შალვა პაპუაშვილი: 5-7 ათასმა ადამიანმა ტაში დაუკრა ქვეყნის გადატრიალებას, შემდეგ განაცხადეს, ჩავიბაროთ სასახლის გასაღებიო, ახლა ტირიან, რატომ არ იყო დანაღმული ტერიტორია და ღობეში დენი გატარებული

იქ, ვინც მივიდა, ყველა მივიდა ერთი მიზნით, დაემხოთ ხელისუფლება. ხელისუფლების დამხობის შემდეგ მანიფესტი წაიკითხეს, გადაიბარეს ხელისუფლება, ამას ტაში დაუკრეს იქ მყოფმა ადამიანებმა, 5-7 ათასმა ადამიანმა, ვინც იქ იდგა, ტაში დაუკრა ქვეყნის გადატრიალებას, შემდეგ განაცხადეს, წავედით და ჩავიბაროთ პრეზიდენტის სასახლის გასაღებიო, წავიდნენ ჩასაბარებლად და დაიწყეს გასაღების ჩაბარება, პოლიციამ გამოაგდო და ახლა ტირიან, რატომ არ იყო დანაღმული პრეზიდენტის სასახლის ტერიტორია და ღობეში რატომ არ იყო დენი გატარებულიო, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, საინტერესოა, რატომ არ გმობენ უცხოელი აქტორები იმ მოვლენებს, რომელიც 4 ოქტომბერს განხორციელდა.

„საბოლოო ჯამში, რისი თქმა უნდა ოპოზიციას ან მის მედიას. ჩვენ რომ გიჟები ვართ ვიცით და რატომ არ გაგვაჩერეთ ნაღმებით და ტყვიამფრქვევებითო. სალომე ზურაბიშვილის მიერ პრაღაში გაჟღერებულმა საძაგელმა ტყუილმა ამხილა სახელმწიფო გადატრიალების უკან მდგომი უცხოელები გეგმა. ამიტომ არის სიჩუმე, რატომ არ გმობენ პრეზიდენტის სასახლის ძალადობრივ შტურმს? რატომ არ გმობს ევროკავშირის ელჩი? როცა შეგხვდებათ ევროკავშირის ელჩი, ჰკითხეთ, შარშან ჩვენი საარჩევნო ბანერები რომ დაგმო, ვინ ეკითხებოდა? წელს იმ პრეზიდენტის სასახლის შტურმი, რომელსაც ისინი აბარებენ რწმუნებათა სიგელს, რომელიც არის მათი მასპინძელი ამ ქვეყანაში, ამ სასახლის ძალადობრივ შტურმს იმ ჯგუფების მიერ, რომელიც არის მათი მხარდაჭერილი. დღეს ყველა დაიმალა და კრინტი არ გვესმის“, – განაცხადა პაპუაშვილმა.