ირმა სოხაძე სააკაშვილზე: ექსპრეზიდენტი კვლავაც არ ცნობს მისი რეჟიმის სისასტიკის კრიტიკოსებს და მათ „გაშავებას“ ასეთი სულმდაბალი ფორმით ცდილობს, ვერანაირი გაკვეთილი ვერ ისწავლეს და კიდევ აქეთ გვამუნათებენ, როგორ გავბედეთ და მათი სისასტიკე გადავირჩიეთ

მომღერალი ირმა სოხაძე, როგორც თვითონ ამბობს, სოციალურ ქსელში მხოლოდ საზოგადოებისთვის აქვეყნებს პოსტს და არა სააკაშვილის პასუხად.

ის აცხადებს, რომ სააკაშვილის ტექსტში მოტანილი ინფორმაცია მისი მეუღლის დაკავებასთან დაკავშირებით, სიმართლეს არ შეესაბამება.

სოხაძის განმარტებით, „ის, რომ ექსპრეზიდენტი კვლავაც არ ცნობს მისი რეჟიმის სისასტიკის კრიტიკოსებს და მათ „გაშავებას“ ასეთი სულმდაბალი ფორმით ცდილობს, თავისთავად მრავლისმეტყველი ამბავია!“

მისივე თქმით, ვერანაირი გაკვეთილი ვერ ისწავლეს და ვერც დასკვნები გამოიტანეს.

„ამ ტექსტს ვაქვეყნებ მხოლოდ თქვენთვის, საზოგადოებისთვის და არა სააკაშვილის პასუხად. საჯაროობა მკაფიობას ითხოვს და, უბრალოდ, მინდა ვითარება განვმარტო.

მის ტექსტში მოყვანილი ინფორმაცია სიმართლეს არ შეესაბამება - ვარდების რევოლუციის შემდეგ არც ჩემი მეუღლე დაუკავებიათ და არც სააკაშვილის ხელისუფლებისადმი ჩემი ურყევად უარყოფითი დამოკიდებულებაა განპირობებული პირადი ან ოჯახური გამოცდილებით. ის, რომ ექსპრეზიდენტი კვლავაც არ ცნობს მისი რეჟიმის სისასტიკის კრიტიკოსებს და მათ „გაშავებას“ ასეთი სულმდაბალი ფორმით ცდილობს, თავისთავად მრავლისმეტყველია! ვერანაირი გაკვეთილი ვერ ისწავლეს, ვერც დასკვნები გამოიტანეს. კვლავ ირწმუნებიან, რომ მათ მოწინააღმდეგეებს ყოველთვის „პირადი ინტერესი“ ამოძრავებთ! კიდევ აქეთ გვამუნათებენ - როგორ გავბედეთ და მათი სისასტიკე არ ავირჩიეთ!

რთულ დროში ვცხოვრობთ და ახლა სხვა რეალობასთან გვიწევს ბრძოლა. ამ ახალი რეალობის მიუღებლობამ მე პირადი თუ კარიერული ინტერესების დათმობისკენაც მიბიძგა - ექსპრეზიდენტი ამას ვერ გაიგებს, მაგრამ ბევრი ჩვენგანისთვის ღირებულებები უმნიშვნელოვანესია.

მჯერა, ისტორია ყველაფერს თავის სახელს დაარქმევს.

მადლობას გიხდით მხარდაჭერისთვის - ამით ეს თემა ჩემი მხრიდან დახურულია“, - წერს ირმა სოხაძე.

შეგახსენებთ, სააკაშვილმა დაწერა, „სოხაძის მეუღლე 90-იან წლებში გახდა სულხან მოლაშვილის მოადგილე, ვარდების რევოლუციის შემდეგ მოლაშვილი დაიჭირეს და სოხაძის ქმარიც თან მიაყოლეს“ და სწორედ ამიტომ იყო სოხაძისთვის სააკაშვილის მმართველობა აუტანელი.