რაჟდენ კუპრაშვილი: ანტიკორუფციული ბიურო მართავს შეხვედრას საჯარო სექტორის წარმომადგენლებთან, გვექნება საუბარი ანტიკორუფციულ პოლიტიკასთან დაკავშირებით და იმ საკანონმდებლო ცვლილებებზე, რომელიც სექტემბრიდან შევა ძალაში

დღეს ანტიკორუფციული ბიურო მართავს შეხვედრას საჯარო სექტორის წარმომადგენლებთან და ჩვენ გვექნება საუბარი ანტიკორუფციულ პოლიტიკასთან დაკავშირებით, - განუცხადა ჟურნალისტებს ანტიკორუფციული ბიუროს ხელმძღვანელმა რაჟდენ კუპრაშვილმა.

მისივე თქმით, საუბარი იქნება ასევე იმ საკანონმდებლო ცვლილებებთან დაკავშირებით, რომელიც სექტემბრიდან-ნოემბრიდან შევა ძალაში.

„რა არის ეს ცვლილებები. თქვენ იცით, რომ საჯარო სექტორში არსებობდა ასეთი ცუდი პრაქტიკა, როდესაც საჯარო მოხელე რამდენიმე საჯარო დაწესებულებაში იყო დასაქმებული. პრემიერ-მინისტრის ინიციატივით, შეიცვალა აღნიშნული კანონმდებლობა და სექტემბრიდან ვეღარ იქნება შესაძლებელი აღნიშნული პრაქტიკა. აღარ მიეცემა კონკრეტული თანამდებობის პირებს დაკავდნენ კიდევ სხვა საჯარო დაწესებულებებში და მიიღონ გაორმაგებული ხელფასები. აქ ანტიკორუფციული ბიუროს როლი ძალიან მნიშვნელოვანია და ჩვენ რამდენიმე მნიშვნელოვანი რეკომენდაცია გამოვეცით იმისთვის, რომ ეს კანონი კიდევ უფრო სწორად და კარგად აღსრულდეს. კანონი ასევე ითვალისწინებს საგამონაკლისო მიმართულებებს. თქვენ იცით, რომ არსებობს მთელი რიგი დარგები, სადაც არის დარგობრივი დეფიციტი. რა თქმა უნდა, ეს არ შეეხება აღნიშნულ პირებს. აღნიშნული კანონი არ შეეხება იმ ადამიანებს, ვინც მაგალითად რამდენიმე თეატრშია დასაქმებული და სპექტაკლში მონაწილეობს. ამიტომ, ძალიან სწორი და დროული იყო აღნიშნული ცვლილება.

მეორე კანონი ეს გახლდათ, როდესაც უკვე მრჩეველი ვეღარ იქნება ანაზღაურებადი საქმიანობა. თუმცა აქაც იმისთვის, რომ გამოირიცხოს ყოველგვარი კორუფციული რისკები, ანტიკორუფციულ ბიუროს მიღებული გვაქვს მნიშვნელოვანი რეკომენდაცია, სადაც ყველა ასეთი დასაქმებული პირი ვალდებული იქნება წინასწარ განაცხადოს თავისი ინტერესი და შესაბამისი დეკლარაცია შეავსოს. ანუ, ჩვენ გვეცოდინება მრჩევლად დანიშნულ პირს რა ინტერესი გააჩნია იმისთვის, რომ კორუფციული რისკები გამოირიცხოს და ვიცოდეთ ეს ადამიანი კონკრეტულად რას საქმიანობს დაწესებულებაში.

შემდგომი ცვლილება ეს არის მამხილებლის დაცვის მექანიზმები. ეს არის სრულიად სიახლე, სადაც ყველა საჯარო დაწესებულებაში იარსებებს მხილების ძლიერი მექანიზმი. ეს იმას ნიშნავს, რომ ხშირ შემთხვევაში, როდესაც მოქალაქე მიმართავს საჯარო დაწესებულებებს, არ არის დროული პასუხები ამა თუ იმ გადაწყვეტილებებთან დაკავშირებით, რა თქმა უნდა, ეს მოქალაქის ნდობას კიდევ უფრო უარყოფითად განაწყობს საჯარო სექტორის მიმართ და რა თქმა უნდა, ეს არის ჩვენი დემოკრატიისთვის ძალიან პრობლემური საკითხი და საფრთხის მატარებელი. შესაბამისად, მამხილებლის ინსტიტუტის გაძლიერება ეს იქნება რეფორმა, რომელიც გამჭვირვალობას შეიტანს.

მამხილებელი არის ნებისმიერი მოქალაქე, მამხილებელი არის საჯარო დაწესებულებაში მომუშავე პირი, რომელიც ამხელს კორუფციულ ფაქტს კონკრეტულ საჯარო დაწესებულებში. აქ ანტიკორუფციული ბიუროს როლი ამ განხილვის პროცესში ძალიან მნიშვნელოვნად იზრდება“, - აღნიშნა რაჟდენ კუპრაშვილმა.