მეცნიერებმა ჭაღარა თმასა და კიბოს შორის კავშირი დაადგინეს - კვლევა

ჭაღარა თმა ტრადიციულად დაბერების გარდაუვალ ნიშნად მიიჩნევა, თუმცა ახალი სამეცნიერო კვლევა ამ წარმოდგენას ეჭვქვეშ აყენებს. მეცნიერების თქმით, თმის გაჭაღარავება შესაძლოა არა მხოლოდ ასაკთან დაკავშირებული ცვლილება იყოს, არამედ ორგანიზმის ბუნებრივი დამცავი მექანიზმის გარეგნული გამოვლინება.

კვლევის მიხედვით, კავშირი არსებობს თმაში პიგმენტის დაკარგვასა და კიბოსგან დაცვის პროცესებს შორის. ამ პროცესის ცენტრში მელანოციტების ღეროვანი უჯრედები დგას - ისინი თმის ფოლიკულებში მდებარეობს და პასუხისმგებელია პიგმენტის გამომუშავებაზე, რომელიც თმას ფერს აძლევს.

ნორმალურ პირობებში ეს ღეროვანი უჯრედები რეგულარულად განახლდება და უზრუნველყოფს თმის ფერის შენარჩუნებას. თუმცა ყოველდღიურად უჯრედები დნმ-ის დაზიანებას განიცდიან - ულტრაიისფერი გამოსხივების, ქიმიური ზემოქმედებისა და მეტაბოლური პროცესების გამო. მსგავსი დაზიანებები ზრდის როგორც დაბერების, ისე კიბოს განვითარების რისკს.

კვლევამ აჩვენა, რომ როდესაც მელანოციტების ღეროვან უჯრედებში დნმ-ის სერიოზული დაზიანება ხდება, ისინი გადადიან„იძულებით დიფერენციაციაში“ - სრულად მწიფდებიან პიგმენტურ უჯრედებად და შემდეგ ქრებიან. შედეგად, ღეროვანი უჯრედების მარაგი იკლებს და თმა თანდათან ჭაღარავდება.

მეცნიერები აღნიშნავენ, რომ ეს პროცესი ორგანიზმის დამცავი სტრატეგიაა: დაზიანებული უჯრედები თვითლიკვიდაციას ირჩევენ, რათა თავიდან აიცილონ მუტაციების დაგროვება და კიბოს, მათ შორის მელანომის, განვითარების საფრთხე.

ამგვარად, ყოველი ჭაღარა თმა შესაძლოა სიმბოლურად სხეულის „მცირე გამარჯვებად“ ჩაითვალოს - უჯრედის არჩევანად გაქრეს და დაიცვას ორგანიზმი ავთვისებიანი ცვლილებებისგან.