ევროპულ სახელმწიფოზე წინ არის რეფორმების განხორციელების თვალსაზრისით, ეკონომიკური განვითარებით, ბიზნესის კეთების სიმარტივით და ბევრი სხვა კრიტერიუმია, სადაც საქართველო მოწინავეა. როგორც კი პოლიტიკური ნარატივი შემოდის, რა თქმა უნდა, მაშინვე ვისმენთ სიცრუესა და მუქარას. ბევრჯერ გაგვიკეთებია განცხადება იმასთან დაკავშირებით, რომ არჩევანი, რომელიც ჩვენმა ხალხმა გააკეთა, ეს არ არის ევროპული ბიუროკრატია“, – განაცხადა კახა კალაძემ.მისივე შეფასებით, პირველ რიგში, საჭიროა სამართლიანი დამოკიდებულება ქვეყნის, ქართველი ხალხისა და ქართული სახელმწიფოს მიმართ.„ჩვენ ბევრს ვსაუბრობთ ევროპულ მომავალზე, თუმცა, პირველ რიგში, გვჭირდება სამართლიანობა და სამართლიანი დამოკიდებულება, ქვეყნის, ქართველი ხალხისა და ქართული სახელმწიფოს პატივისცემა. გვინდა ქვეყანაში ევროპული კანონებით ცხოვრება და არა ევროპული ბიუროკრატია, რასაც ბოლო წლების განმავლობაში ვხედავთ, რომელიც ძალიან მძიმე მდგომარეობაშია. მათ მიერ გაკეთებული განცხადებები მხოლოდ და მხოლოდ ტყუილი და სიცრუეა, წახალისებაა ბოროტებისა და ძალადობრივი ჯგუფების. ჩვენ, რა თქმა უნდა, ასეთი ევროპა არ აგვირჩევია“, – აღნიშნა კახა კალაძემ.სასამართლო სისტემის დამოუკიდებლობას რაც შეეხება, თბილისის მერი აცხადებს, რომ მთელი კამპანია იყო გაჩაღებული, რომ „როგორმე სასამართლო სისტემა ჯიბეში ჩაედოთ“.„არ გამოვა, მეგობრებო, სასამართლო და ქვეყანა იქნება დამოუკიდებელი. ჩვენ შევინარჩუნებთ ჩვენს სუვერენიტეტს. ერთია, რას საუბრობენ საქართველოსთან დაკავშირებით და მეორეა ფაქტი. ფაქტი ის არის, რომ ქვეყანა წინ მიდის, ეკონომიკა ვითარდება, მიუხედავად მოწოდებებისა და მუქარებისა, ჩვენი პრინციპული პოზიციით და ქვეყნის ინეტერესებიდან გამომდინარე, შევინარჩუნეთ მშვიდობა, რასაც მოაქვს ქვეყნის ეკონომიკური განვითარება“, – აღნიშნა კახა კალაძემ.

პოლიტიკა • 1762426079

კახა კალაძე: ყველა შეფასებით, რომელიც პოლიტიკის გარეშე კეთდება, რა თქმა უნდა, საქართველო მოწინავე ქვეყანაა ყველა კრიტერიუმით

"ყველა შეფასებით, რომელიც პოლიტიკის გარეშე კეთდება, რა თქმა უნდა, საქართველო მოწინავე ქვეყანაა ყველა კრიტერიუმით“, - ამის შესახებ თბილისის მერმა კახა კალაძემ "ჩენდლერის ინსტიტუტის“ მიერ გამოქვეყნებული რეიტინგის შეფასებისას განაცხადა, რომლის მიხედვითაც, საქართველოს მთავრობა ევროპის საუკეთესო სამეულშია.მისი თქმით, როგორც კი პოლიტიკური ნარატივი შემოდის, მაშინვე იწყება განცხადებები ქვეყნის წინააღმდეგ, თითქოს საქართველო დემოკრატიული თვალსაზრისით უკან მიდის."ყველა შეფასებით, რომელიც კეთდება პოლიტიკის გარეშე, რა თქმა უნდა, საქართველო არის მოწინავე ქვეყანა ყველა კრიტერიუმით: რეფორმების განხორციელება, ეკონომიკური განვითარება, ბიზნესის სიმარტივის მაჩვენებელი, გამჭვირვალობა და ა.შ. როგორც კი პოლიტიკური ნარატივი შემოდის, მაშინვე იწყება ცრუ განცხადებები ქვეყნის წინააღმდეგ, თითქოს საქართველო დემოკრატიული თვალსაზრისით უკან მიდის. ამ განცხადებებს ვისმენთ ვისგან? - ესენი არიან ის ადამიანები, რომლებიც 2012 წლამდე არსებულ რეჟიმს და პერიოდს დემოკრატიის შუქურად მოიხსენიებდნენ, ხოლო დღევანდელ მოცემულობას აფასებენ, როგორც დემოკრატიის თვალსაზრისით უკანგადადგმულ ნაბიჯად. ეს არის რეალობა. ხალხი ამ ყველაფერს ხომ ხედავს და აფასებს? საკუთარ თავზე გრძნობს, რა იყო მანამდე და დღეს რა ვითარება გვაქვს. შესაბამისად, საზოგადოების დამოკიდებულება გამოიხატება არჩევნებზე და იქ მიღებულ გადაწყვეტილებებზე," - განაცხადა კახა კალაძემ.

პოლიტიკა • 1762418272

მომდევნო 4 წელი იქნება ძალიან მნიშვნელოვანი, ჩვენ დაგეგმილი გვაქვს მნიშვნელოვანი პროექტები, გვაქვს საკმაოდ ამბიციური გეგმები - კახა კალაძე

დედაქალაქის მთავრობის ახალი შემადგენლობის პირველი სხდომა - თბილისის მერმა საკრებულოს მხარდაჭერისთვის მადლობა გადაუხადა და განაცხადა, რომ დედაქალაქის განვითარების მომდევნო 4 წლიანი სტრატეგია გაწერილია.კახი კალაძის თქმით, განახლებული ინფრასტრუქტურით, ახალი რეკრეაციული სივრცეებით და მოწესრიგებული ტრანსპორტით თბილისი, მომდევნო წლებში, კიდევ უფრო განვითარდება."მომდევნო 4 წელი იქნება ძალიან მნიშვნელოვანი. ჩვენ დაგეგმილი გვაქვს საკმაოდ მნიშვნელოვანი პროექტები, გვაქვს საკმაოდ ამბიციური გეგმები და დარწმუნებული ვარ, თქვენი ჩართულობით, მხარდაჭერით, ჩვენი დედაქალაქი მომდევნო 4 წლის შემდეგ იქნება კიდევ უფრო უკეთესი, მოწესრიგებული, გამართული საზოგადოებრივი ტრანსპორტით, რაც შეიძლება მეტი გამწვანებული და რეკრეაციული არეალებით, ახალი საბავშვო ბაღებით, ახალი დიზაინის ქუჩებით, გამზირებით, თავისი მიწისქვეშა, განახლებული კომუნიკაციებით. რა თქმა უნდა, ეტაპობრივად, საზოგადოებას მივაწვდით ყველა პროექტთან დაკავშირებით ინფორმაციას, თუ რის გაკეთებას ვაპირებთ", - განაცხადა კახა კალაძემ.

პოლიტიკა • 1762418088

კახა კალაძე: სახელმწიფო ტერიტორიების მიტაცება და უკანონო სამშენებლო საქმიანობა არ უკავშირდება სოციალურ საკითხს - ეს ორგანიზებული დაჯგუფებებია, რომლებიც კანონსაწინააღმდეგო ქმედებას ახორციელებენ

სახელმწიფო ტერიტორიების მიტაცება და მასზე უკანონო სამშენებლო საქმიანობის წარმოება, აღნიშნული ტერიტორიების დასაკუთრების მიზნით, მნიშვნელოვან გამოწვევად რჩება, - განაცხადა დღეს თბილისის მუნიციპალიტეტის მთავრობის სხდომაზე დედაქალაქის მერმა კახა კალაძემ და მოსახლეობას მოუწოდა, არ ჩაერთონ ამ ტიპის გარიგებებსა და ქმედებებში.როგორც კახა კალაძემ განაცხადა, აღნიშნული უკანონო საქმიანობა სისტემურ და ორგანიზებულ ხასიათს ატარებს და არ უკავშირდება არანაირ სოციალურ საკითხს.„როგორც მოგეხსენებათ, სახელმწიფოსა და მუნიციპალიტეტის საკუთრებაში არსებულ მიწებზე უკანონო სამშენებლო საქმიანობის აღკვეთა და ქაოსური განაშენიანების აკრძალვა ჩვენთვის ერთ-ერთი უმნიშვნელოვანესი პრიორიტეტია. სახელმწიფო ტერიტორიების მიტაცება და მასზე უკანონო სამშენებლო საქმიანობის წარმოება, აღნიშნული ტერიტორიების დასაკუთრების მიზნით, დღესაც მნიშვნელოვან გამოწვევად რჩება. ხშირ შემთხვევაში, უკანონო მშენებლობები სარეკრეაციო და სატყეო ზონებში ხორციელდება, რაც ასევე იწვევს მწვანე ნარგავების დაზიანება/გაჩეხას. აღნიშნული უკანონო საქმიანობა სისტემურ და ორგანიზებულ ხასიათს ატარებს და არ უკავშირდება არანაირ სოციალურ საკითხს.ძალიან ხშირად ხდება მანიპულირება სოციალური საკითხებით, თუმცა როდესაც გაქვს ასეთი ფაქტები და ვაკეთებთ მოკვლევას, ვლინდება, რომ ეს არის ორგანიზებული დაჯგუფებები, რომლებიც კანონის წინააღმდეგ ახორციელებენ ამ ტიპის ქმედებებს. ჩვენ არაერთხელ გაგვიცხადებია და კიდევ ერთხელ მოვუწოდებთ ყველას, დაიცვან კანონი და არ მიიღონ მონაწილეობა უკანონო საქმიანობაში, დაემორჩილონ ჩვენი სამსახურების კანონიერ მოთხოვნებს და მითითებებს. წინააღმდეგ შემთხვევაში, მუნიციპალური ინსპექცია იმოქმედებს კანონის შესაბამისად“, - განაცხადა თბილისის მერმა.მისი თქმით, მხოლოდ 2025 წელს ინსპექციის მიერ გამოვლენილია 1 305 სამშენებლო სამართალდარღვევა.„სახელმწიფო მიწებზე უკანონო სამშენებლო საქმიანობის აღკვეთის მიზნით, მუნიციპალური ინსპექციის მიერ სამართალდამცავ ორგანოებთან ერთად, ჩატარებულია 70-ზე მეტი სპეციალური ღონისძიება; დემონტაჟი ჩაუტარდა 300-ზე მეტ უკანონოდ აშენებულ შენობა/ნაგებობას; გამოთავისუფლებულია ათეულობით ჰექტარი სახელმწიფო და მუნიციპალიტეტის საკუთრებაში არსებული მიწა, მათ შორის, რეკრეაციულ და სატყეო ზონები“, - აღნიშნა კახა კალაძემ.ამასთანავე, მან ხაზი გაუსვა, რომ ამ მიმართულებით ინტენსიური ღონისძიებები და ქმედითი რეაგირება გაგრძელდება და არცერთი უკანონო მშენებლობის თუ სახელმწიფო მიწის მიტაცების ფაქტი რეაგირების გარეშე არ დარჩება.„კიდევ ერთხელ მინდა ვთხოვო და მოვუწოდო ყველას, არ ჩაერთოთ ამ ტიპის გარიგებებსა და ქმედებებში იმიტომ, რომ სახელმწიფოს მხრიდან ამას მოჰყვება შესაბამისი რეაგირება კანონის ფარგლებში“, - განაცხადა კახა კალაძემ.დედაქალაქის მერმა მადლობა გადაუხადა თბილისის მუნიციპალური ინსპექციის ხელმძღვანელს და მის თითოეულ თანამშრომელს, ასევე, შესაბამის სამართალდამცავ უწყებებს გაწეული მხარდაჭერისა და თანამშრომლობისთვის.

საზოგადოება • 1762415519

სამგორის რაიონში ძველი საბაგირო გზის რეკონსტრუქცია/მშენებლობის საპროექტო-სახარჯთაღრიცხვო დოკუმენტაციის შედგენასა და სამშენებლო/სამონტაჟო სამუშაოების შესყიდვაზე ბაზრის კვლევა გამოცხადდა

„თბილისის სატრანსპორტო კომპანიამ“ სამგორის რაიონში არსებული ძველი საბაგირო გზის რეკონსტრუქცია/მშენებლობის საპროექტო-სახარჯთაღრიცხვო დოკუმენტაციის შედგენისა და სამშენებლო/სამონტაჟო სამუშაოების ე.წ. Design-Build მეთოდით შესყიდვის მიზნით ბაზრის კვლევა გამოაცხადა.როგორც თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა, აღნიშნული საბაგირო გზის მშენებლობა ერთ-ერთი მნიშვნელოვანი წინგადადგმული ნაბიჯი იქნება თბილისის სატრანსპორტო პოლიტიკის განვითარების პოლიტიკაში.„დედაქალაქში საზოგადოებრივი ტრანსპორტის ქსელის გაუმჯობესებისთვის ერთ-ერთი უმნიშვნელოვანესი პროექტის განხორციელება იწყება. „თბილისის სატრანსპორტო კომპანიამ“ უკვე გამოაცხადა ბაზრის კვლევა სამგორის რაიონში არსებული ძველი საბაგირო გზის რეკონსტრუქცია/მშენებლობის(არსებული მარშრუტის შენარჩუნებით) საპროექტო- სახარჯთაღრიცხვო დოკუმენტაციის შედგენისა დასამშენებლო/სამონტაჟო სამუშაოების ე.წ. Design-Build მეთოდით შესყიდვის მიზნით. ბაზრის კვლევის შედეგებზედაყრდნობით მომზადდებადა დაუყოვნებლივ გამოცხადდება შესაბამისი ტენდერი. ჩვენი ვარაუდით, აღნიშნული პროექტის განხორციელება შესაძლებელი იქნება, დაახლოებით, 1,5 – 2 წელიწადში“, – განაცხადა კახა კალაძემ.მისივე თქმით, აღნიშნული საბაგირო გზა ჯერ კიდევ 1986 წელს აშენდა, მაგრამ არასათანადო მოვლისა და ექსპლუატაციისშედეგად, საბაგირო გზის ფუნქციონირება 2006 წლიდან შეჩერდა.„დღეისთვის ძველი საბაგირო გზის საინჟინრო დაშენობა-ნაგებობების ტექნიკური მდგომარება ძალიან მძიმეა. ჩვენ ჩავატარეთ შესაბამისი კვლევები და დადგინდა, რომ აღნიშნული ნაგებობების დემონტაჟი უნდა განხორციელდეს, რასაც აუცილებლად გავაკეთებთ.ზემოაღნიშნულის გათვალისწინებით და ვაზისუბნის დასახლებაში მოსახლეობის ზრდის, მუნიციპალური ტრანსპორტის ხელმისაწვდომობის გაუმჯობესებისა და მგზავრობის დროის მნიშვნელოვნად შემცირების მიზნით, მივიღეთ გადაწყვეტილება, იმავე დერეფანში განხორციელდეს ახალი, თანამედროვე საბაგირო გზის მშენებლობა, რომელიც უზრუნველყოფს მინიმუმ 3-ჯერმეტი მგზავრის (არანაკლებ 1 250 მგზავრი/საათში) უმოკლეს ვადაში მიყვანას მეტროსადგურ „სამგორამდე“, – განაცხადა კახა კალაძემ.მისივე თქმით, აღნიშნული საბაგირო ჩაერთვება ერთიან სატრანსპორტოქსელში და მეტროს მოძრაობის გრაფიკის ანალოგიურად მოემსახურება მოსახლეობას.„დედაქალაქის ლანდშაფტის გათვალისწინებით, საბაგირო გზების განვითარება და მშენებლობა, წარმოადგენს სატრანსპორტო პოლიტიკის ერთ-ერთ მნიშვნელოვან მიმართულებას, რაზედაც არაერთხელ განვაცხადეთ. ეტაპობრივად გაგრძელდება სხვა, ანალოგიური პროექტების განხორციელება. საუბარია „სარაჯიშვილი-ზღვის უბნისა“ და „ისანი-ვაზისუბნის“ დამაკავშირებელი საბაგირო გზების მშენებლობაზე“, – აღნიშნა თბილისის მერმა.

პოლიტიკა • 1762414952

თბილისის მერთან პირისპირ შეხვედრების შესახებ დეტალური ინფორმაციის მიღებას მოქალაქეები მერიის ცხელ ხაზზე შეძლებენ

"12 ნოემბრიდან ოთხშაბათის შეხვედრებთან დაკავშირებით მოქალაქეები დეტალური ინფორმაციის მიღებას მერიის ცხელ ხაზზე შეძლებენ", - ამის შესახებ თბილისის მერმა კახა კალაძემ მუნიციპალიტეტის მთავრობის დღევანდელ სხდომაზე განაცხადა.მისივე თქმით, ამ ინიციატივის გარდა მოსახლეობასთან აქტიური კომუნიკაცია ყველა სოციალურ პლატფორმაზე მიმდინარეობს."მინდა, შეგახსენოთ, რომ 12 ნოემბრიდან, ყოველ ოთხშაბათს, თბილისის მერიაში მექნება შეხვედრები მოსახლეობასთან, 16:00-დან 18:00 საათამდე პერიოდში. ჩვენ ისედაც გვაქვს აქტიური კომუნიკაცია მოსახლეობასთან. ვიყენებთ სოციალურ პლატფორმებს, ვესაუბრებით თბილისელებს სამომავლო და მიმდინარე პროექტებზე, არ გავურბივართ პრობლემებსა და გამოწვევებს. ოთხშაბათის შეხვედრებთან დაკავშირებით კი შეგიძლიათ, დარეკოთ მერიის ცხელ ხაზზე, სადაც მოგაწვდიან დეტალურ ინფორმაციას, თუ რა პროცედურებია ამისთვის მანამდე გასავლელი", - განაცხადა კახა კალაძემ.თბილისის მერმა მადლობა გადაუხადა დედაქალაქის მოსახლეობას გამოცხადებული ნდობისთვის და იმედი გამოთქვა, რომ მათი ჩართულობით მომდევნო ოთხ წელში კიდევ უფრო მასშტაბური პროექტები განხორციელდება."განსაკუთრებულ მადლობას გადავუხდი დედაქალაქის მოსახლეობას თანადგომისთვის. ჩვენთვის მნიშვნელოვანია გამოცხადებული ნდობა, რასაც კონკრეტული გაკეთებული საქმეებით დავაბრუნებთ. მომდევნო ოთხ წელში მასშტაბური, ამბიციური პროექტები იგეგმება. თქვენი ჩართულობით ჩვენი დედაქალაქი უკეთესი გახდება, მოწესრიგებული საზოგადოებრივი ტრანსპორტით, მეტი რეკრეაციული სივრცით, ახალი დიზაინის ქუჩებითა და გამზირებით, განახლებული კომუნიკაციებით და ა.შ. ჩემს თანაგუნდელებს კი წარმატებას ვუსურვებ", - აღნიშნა კახა კალაძემ.

საზოგადოება • 1762414904

თბილისის საჯარო ბაგა-ბაღების მართვის სააგენტოს გურამ ოქროპირიძე უხელმძღვანელებს

თბილისის საჯარო ბაგა-ბაღების მართვის სააგენტოს გურამ ოქროპირიძე უხელმძღვანელებს.მუნიციპალიტეტში განხორციელებულ საკადრო ცვლილებაზე ინფორმაცია საზოგადოებას თბილისის მერმა კახა კალაძემ მთავრობის დღევანდელი სხდომიდან მიაწოდა."როგორ მოგეხსენებათ, დაახლოებით, ერთი თვის წინ ჩემს ერთ-ერთ მოადგილედ დაინიშნა კახა აბულაძე, რომელიც მანამდე თბილისის საჯარო ბაგა-ბაღების მართვის სააგენტოს უფროსის თანამდებობას იკავებდა. დღემდე აღნიშნული თანამდებობა ვაკანტური იყო. ამიტომ, ბაგა-ბაღების მართვის სააგენტოს უხელმძღვანელებს გურამ ოქროპირიძე. გურამს გავლილი აქვს შპაიერის საჯარო მმართველობის ინგლისურენოვანი სამაგისტრო პროგრამა, რომელიც თბილისის სახელმწიფო უნივერსიტეტსა და შპაიერის ადმინისტრაციულ მეცნიერებათა უნივერსიტეტის მეშვეობით ხორციელდება. რაც შეეხება სამუშაო გამოცდილებას, გურამ ოქროპირიძე 2021 წლიდან იყო თბილისის მუნიციპალიტეტის VII მოწვევის საკრებულოს წევრი. ასევე, სპორტისა და ახალგაზრდულ საქმეთა კომისიის თავმჯდომარე. მანამდე მუშაობდა კერძო სექტორში", - განაცხადა კახა კალაძემ.დედაქალაქის მერმა ბაგა-ბაღების მართვის სააგენტოს ახალ ხელმძღვანელს მომავალ საქმიანობაში წარმატებები უსურვა."მინდა, მას წარმატებები ვუსურო. საკმაოდ საპასუხისმგებლო და ერთ-ერთი უმნიშვნელოვანესი მიმართულებაა ბაგა-ბაღების გამართული მუშაობა, რადგან საქმე ეხება ჩვენს პატარებს. არაერთხელ მითქვამს, რომ თითოეულ დეტალს ეთმობა განსაკუთრებული ყურადღება. შესაბამისად, ამ დამოკიდებულების გაგრძელება და კიდევ უფრო გაძლიერება ძალიან მნიშვნელოვანია", - აღნიშნა თბილისის მერმა.მისივე თქმით, ბაღების მიმართულებით მომდევნო წლებში კიდევ ბევრი საინტერესო პროექტი განხორციელდება.