იურიდიულ საკითხთა კომიტეტმა მხარი დაუჭირა საკანონმდებლო ცვლილებებს, რომელიც საგზაო მოძრაობის უსაფრთხოებას უკავშირდება

იურიდიულ საკითხთა კომიტეტმა პირველი მოსმენით განიხილა და მხარი დაუჭირა „ადმინისტრაციულ სამართალდარღვევათა კოდექსში“ ცვლილებას, რომელიც საგზაო მოძრაობის უსაფრთხოებას უკავშირდება.

​კანონპროექტის თანახმად:

• სატრანსპორტო საშუალების მძღოლის მიერ მოძრაობის დადგენილი სიჩქარის გადაჭარბება 15 კმ/სთ-ზე მეტი სიჩქარით, მაგრამ არაუმეტეს 40 კმ/სთ-ისა – გამოიწვევს დაჯარიმებას 100 ლარის ოდენობით (ნაცვლად 50 ლარისა);

• ავტოსატრანსპორტო საშუალებით მოძრაობისას მძღოლის ან მგზავრის მიერ უსაფრთხოების ღვედის გამოუყენებლობა − გამოიწვევს დაჯარიმებას 50 ლარის ოდენობით (ნაცვლად 40 ლარისა);

• მექანიკური სატრანსპორტო საშუალების მართვის დროს მძღოლის მიერ მობილური კომუნიკაციის საშუალებით სარგებლობა − გამოიწვევს დაჯარიმებას 50 ლარის ოდენობით (ნაცვლად 30 ლარისა);

• ამკრძალავი ნიშნის „გაჩერება აკრძალულია“ ან „დგომა აკრძალულია“ მოთხოვნის დაუცველობა, აგრეთვე დგომა-გაჩერების წესებით გათვალისწინებული სხვა მოთხოვნის დაუცველობა ქუთაისში, ბათუმში, მცხეთაში, რუსთავში, გორში, თელავში, ფოთში, ზუგდიდში ან/და საქართველოს კურორტებზე - გამოიწვევს დაჯარიმებას 50 ლარის ოდენობით (ნაცვლად არსებული რეგულირებისა, რომლის თანახმადაც რეგიონებში სახდელის სახედ და ზომად ითვალისწინებს დაჯარიმებას 10 ლარის ოდენობით, ხოლო თბილისში – 50 ლარის ოდენობით).

• სატრანსპორტო საშუალების ტროტუარზე ან ქვეითთა გადასასვლელზე დგომა- გაჩერება − გამოიწვევს დაჯარიმებას 100 ლარის ოდენობით;

• გზის სავალი ნაწილის საპირისპირო მიმართულებით მოძრავ სამარშრუტო სატრანსპორტო საშუალების მოძრაობისთვის განკუთვნილ სპეციალურ ზოლში (BUS LANE) სამარშრუტო სატრანსპორტო საშუალების გარდა, სხვა სატრანსპორტო საშუალების მოძრაობა − გამოიწვევს დაჯარიმებას 200 ლარის ოდენობით.

​კანონპროექტის შემუშავების მიზეზებზე საუბრისას, მომხსენებელმა, შინაგან საქმეთა მინისტრის მოადგილემ ალექსანდრე დარახველიძემ აღნიშნა, რომ ქვეყანაში მნიშვნელოვნად გაიზარდა ავტომობილების მობილობა.

​„მიმდინარე წელს ქვეყანაში 1 900 000-ზე მეტი ავტომობილია რეგისტრირებული. ასევე, საქართველოში უცხო ქვეყნის მოქალაქეების 1 300 000-მდე ავტომობილი მოძრაობდა, რაც ჯამში მნიშვნელოვნად ზრდის ქვეყანაში მობილობას. შესაბამისად, იზრდება ავტოსაგზაო-სატრანსპორტო შემთხვევის შედეგად გარდაცვლილთა და დაშავებულთა რიცხვი. კერძოდ, მიმდინარე წელს, გასული წლის ანალოგიურ პერიოდთან შედარებით, 373 ერთეულით გაიზარდა საგზაო-სატრანსპორტო შემთხვევების რაოდენობა, 41 ერთეულით გაიზარდა გარდაცვლილ პირთა რაოდენობა და ჯამში, წელს უკვე 345 ადამიანი დაიღუპა ავტოსაგზაო შემთხვევების შედეგად. დაშავებულთა რაოდენობა 637 ერთეულით გაიზარდა და ამ მონაცემმა 6041-ს მიაღწია. შესაბამისად, ჩვენ გავაანალიზეთ ამ შედეგების გამომწვევი მიზეზები და დავადგინეთ, რომ ერთ-ერთი მთავარი მიზეზი სიჩქარის გადაჭარბებაა. გასულ წელს, 1 500 000-ზე მეტი ჯარიმაა გამოწერილი შინაგან საქმეთა სამინისტროს მიერ სიჩქარის გადაჭარბების ფაქტებზე“, - აღნიშნა ალექსანდრე დარახველიძემ. კანონპროექტის ავტორია შინაგან საქმეთა სამინისტრო, ხოლო ინიციატორი - საქართველოს მთავრობა.