„დედა მოვიდა და მკითხა, სად არის ის გოგოო, მივიდა და...“ - რას იხსენებდა ელდარ შენგელაია ბავშვობასა და პირველ სიყვარულზე

92 წლის ასაკში კინორეჟისორი ელდარ შენგელაია გარდაიცვალა. ამის შესახებ ინფორმაციას „ნატო ვაჩნაძის ფონდი” ავრცელებს.

გთავაზობთ ამონარიდებს რეჟისორის საარქივო ინტერვიუებიდან, სადაც, ის პირად ცხოვრებაზე საუბრობდა:

გადაცემა „იმედის დღის“ რუბრიკას პერსონა ნიკოლოზ წულუკიძესთან ერთად რეჟისორი ელდარ შენგელაია და ლეო ანთაძე სტუმრობდნენ. წელს ორი ხელოვანის 90 წლის იუბილეა.

კლასელების შეხვედრა სკოლაში 84 წლის შემდეგ საკმაოდ ემოციური აღმოჩნდა.

ელდარ შენგელაიამ მისი პირველი სიყვარული გაიხსენა. მანვე გაიხსენა სკოლაში ნატო ვაჩნაძის მისვლა.

„პირველ კლასში ვიყავი, პატარა გოგონა იჯდა ჩემს გვერდით და შემიყვარდა. მეორე დღეს დედას მძივები მოვპარე და მას მივეცი. იმან საერთოდ არ მიაქცია ყურადღება. შემდეგ ეს მძივები სამასწავლებლოში დირექტორთან აღმოჩნდა, მკითხეს ვისიაო, ტირილი დავიწყე და ვუთხარი – დედასია.. დედა მოვიდა და მკითხა, სად არის ის გოგოო, მივიდა და აჩუქა..“, – აღნიშნა რეჟისორმა.