ალეკო ელისაშვილს ბრალი წარუდგინეს

 ალეკო ელისაშვილს, რომელიც საქალაქო სასამართლოს კანცელარიის დაწვის მცდელობისთვის დააკავეს, ბრალი ცოტა ხნის წინ წარუდგინეს.

თავად ელისაშვილი ქმედებას აღიარებს. ამბობს, რომ კონკრეტული გეგმა ჰქონდა გაწერილი, შეიარაღებულიც იყო და უფრო მეტიც, ნანობს, რომ სასამართლოს კანცელარიის შენობის გადაწვა ვერ შეძლო.

საგამოძიებო უწყების ცნობით, შენიღბულმა ელისაშვილმა, სასამართლოს კანცელარიის შენობის მინა ჯერ ჩაქუჩით ჩაამსხვრია, შენობაში არსებულ ნივთებს, ტექნიკასა და დოკუმენტაციას ბენზინი გადაასხა და შენობის დაწვა სცადა.

ადგილზე მყოფ მანდატურის სამსახურის წარმომადგენლებს კი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. შედეგად მანდატურის სამსახურის ერთ-ერთი წარმომადგენელი დაშავდა, რომელიც კლინიკაშია გადაყვანილი. დაკავებისას, გაწეული წინააღმდეგობის გამო, დაზიანებები მიიღო ალექსანდრე ელისაშვილმაც. გამოძიება დანაშაულის მცდელობისა და ნივთის დაზიანება ან განადგურების მუხლებით მიმდინარეობს.