გენადი არველაძე: სამხრეთ კორეასთან ინვესტიციების ხელშეწყობისა და დაცვის შეთანხმების ამოქმედება ინვესტიციებს წაახალისებს

საქართველოსა და კორეის რესპუბლიკას შორის ინვესტიციების ორმხრივი ხელშეწყობისა და დაცვის შესახებ შეთანხმების პროექტზე მოლაპარაკებების მეხუთე რაუნდი გაიმართა.

ეკონომიკის სამინისტროს ინფორმაციით, საქართველოს მხრიდან მოლაპარაკებებს ეკონომიკისა და მდგრადი განვითარების მინისტრის მოადგილე გენადი არველაძე ხელმძღვანელობდა.

„მომლაპარაკებელთა ჯგუფში საქართველოს მხრიდან მონაწილეობდნენ ეკონომიკისა და მდგრადი განვითარების, იუსტიციის, საგარეო საქმეთა და ფინანსთა სამინისტროს წარმომადგენლები.

როგორც ეკონომიკისა და მდგრადი განვითარების მინისტრის მოადგილე გენადი არველაძემ განაცხადა, შეთანხმების ამოქმედება ხელს შეუწყოს ეკონომიკურ თანამშრომლობას კორეის რესპუბლიკის მხარესთან და წაახალისებს ინვესტიციებს ქვეყნებს შორის.

„კორეის რესპუბლიკა ჩვენთვის ერთ-ერთი მნიშვნელოვანი ინვესტორი ქვეყანაა, რომელთანაც ინვესტიციების მოზიდვის მხრივ უდიდესი პოტენციალი არსებობს. საქართველოსა და კორეას შორის საინვესტიციო შეთანხმების გაფორმება მნიშვნელოვანი სამართლებრივი საფუძველი, აგრეთვე მკაფიო გზავნილი და დამატებითი სტიმულია კორეელი ინვესტორებისათვის სამომავლოდ ინვესტიციების განსახორციელებლად ქვეყნის შერჩევისა და კორეიდან საქართველოში ინვესტიციების წახალისებისთვის,“ - აღნიშნა გენადი არველაძემ.

შეთანხმების პროექტის დებულებები მოიცავს ინვესტიციებისა და ინვესტორების დაცვის მექანიზმებს, მხარეთა შორის დავის წამოჭრის შემთხვევაში, მათი გადაჭრის გზებს, რაც მნიშვნელოვანი წინაპირობაა მხარეთა შორის საინვესტიციო საქმიანობის განვითარებისათვის და ეკონომიკური ურთიერთობების გაღრმავებისათვის.

მოლაპარაკების მომდევნო რაუნდი კორეის რესპუბლიკაში გაიმართება.

აღსანიშნავია, რომ საქართველოში კორეის რესპუბლიკიდან პირველი ინვესტიცია 1997 წელს განხორციელდა, ხოლო 2024 წლის ჩათვლით, ინვესტიციების საერთო მოცულობამ 215.38 მლნ. აშშ დოლარი შეადგინა. ბოლო წლების განმავლობაში კორეიდან ძირითად საინვესტიციო სექტორს ენერგეტიკა წარმოადგენდა“, - აღნიშნულია გავრცელებულ ინფორმაციაში.