მსოფლიო • 1787431120

თავდასხმა სილამაზის სალონში - სამი ქალი სტილისტს თმის ფენით და უთოთი გაუსწორდა (უცხოეთი)

ნაზრანში, სავაჭრო ცენტრ „ფაბრიჩნიში“ მდებარე სილამაზის სალონის თანამშრომელს სამი ქალი დაესხა თავს. კონფლიქტის დროს ისინი ქსლს თმის ფენითა და უთოთი სცემდნენ, ხოლო ჩხუბის ერთ-ერთმა მონაწილემ, სავარაუდოდ, იატაკის მიმართულებით ისროლა. როგორც გაირკვა თავდამსხმელები დაზარალებულს იცნობდნენ. ამის შესახებ ტელეგრამ-არხი Mash Gor წერს.თავდამსხმელები სალონში ორ მამაკაცთან ერთად მივიდნენ. არსებული მონაცემებით, ისინი უშუალოდ ჩხუბში არ ჩარეულან და იქვე იდგნენ. დაზარალებულმა სამედიცინო დახმარებას მიმართა. მას თავის არეში,  სახესა და ლავიწის მიდამოში ჩაქცევები დაუფიქსირდა. პოლიციელებმა შენობაში მასრა იპოვეს და იგი ექსპერტიზაზე გააგზავნეს. მომხდარ ფაქტზე მიმდინარეობს გამოძიება.

საზოგადოება • 1787410871

ოჯახი 22 წლის ლევან ფირცხალაიშვილს ეძებს

ოჯახი საზოგადოებას 22 წლის ლევან ფირცხალაიშვილის სამძებრო სამუშაოებში დახმარებას სთხოვს. არსებული ცნობებით, ახალგაზრდა ბოლოს ბათუმში იმყოფებოდა.ახლობლები მოუწოდებენ ყველას, ვისაც ბოლო დღეების განმავლობაში დაკარგულის შესახებ რაიმე ინფორმაცია აქვს,  თუ სადმე შეამჩნია იგი, დაუყოვნებლივ დაუკავშირდნენ ოჯახს ნომერზე: 598 15 39 16. 

საზოგადოება • 1787383311

დაავადებათა კონტროლის ცენტრი ინფორმაციას ავრცელებს

ზაფხულის პერიოდში მზით დამწვრობის შემთხვევები განსაკუთრებით ხშირია. ულტრაიისფერი გამოსხივების ჭარბი ზემოქმედება კი ჯანმრთელობისთვის არაერთ რისკს უკავშირდება.დაავადებათა კონტროლისა და საზოგადოებრივი ჯანმრთელობის ეროვნული ცენტრი მზისგან თავის დაცვისა და დამწვრობის პრევენციისთვის რეკომენდაციებს ავრცელებს.ნამზეური ულტრაიისფერი სხივების ზემოქმედებით კანის პიგმენტური უჯრედების დაზიანების შედეგია. ხშირი გარუჯვა ზრდის კანის ნაადრევი დაბერების, პიგმენტური ლაქებისა და კანის კიბოს განვითარების რისკს. ულტრაიისფერმა გამოსხივებამ შესაძლოა მხედველობის სერიოზული დარღვევებიც გამოიწვიოს, მათ შორის კატარაქტა, რაც სიბრმავის ერთ-ერთი მთავარი მიზეზია.მზეზე ან სოლარიუმში ჭარბმა დასხივებამ შესაძლოა კანის დამწვრობა გამოიწვიოს. მას შესაძლოა თან ახლდეს კანის სიწითლე და ტკივილი, დაზიანებული უბნის შეშუპება, სითხის შემცველი ბუშტუკები, სხეულის ტემპერატურის მატება, ზოგადი სისუსტე და გულისრევა.ცენტრის რეკომენდაციით, მზით დამწვრობის შემთხვევაში არ უნდა შეეხოთ ან გახეთქოთ წარმოქმნილი ბუშტუკები და უნდა მოერიდოთ მზეზე განმეორებით გასვლას. სამედიცინო დახმარება აუცილებელია, თუ დამწვრობა მიიღო ერთ წლამდე ასაკის ბავშვმა, განვითარდა მაღალი ტემპერატურა, გაჩნდა სითხით სავსე ბუშტუკები და ძლიერი ტკივილი. მზით დამწვრობის მიმართ განსაკუთრებით მგრძნობიარენი არიან ღია ფერის კანის, თმისა და თვალების მქონე ადამიანები, 6 წლამდე ასაკის ბავშვები და 60 წელს გადაცილებული პირები.პრევენციისთვის ცენტრი მოსახლეობას ურჩევს, შეზღუდოს მზეზე ყოფნა, განსაკუთრებით მზის პიკური აქტივობის პერიოდში - შუადღემდე ორი საათით ადრე და ორი საათის შემდეგ. რეკომენდებულია ღია ფერის, ნატურალური ქსოვილისგან დამზადებული თავისუფალი ტანსაცმლის, ფართოფარფლებიანი ქუდისა და მუქი სათვალის ტარება, რომელიც უზრუნველყოფს ულტრაიისფერი სხივებისგან მაღალ დაცვას.ასევე, მნიშვნელოვანია მზისგან დამცავი საშუალებების გამოყენება - რეკომენდებულია SPF 30 ან მეტი დაცვის ფაქტორის მქონე კრემის წასმა მზეზე გასვლამდე 20 წუთით ადრე და მისი განახლება ყოველ ორ საათში ერთხელ.

საზოგადოება • 1787344266

„მსგავსი ფაქტების აღსაკვეთად ყველა შესაძლებლობას გამოვიყენებთ“ - საპატრიარქოს საგანგებო განცხადება

საქართველოს საპატრიარქოს საზოგადოებასთან ურთიერთობის სამსახური, არასრულწლოვანთა აზარტულ თამაშებში ჩართვის ფაქტების შესახებ, საგანგებო განცხადებას ავრცელებს, რომელსაც უცვლელად გთავაზობთ:„ბოლო პერიოდში საქართველოს სხვადასხვა ქალაქში არაერთი შემთხვევა გამოვლინდა, როდესაც საზოგადოებრივი თავშეყრის ადგილებში აზარტული თამაშების შემცველ ღონისძიებებში არასრულწლოვანებიც ერთვებიან. ერთ-ერთი ასეთი ფაქტი ტოტალიზატორმა „ბეტლაივმა“ გამართა ქალაქ ზესტაფონში. რასაც, ვფიქრობთ, შესაბამისი უწყებების მხრიდან სათანადო რეაგირება უნდა მოჰყვეს.სოციალურ ქსელებში გავრცელებულ ვიდეოებში ჩანს, რომ აქტივობები ფართო აუდიტორიის წინაშე იმართება და მათში მონაწილეობის შესაძლებლობა ბავშვებსაც ეძლევათ.განსაკუთრებული შეშფოთების საფუძველს ქმნის ის გარემოება, რომ მოზარდების აზარტულ თამაშებში, თუნდაც გართობის ფორმით ჩართვამ შესაძლოა ხელი შეუწყოს მათში გემბლინგისადმი ინტერესისა და შემდგომ თამაშდამოკიდებულებისკენ მიდრეკილების ჩამოყალიბებას.  მაშინ, როდესაც აზარტულ თამაშებზე დამოკიდებულება, მიჯაჭვულობა, საზოგადოებისა და ქვეყნისთვის ერთ-ერთ სერიოზულ პრობლემად რჩება და ასეთი ადამიანების მდგომარეობიდან გამოსაყვანად ხშირად ხანგრძლივი და კომპლექსური, მათ შორის, სამედიცინო და ფსიქოლოგიური დახმარება ხდება საჭირო.არასრულწლოვანთა ამგვარ ღონისძიებებში ჩართვა ბავშვებში აზარტული თამაშების პოპულარიზებისა და ინტერესის გაღვივების საშუალებაა და აზარტული თამაშების სფეროში მოქმედი რეგულაციების მოთხოვნათა უხეში დარღვევაა.აღნიშნულთან დაკავშირებით, ერთი მხრივ, მოვუწოდებთ სახელმწიფოს, საკითხს მაქსიმალური ყურადღება დაუთმოს, შეისწავლოს მსგავსი ფაქტები და გამოიყენოს ყველა შესაბამისი სამართლებრივი და ადმინისტრაციული მექანიზმი მათ აღმოსაფხვრელად. ამასთან, მივმართავთ მშობლებს, გამოიჩინონ განსაკუთრებული სიფრთხილე, რადგან ბავშვების ნებისმიერი ფორმით წახალისება აზარტული თამაშებისკენ, შესაძლოა, მომავალში მძიმე შედეგების მიზეზი გახდეს, როგორც თავად მოზარდისთვის, ისე მისი ოჯახისა და მთლიანად საზოგადოებისთვის. საკითხის სიმძიმიდან გამომდინარე, აუცილებელია დროული და კოორდინირებული რეაგირება სახელმწიფოს, შესაბამისი უწყებებისა და მშობლებისაგან, რათა ბავშვები დაცული იყვნენ მავნე ჩვევებისადმი დამოკიდებულების რისკებისაგან.არასრულწლოვანთა ნებისმიერი ფორმით წახალისება აზარტული თამაშებისკენ თავისი არსით, ერის წინაშე ჩადენილი დანაშაულია. ამიტომ საჭიროა ყველა შესაძლო ზომის მიღება, რათა ეს პროცესი შეჩერდეს და ასეთი შემთხვევები მომავალში სრულად გამოირიცხოს. მსგავს ფაქტებზე, რომლებიც მომავალი თაობის ჯანსაღი ცხოვრების წესს საფრთხეს შეუქმნის, საქართველოს საპატრიარქოს მუდამ ექნება მკაფიო რეაქცია და მათ აღსაკვეთად ყველა შესაბამის შესაძლებლობას გამოიყენებს“, - ნათქვამია განცხადებაში.

მსოფლიო • 1787338450

სერბეთმა ტყის ხანძრების გამო დახმარებისთვის ევროკავშირსა და რუსეთს მიმართა

სერბეთმა ტყის ხანძართან გასამკლავებლად დახმარება, როგორც ევროკავშირს, ისე რუსეთს სთხოვა. ამის შესახებ „როიტერი“ წერს.ქვეყნის  შინაგან საქმეთა სამინისტროს საგანგებო სიტუაციების დეპარტამენტის უფროსმა, ლუკა ჩაუშიჩმა განაცხადა, რომ სერბეთმა ევროკავშირის დახმარების სისტემას სახანძრო თვითმფრინავები და სპეციალიზებული ტექნიკა სთხოვა.„გვჭირდება 10 ტონაზე მეტი ტვირთის ტარების უნარის მქონე თვითმფრინავები და ხუთი ვერტმფრენი, რომელთაც ოთხ ტონაზე მეტი წყლის გადატანა შეუძლიათ. უნდა აღვნიშნო, რომ საკუთარი მძიმე ვერტმფრენებიც გვაქვს, თუმცა ევროკავშირის სამოქალაქო დაცვის მექანიზმისგანაც ვითხოვეთ დახმარება. ასევე მოვითხოვეთ 10 სპეციალიზებული მანქანა, რომლებსაც ქვიშნარ ტერიტორიაზე მუშაობა შეუძლია“, – აღნიშნა ჩაუშიჩმა.სერბეთი ევროკავშირის წევრი არ არის, თუმცა ბლოკის სამოქალაქო დაცვის მექანიზმის ფარგლებში საგანგებო დახმარებაზე წვდომა აქვს.მიმდინარე ზაფხულს ბელგრადმა ესპანეთს ტყის ხანძრებთან ბრძოლაში დასახმარებლად სახანძრო ვერტმფრენი და საგანგებო რეაგირების ჯგუფი აღნიშნული მექანიზმის ფარგლებში გაუგზავნა, თუმცა, როგორც „როიტერი“ წერს, ევროპის მასშტაბით მძვინვარე ხანძრებმა ევროკავშირის რესურსები მნიშვნელოვნად ამოწურა.ამასთან, როგორც გამოცემა აღნიშნავს, მიმდინარე კვირის დასაწყისში რუსეთმა სერბეთს ხანძართან საბრძოლველად თვითმფრინავი გაუგზავნა. სერბული მედიის ინფორმაციით, თვითმფრინავი ვლადიმერ პუტინის ბრძანებით გაიგზავნა, მას შემდეგ, რაც სერბეთმა დახმარება ითხოვა.

პოლიტიკა • 1787311132

საქართველო იყო ერთ-ერთი პირველი ქვეყანა, რომელმაც კარი გაუღო ათასობით უკრაინულ ოჯახს, 27 000-ზე მეტი უკრაინელი კვლავ ცხოვრობს საქართველოში, მადლობა მხარდაჭერისთვის - უკრაინის საქმეთა დროებითი რწმუნებული

საქართველოში უკრაინის საელჩო უკრაინის საქმეთა დროებითი რწმუნებულის, დმიტრო ბერეჟნოის სტატიას აქვეყნებს, რომელიც უკრაინის დამოუკიდებლობის დღეს მიეძღვნა.სტატიაში, რომლის სახელწოდებაა „ერთობლივი ბრძოლა საერთო მომავლისთვის: ისტორიული გამარჯვებიდან თავისუფალი ერების ურღვევ კავშირამდე“, ნათქვამია, რომ უკრაინა ყოველწლიურად, 24 აგვისტოს ეროვნული იდენტობის მთავარ დღესასწაულს – დამოუკიდებლობის დღეს აღნიშნავს.„უკრაინელი ხალხისთვის ეს არა მხოლოდ კალენდარული თარიღი და სუვერენიტეტის ფორმალური ატრიბუტია. ჩვენთვის დამოუკიდებლობა არასდროს ყოფილა საჩუქარი ან ისტორიული გარემოებების შემთხვევითი შერწყმა. ის საუკუნეების განმავლობაში განუწყვეტელი ბრძოლის შედეგად არის ჩამოყალიბებული უკრაინელების სურვილით, იყვნენ საკუთარი მიწის პატრონი, იცხოვრონ პატივისა და სინდისის კანონებით, ისაუბრონ მშობლიურ ენაზე, გაუფრთხილდნენ თავიანთ კულტურას, ტრადიციებსა დაეროვნულ იდენტობას და გადასცენ ისინი მომავალ თაობებს. დღევანდელი დაპირისპირება ამ ისტორიული ბრძოლის პირდაპირი გაგრძელებაა. რუსეთის აგრესია უკრაინის წინააღმდეგ 2022 წელს არ დაწყებულა, არამედ გრძელდება 2014 წლიდან, ყირიმის უკანონო ანექსიითა და დონბასში ომის დაწყებით. მაშინ კრემლმა საბოლოოდ ჩამოიშორა „მოძმე ხალხის“ შესახებ მითი და „რუსულმა სამყარომ“ თავისი ნამდვილი სახე გამოავლინა – ისტორიული სიახლოვის შესახებ სიტყვების მიღმა იმალებოდა იმპერიული პრეტენზიები, უცხო ტერიტორიების მითვისების სურვილი და მეზობელი ხალხებისთვის საკუთარი მომავლის განსაზღვრის უფლების ჩამორთმევა. 2022 წლის თებერვალში აგრესორმა მიმართა არაპროვოცირებულ, სრულმასშტაბიან შემოჭრას ჩვენი სახელმწიფოს სწრაფი კაპიტულაციის იმედით. თუმცა, მტერმა არასწორად გათვალა.მილიონობით უკრაინელი – ფრონტის ხაზზე, თავდაცვის ინდუსტრიის ობიექტებში, საავადმყოფოებში, კრიტიკული ინფრასტრუქტურის ობიექტებსა და მოხალისეთა შტაბებში – ადგა სამშობლოს დასაცავად, მსოფლიოს აჩვენა ეროვნული ერთიანობისა და მდგრადობის უპრეცედენტო მაგალითი“, – ნათქვამია სტატიაში.როგორც სტატიაშია აღნიშნული, სრულმასშტაბიანი შემოჭრის პირველ ყველაზე რთულ დღეებში, როდესაც უკრაინის ბედი თითოეულ ადამიანზე იყო დამოკიდებული, უკრაინელ სამხედროებთან გვერდიგვერდ იდგნენ მრავალი მეგობარი ქვეყნის მოხალისეები და გმირები, მათ შორის განსაკუთრებული ადგილი უჭირავთ საქართველოს შვილებს.„დღეს, უკრაინის შეიარაღებულ ძალებსა და უკრაინის თავდაცვის ძალების სხვა დანაყოფებში მრავალი ქართველი მებრძოლია –  სხვადასხვა ეროვნების საქართველოს მოქალაქე და სხვა ქვეყნების მოქალაქე ეთნიკური ქართველები. იარაღით ხელში ისინი იცავენ უკრაინის თავისუფლებას, დამოუკიდებლობას და ტერიტორიულ მთლიანობას, სრულად აცნობიერებენ, რომ ეს საერთო ბრძოლაა. რუსეთის აგრესიისა და საკუთარი მიწების ოკუპაციის გამოცდილების შემდეგ, ქართველ ხალხს, როგორც არავის სხვას ესმის უკრაინის ტკივილი და აცნობიერებს, რომ დღეს ხარკოვის, ზაპოროჟიესა და ხერსონის ოლქებში არა მხოლოდ უკრაინის მომავალი წყდება, იქ გადის რუსული იმპერიალიზმის წინააღმდეგ ბრძოლის ერთ-ერთ მთავარი ფრონტი, რომლის შედეგიც საქართველოს ოკუპირებული რეგიონების მომავალსაც განსაზღვრავს. უკრაინის ფრონტზე ქართველი გმირების სიმამაცე, უშიშრობა და თავგანწირვა სოლიდარობის უმაღლესი გამოხატულება და ქართველი ხალხის ყველაზე მნიშვნელოვანი წვლილია ჩვენს საერთო გამარჯვებაში. ჩვენ თავს ვხრით უკრაინელი და ქართველი ჯარისკაცების ხსოვნის წინაშე, რომლებმაც სიცოცხლე შესწირეს უკრაინისა და საქართველოს თავისუფლებისთვის. მათი საგმირო საქმეები სამუდამოდ ჩაიწერა ჩვენი ძმობის ისტორიაში და მომავალი თაობებისთვის სახელმძღვანელოდ იქცევა“, – ნათქვამია დმიტრო ბერეჟნოის სტატიაში.უკრაინის საქმეთა დროებითი რწმუნებული სტატიაში აღნიშნავს, რომ უკრაინელი ხალხი ყოველთვის ღრმა მადლიერებითა და სითბოთი გაიხსენებს იმ უზომო სიკეთესა და სტუმართმოყვარეობას, რომელიც ომის პირველივე დღეებიდან საქართველოსგან იგრძნო.„საქართველო იყო ერთ-ერთი პირველი ქვეყანა, რომელმაც კარი გაუღო ათასობით უკრაინულ ოჯახს, რომლებიც იძულებულნი იყვნენ დაეტოვებინათ საკუთარი სახლები რუსი ოკუპანტებისა და ბომბების გამო. 2022 წლის თებერვლის ბოლოდან, 500 000-ზე მეტი უკრაინის მოქალაქე იძულებული გახდა ევაკუირებულიყო და საქართველოს გავლით მსოფლიოს სხვადასხვა კუთხეშიც გადასულიყო. ბევრი მათგანისთვის, საქართველოს მიწა გახდა პირველი უსაფრთხო თავშესაფარი რუსეთის მიერ დაწყებული სრულმასშტაბიანი ომის საშინელებების შემდეგ. ამჟამად, 27 000-ზე მეტი უკრაინელი დროებით კვლავ ცხოვრობს საქართველოში, სამართლიანი მშვიდობის დამყარებისა და საკუთარ სახლებში დაბრუნების შესაძლებლობის მოლოდინში. საქართველოში უკრაინისთვის ჰუმანიტარული და სოციალური მხარდაჭერა ნამდვილად საერთო ეროვნული გახდა, რაც აერთიანებს სახელმწიფო და ადგილობრივი ხელისუფლების, ბიზნესის, სამოქალაქო საზოგადოების, საქართველოს მართლმადიდებლური ეკლესიისა და რიგითი მოქალაქეების ძალისხმევას. ომის პირველ რთულ თვეებში ათასობით უკრაინულმა ოჯახმა, რომლებიც იძულებულნი იყვნენ თავშესაფარი ეძებნათ საქართველოში, მიიღო უფასო საცხოვრებელი, ცხელი კვება, ფინანსური დახმარება და, რაც არანაკლებ მნიშვნელოვანია, ადამიანური სითბო და მხარდაჭერა.მნიშვნელოვანი ნაბიჯი გახდა თბილისისა და ბათუმის საჯარო სკოლებში უკრაინული სექციების შექმნა, სადაც უკრაინელი ბავშვები დღემდე აგრძელებენ სწავლას მშობლიურ ენაზე უკრაინის ეროვნული სასწავლო გეგმის მიხედვით. ეს მათ ეხმარება არა მხოლოდ ახალ პირობებთან ადაპტაციაში, არამედ ეროვნული იდენტობისა და სამშობლოსთან კავშირის შენარჩუნებაში. საქართველოს მთავრობისა და ადგილობრივი მუნიციპალიტეტების მხარდაჭერით, უკრაინელი ბავშვები სოციალურად დაუცველი ოჯახებიდან, განსაკუთრებით კი ის ბავშვები, რომელთა მშობლებმა სიცოცხლე შესწირეს უკრაინის სუვერენიტეტისა და ტერიტორიული მთლიანობის დაცვას, რეგულარულად ჩამოდიან საქართველოში დასვენებისა და ფსიქოლოგიური რეაბილიტაციისთვის. ასევე მნიშვნელოვანი წვლილი შეიტანა ინსტიტუციურმა მხარდაჭერამ, რაც გამოიხატა საზღვრის გადაკვეთის პროცედურების მაქსიმალურ გამარტივებაში, უკრაინის მოქალაქეებისთვის უვიზო რეჟიმის გახანგრძლივებასა და აუცილებელ სამედიცინო და სოციალურ მომსახურებაზე წვდომაში.ამავდროულად, საქართველოს მოსახლეობის მიერ შეგროვებულმა და უკრაინაში გაგზავნილმა ათასობით ტონა ჰუმანიტარულმა დახმარებამ, გენერატორებმა, სამედიცინო აღჭურვილობამ და მედიკამენტებმა გადამწყვეტი როლი ითამაშა ჩვენი ქალაქების მხარდაჭერაში ომის ყველაზე რთულ პერიოდში. ამ თბილი და ღია დახვედრის წყალობით, უკრაინელები საქართველოში თავს უცხოდ არ გრძნობენ. ჩვენი მრავალი თანამემამულისთვის საქართველო ნამდვილად გახდა ახლო ქვეყანა, სადაც ისინი გრძნობენ ძმურ სითბოს, მხარდაჭერას და ნამდვილ ადამიანურ სოლიდარობას. ჩვენ გულწრფელ მადლობას ვუხდით საქართველოს ყოველი მხარდაჭერისთვის, ფრონტის ხაზზე ჩვენ გვერდით მდგომი თითოეული ქართველი ჯარისკაცისთვის, უკრაინელი ბავშვებისთვის გამოყოფილი თავშესაფრისთვის, უკრაინის მხარდასაჭერად გამოყოფილი თითოეული ლარისა და გენერატორისთვის.დარწმუნებული ვართ, უკრაინელი და ქართველი ხალხების საერთო ბრძოლა თავისუფლებისთვის, დამოუკიდებლობისთვის, ტერიტორიული მთლიანობისთვის და ევროპული მომავლისთვის აუცილებლად დასრულდება სამართლიანობის აღდგენით, ჩვენი სუვერენული ტერიტორიების სრული დეოკუპაციით და ხანგრძლივი და სამართლიანი მშვიდობის დამყარებით. დიდება უკრაინას! GAUMARRJOS SAKARTVELOS“, – ნათქვამია სტატიაში.

საზოგადოება • 1787265621

„ეს შეიძლება ფატალური შეცდომა გახდეს...“ - რის შესახებ გვაფრთხილებს ტრავმატოლოგი 

მოტომედიკი და ტრავმატოლოგი დავით კაცაძე სოციალურ ქსელში საყურადღებო მიმართვას ავრცელებს და მოსახლეობას უცხო სხეულით დაზიანებისას არასწორი ქმედებების საფრთხეზე აფრთხილებს.„ამ მამაკაცს სახის არეში დიდი ზომის ლურსმანი ჰქონდა ჩარჭობილი. საბედნიეროდ, შემთხვევის ადგილზე მისმა ახლობლებმა მისი ამოღება არ სცადეს და სასწრაფო დახმარება გამოიძახეს. ბევრს ჰგონია, რომ ასეთი უცხო სხეული დაუყოვნებლივ უნდა ამოვიღოთ. სინამდვილეში, ეს შეიძლება ფატალური შეცდომა იყოს.უცხო სხეული ზოგჯერ დაზიანებულ სისხლძარღვს აწვება და დროებით ამცირებს ან აჩერებს სისხლდენას. მისი დაუფიქრებელმა ამოღებამ შეიძლება რამდენიმე წამში სიცოცხლისთვის საშიში სისხლდენა გამოიწვიოს.ასეთ დროს პირველადი დახმარების მთავარი პრინციპია:არ ამოიღოთ უცხო სხეული.დაასტაბილურეთ იგი, გამოიძახეთ სასწრაფო დახმარება და პაციენტი რაც შეიძლება სწრაფად გადაიყვანეთ შესაბამის კლინიკაში“,- წერს ექიმი. 

რჩევები • 1787254840

„აქ არ შეიძლება დაყოვნება... ეს დაავადება ყალიბდება 72 საათში“ - ექიმის საგანგებო გაფრთხილება

სმენის უეცარ დაქვეითებაზე, ექიმი, ნეიროოტოლოგი, ეკატერინე ხარხელი საუბრობს.„არსებობს სმენის ასაკობრივი დაქვეითება. სმენის დაქვეითება იწყება 40 წლის შემდეგ. არსებობს საინტერესო ფენომენი. სმენის უეცარი დაქვეითება მოწმენდილ ცაზე, რომელსაც არაფერი არ აპროვოცირებს. პაციენტები ამბობენ, რომ „გავიღვიძე და ცალ ყურში საერთოდ არ მაქვს სმენა". აგვიანებენ ექიმთან ვიზიტს. ჰგონიათ, რომ ეს გაივლის, ჰგონიათ, რომ გოგირდოვანი საცობის პრობლემაა.აქ არ შეიძლება დაყოვნება, ეს არის ისეთი პათოლოგია, რომელიც სწრაფ, გადაუდებელ რეაგირებას და დახმარებას მოითხოვს. ეს არის განსაკუთრებული შემთხვევა, ეს დაავადება ყალიბდება 72 საათში, თუ დროზე არ ჩაერიე, მერე ხდება შეუქცევადი ცვლილებების განვითარება ყურში და სმენა აღარ აღდგება.თუ უეცრად დაგვაკლდა სმენა ცალ ყურზე, განსაკუთრებით თუ ამას თავბრუსხვევა და ტინიტუსი ანუ ხმაური და შუილი თან ერთვის, მაშინ არ უნდა დააყოვნოთ და უნდა მიმართოთ სპეციალისტს“,- ამბობს ეკატერინე ხარხელი.

ტექნოლოგიები • 1787238960

რა ემართება ჩვენს აზროვნებას, როცა საქმეში ხელოვნურ ინტელექტს ვიყენებთ - კვლევა

აშშ-სა და გაერთიანებული სამეფოს მკვლევართა ჯგუფის მიერ ჩატარებული ახალი კვლევა მიუთითებს, რომ ხელოვნური ინტელექტის (AI) გამოყენება მოკლევადიანად ამაღლებს შესრულების ხარისხს, თუმცა შესაძლოა მნიშვნელოვანი კოგნიტიური ფასის ხარჯზე. ნაშრომის ავტორების განცხადებით, „AI-ს დახმარება შესრულებას მყისიერად აუმჯობესებს, თუმცა დიდი კოგნიტიური ფასის სანაცვლოდ“.კვლევა ამჟამად პრეპრინტების პლატფორმა arXiv-ზეა გამოქვეყნებული და რეცენზირება ჯერ არ გაუვლია.ექსპერიმენტის ფარგლებში მკვლევრებმა 350 ამერიკელი მონაწილე შეისწავლეს, რომლებიც სხვადასხვა კოგნიტიურ ამოცანას — მათ შორის წილადებიან განტოლებებს — ასრულებდნენ. მონაწილეთა ნაწილი იყენებდა GPT-5-ზე დაფუძნებულ ჩატბოტს, დანარჩენებს კი ამოცანების დამოუკიდებლად გადაწყვეტა უწევდათ. ექსპერიმენტის მიმდინარეობისას AI-ს მომხმარებელ ჯგუფს მოულოდნელად შეუწყდა ჩატბოტზე წვდომა.შედეგებმა აჩვენა, რომ იმ ჯგუფში, რომელიც AI-ს იყენებდა, სწორი პასუხების რაოდენობა მკვეთრად შემცირდა, ხოლო მონაწილეთა ნაწილი საერთოდ წყვეტდა მცდელობას. შესრულების ხარისხთან ერთად გაუარესდა გამძლეობაც. მსგავსი შედეგები დაფიქსირდა 670 ადამიანზე ჩატარებულ დამატებით ექსპერიმენტშიც, ასევე წაკითხულის გააზრებაზე ორიენტირებულ კვლევაში.კვლევის თანაავტორის, რაჩიტ დუბეი-ის განცხადებით, „როცა ადამიანებს AI-ს ვართმევთ, ისინი მხოლოდ არასწორ პასუხებს კი არ იძლევიან — ხშირად არც კი ცდილობენ ამოცანის დამოუკიდებლად შესრულებას. მათი გამძლეობა მცირდება“.მკვლევრები ვარაუდობენ, რომ AI-ს ფართომასშტაბიანმა დანერგვამ, განსაკუთრებით განათლების სფეროში, შესაძლოა უარყოფითი გავლენა იქონიოს მომავალი თაობების უნარებზე — მათ შორის დამოუკიდებელ აზროვნებასა და შემოქმედებითობაზე. ნაშრომის ავტორები აღნიშნულ პროცესს ე.წ. „მოხარშული ბაყაყის“ ეფექტს ადარებენ, როდესაც ცვლილებები თანდათანობით ხდება და პრობლემის სიმწვავე მოგვიანებით იჩენს თავს.ამასთან, კვლევამ დადებითი ტენდენციაც გამოავლინა: მონაწილეები, რომლებიც AI-სგან მხოლოდ მინიშნებებს ან განმარტებებს იღებდნენ და არა მზა პასუხებს, გაცილებით უკეთ უმკლავდებოდნენ ამოცანებს მაშინ, როცა ჩატბოტზე წვდომა ეზღუდებოდათ.აღსანიშნავია, რომ ეს მხოლოდ ერთ-ერთი კვლევაა AI-ს გავლენის შესახებ. სხვა ნაშრომების მიხედვით, ხელოვნური ინტელექტის გამოყენება სამუშაო გარემოში შესაძლოა ზრდიდეს დაღლილობას, თუმცა ამავდროულად თანამშრომლებს მეტისა და უფრო ხანგრძლივი მუშაობისკენაც უბიძგებს.

სამართალი • 1787228466

ბათუმში, ორი პირის მიმართ ჯგუფურად ჩადენილ ჯანმრთელობის მსუბუქად დაზიანების ფაქტზე, უცხო ქვეყნის 2 მოქალაქე დააკავეს

შინაგან საქმეთა სამინისტროს აჭარის პოლიციის დეპარტამენტის ბათუმის საქალაქო სამმართველოს თანამშრომლებმა, ცხელ კვალზე ჩატარებული საგამოძიებო მოქმედებების შედეგად, ორი პირის მიმართ ჯგუფურად ჩადენილ ჯანმრთელობის მსუბუქად დაზიანების ფაქტზე უცხო ქვეყნის 2 მოქალაქე დააკავეს, - ინფორმაციას შინაგან საქმეთა სამინისტრო ავრცელებს.„გამოძიებით დადგინდა, რომ ბათუმში უცხო ქვეყნის მოქალაქეებს შორის კონფლიქტი მოხდა. ბრალდებულებმა კონფლიქტში მონაწილე ორ პირს ჯანმრთელობის მსუბუქი დაზიანებები მიაყენეს - მათ შორის ერთ-ერთ მათგანს ცივი იარაღით, რის შემდეგაც შემთხვევის ადგილიდან მიიმალნენ.დაშავებულ პირებს შესაბამისი სამედიცინო დახმარება გაეწიათ.სამართალდამცველებმა ბრალდებული პირები მომხდარიდან მალევე, ცხელ კვალზე დააკავეს. გამოძიება სისხლის სამართლის კოდექსის 120-ე მუხლით მიმდინარეობს. დანაშაული 5 წლამდე ვადით თავისუფლების აღკვეთას ითვალისწინებს," - ვკითხულობთ უწყების მიერ გავრცელებულ ინფორმაციაში.

მსოფლიო • 1787227618

მოკლული კაცის ცხედარი დაბეტონებული იპოვეს - მკვლელობაში ბრალდებული ქალი 45-დღიანი ძებნის შემდეგ დააკავეს

თითქმის ორი თვის განმავლობაში სამართალდამცველები 38 წლის იზაბელ როზე ჯონსონს ეძებდნენ. ქალი 43 წლის მამაკაცის მკვლელობაშია ბრალდებული.მამაკაცი მაისში გაუჩინარდა, ერთი თვის შემდეგ კი მისი ცხედარი ფლორიდის შტატში, ზედაპირულ საფლავში იპოვეს.საქმის ერთ-ერთი ყველაზე შემზარავი დეტალი ის არის, რომ ცხედარი ბეტონით დაფარულ ზედაპირულ ორმოში იყო დამალული, ხოლო საფლავის ზემოთ შავი კადილაკი იდგა. გამომძიებლების ცნობით, მამაკაცს კისერზე დიდი თეთრი პლასტმასის სამაგრი ჰქონდა. მოგვიანებით დნმ-ის კვლევამ დაადასტურა, რომ აღმოჩენილი ნეშტი სწორედ დაკარგულს ეკუთვნოდა.გამოძიებამ მნიშვნელოვანი მიმართულება დაახლოებით ერთი თვის შემდეგ მიიღო. 25 ივნისს დეტექტივებმა ინფორმაცია მიიღეს იმ ადგილის შესახებ, სადაც, მათი ვარაუდით, კაცის ცხედარი იყო დამარხული. ადგილზე ჩატარებული ჩხრეკის შედეგად პოლიციამ ზედაპირული საფლავი აღმოაჩინა. გამოძიებამ მკვლელობაში 38 წლის იზაბელი დაადანაშაულა. თუმცა მისი დაკავება მარტივი არ აღმოჩნდა.სამართალდამცველების ინფორმაციით, ქალი სხვადასხვა სახელს იყენებდა და გარეგნობასაც იცვლიდა.გამოძიებამ მისი ადგილსამყოფელის შესახებ ინფორმაციისთვის ჯილდოც დააწესა, რომელიც საბოლოოდ 16 000 დოლარამდე გაიზარდა. პოლიციამ მისი გამორჩეული ტატუების ფოტოებიც გაავრცელა გამოძიების ფარგლებში ქალის სავარაუდო თანამზრახველთა წრეც გამოიკვეთა.სამართალდამცველებმა ხუთი ადამიანი დააკავეს. მათი ნაწილი იზაბელს მიმალვაში დახმარებასა და გადაადგილებაში ეხმარებოდა.ეჭვნიტანილის ძებნა დაახლოებით 45 დღე გაგრძელდა. საბოლოოდ იგი 13 აგვისტოს დააკავეს.

საზოგადოება • 1787222239

„პულსი არ ჰქონდა...“ - 35-წუთიანი ბრძოლის შემდეგ, სასწრაფო დახმარების ექიმებმა მამაკაცის სიცოცხლე გადაარჩინეს

თბილისის სასწრაფოს ბრიგადამ უგონო მდგომარეობაში მყოფი მამაკაცი სიკვდილს გადაარჩინა. ინფორმაცია ამის შესახებ სოციალურ ქსელში ვრცელდება. „თბილისის სასწრაფო სამედიცინო დახმარების მე-3 ფილიალში შევიდა გამოძახება ლოზუნგით - „უგონო პაციენტი“.ერთ-ერთ ობიექტზე მყოფი მოქალაქეები დახმარებას ითხოვდნენ. თითოეულ წამს გადამწყვეტი მნიშვნელობა ჰქონდა. გამოძახების ადგილზე უმოკლეს დროში მივიდა ბრიგადა 0333, სადაც მძიმე სურათი დახვდათ - იატაკზე უგონოდ იწვა 50 წლამდე მამაკაცი, რომელსაც სასიცოცხლო ნიშნები არ აღენიშნებოდა.დროის დაკარგვის გარეშე დაიწყო გადაუდებელი რეანიმაციული ღონისძიებები. პაციენტი აყვანილ იქნა მონიტორზე, სადაც დაფიქსირდა ასისტოლია. სწრაფად ჩატარდა სასუნთქი გზების გამავლობის უზრუნველყოფა. პერიფერიული ვენის კათეტერიზაციის შეუძლებლობის გამო წარმატებით იქნა გამოყენებული ძვალშიდა კათეტერი.რეანიმაციული ღონისძიებების ფონზე, ასისტოლია გადავიდა პარკუჭოვან ტაქიკარდიაში, ჩატარდა კარდიოვერსია, რის შედეგადაც აღდგა გულის რითმი და პულსი. თუმცა პაციენტი კვლავ საჭიროებდა ფილტვების ხელოვნურ ვენტილაციას.35 წუთიანი უწყვეტი ბრძოლის შემდეგ ბრიგადამ პაციენტი აღდგენილი სასიცოცხლო პარამეტრებით გადაიყვანა უახლოეს კლინიკაში, სადაც ის რეანიმაციულ განყოფილებაში აგრძელებს მკურნალობასა და კვლევებს. ამჟამად მისი მდგომარეობა გაუმჯობესებულია.ექიმი ლია რევიშვილი: „პრაქტიკაში არაერთ ასეთ შემთხვევასთან მქონია შეხება და ბევრჯერ შევძელით გულის მუშაობის აღდგენა, თუმცა ეს გამოძახება განსაკუთრებით ემოციური იყო. ადგილზე ძალიან მძიმე მდგომარეობა და პანიკა დაგვხვდა. შეკრებილი მოქალაქეები და თანამშრომლები ამბობდნენ, რომ ყველაფერი რამდენიმე წამში მოხდა და მანამდე არანაირი წინაპირობა არ ყოფილა. ვინაიდან ფილიალი შემთხვევის ადგილთან ახლოს იყო, ბრიგადა ძალიან სწრაფად მივიდა. 35 წუთის განმავლობაში უწყვეტად ვატარებდით რეანიმაციულ ღონისძიებებს და შედეგმაც არ დააყოვნა. ეს იყო უდიდესი სიხარულისა და ემოციის მომენტი მთელი გუნდისთვის.“ექიმი ლია რევიშვილი უკვე 38 წელია სასწრაფო სამედიცინო დახმარების სამსახურში მუშაობს. მისი მრავალწლიანი გამოცდილება, პროფესიონალიზმი და თავდადება კიდევ ერთხელ გახდა ადამიანის სიცოცხლის გადარჩენის მთავარი ძალა“,- წერია გავრცელებულ ინფორმაციაში.