ეს არის პირდაპირ მიმართული პროვოკაცია, რომელიც უკრაინის ოფიციალური პირების და სახელმწიფო ინსტიტუტების მხრიდან არაერთი ვნახეთ - ზურაბ ქადაგიძე

 სახელმწიფო უსაფრთხოების სამსახური განცხადებას ავრცელებს. სუსი-ს თქმით, არასწორია მედიაპლატფორმებისა და კონკრეტული აქტივისტების მხრიდან, კამპანიურად გავრცელებული ინფორმაცია, თითქოს უკრაინის დაზვერვის მასალებით, საქართველოს ტერიტორიაზე არსებობს რუსეთის შეიარაღებული ძალების სპეციალური უსაფრთხო კომუნიკაციის ტერმინალების ქსელები.

უსაფრთხოების სამსახური აცხადებს, რომ მათ მსგავსი ინფორმაცია, უკრაინის საგარეო დაზვერვის სამსახურიდანაც არ მიუღიათ. სუს-ის მიერ გავრცელებული ტექსტის თანახმად, უკრაინის დაზვერვამ გავრცელებულ განცხადებაში, მიუთითა, რომ მსგავსი რუსული ქსელები უკრაინასთან, ფრონტის ხაზზე და აფრიკის კონტინენტზე არსებობს, თუმცა ამ განცხადებასთან ერთად გამოქვეყნებულ ფოტოზე დატანილმა ლოკაციამ, უსაფრთხოების სამსახურის განცხადებით, საქართველოს შესახებ არასწორი ინტერპრეტაციის სივრცე დატოვა.

სუსი ახლა ცდილობს გაარკვიოს - რით იყო გამოწვეული განცხადებისგან განსხვავებული მასალის გავრცელება, რომელმაც საქართველოში კონკრეტულ ჯგუფებს "ცრუ და ანტისახელმწიფოებრივი კამპანიის წარმოების" საშუალება მისცა.

საპარლამენტო პოლიტიკური ჯგუფის "ხალხის ძალის" წევრის, ზურაბ ქადაგიძის შეფასებით, ეს არის პირდაპირ მიმართული პროვოკაცია, რომელიც უკრაინის ოფიციალური პირების და სახელმწიფო ინსტიტუტების მხრიდან არაერთი ვნახეთ.

"ეს არის პირდაპირ მიმართული პროვოკაცია, რომელიც არაერთი ვნახეთ წლების განმავლობაში უკრაინის ოფიციალური პირების და სახელმწიფო ინსტიტუტების მხრიდან. მე გაგახსენებთ, რომ საქართველოს ედავებოდნენ ე.წ. შავ ხვრელებს, რუსეთთან თანამშრომლობას, ცდილობდნენ, რომ საქართველოს რეპუტაცია ამ კუთხით დაეზიანებინათ, მაგრამ ვერასდროს შეძლეს. იმავე არიის გაგრძელებაა, რასაც წლების განმავლობაში უკრაინული მხარე აკეთებს. უბრალოდ, აბსოლუტურად გამოვიდნენ რაციონალური სივრციდან ეს ადამიანები", - განაცხადა ზურაბ ქადაგიძემ.