ირაკლი კობახიძე: განაშენიანების გეგმა, როგორც კრწანისის, ისე გონიოს შემთხვევაში, დამტკიცდება ეკონომიკის სამინისტროს და მუნიციპალიტეტების ჩართულობით, საჯარო პროცედურის საფუძველზე

განაშენიანების გენერალური გეგმა, როგორც კრწანისის, ისე გონიოს შემთხვევაში, დამტკიცდება, ერთი მხრივ, ეკონომიკის სამინისტროს, ხოლო მეორე მხრივ, მუნიციპალიტეტების ჩართულობით, შესაბამისი საჯარო პროცედურის საფუძველზე, – ამის შესახებ საქართველოს პრემიერ-მინისტრმა, ირაკლი კობახიძემ პარლამენტში, ინტერპელაციის წესით მოსმენისას განაცხადა.

მისივე თქმით, როდესაც განაშენიანების გეგმები შევა შესაბამის საკრებულოებში განსახილველად, საზოგადოება მიიღებს სრულ ინფორმაციას, რა ტიპის დეველოპერული პროექტი განხორციელდება.

„რაც შეეხება უშუალოდ განაშენიანებას, რაც საინტერესო საკითხია საზოგადოებისთვის, უშუალოდ რა ტიპის დეველოპერული პროექტი განხორციელდება, როგორი იქნება სამშენებლო პროექტი. რა თქმა უნდა, შესაბამისი გეგმა, განაშენიანების გენერალური გეგმა, როგორც კრწანისის, ისე გონიოს შემთხვევაში, დამტკიცდება ერთი მხრივ, ეკონომიკის სამინისტროს, ხოლო მეორე მხრივ, მუნიციპალიტეტების ჩართულობით, შესაბამისი საჯარო პროცედურის საფუძველზე. მას შემდეგ, რაც შემუშავდება განაშენიანების კონკრეტული გეგმები, საზოგადოება მიიღებს სრულ ინფორმაციას, რა შენდება. ამან უნდა გაიაროს საკრებულოს პროცედურები, საჯარო განხილვები და ა.შ. შესაბამისად, რა აშენდება და როგორ აშენდება, იქნება საზოგადოებისთვის სრულად ცნობილი მოგვიანებით, როდესაც უკვე ეს გეგმები შევა შესაბამის საკრებულოებში განსახილველად“, – აღნიშნა პრემიერმა „იგლ ჰილსის“ პროექტთან დაკავშირებით.