დონალდ ტრამპი - პუტინის მიერ გამოცხადებული სამდღიანი ზავი, შეიძლება, დიდ მიღწევად არ ჩანდეს, მაგრამ ეს ძალიან ბევრია იმასთან შედარებით, საიდანაც დავიწყეთ

აშშ-ის პრეზიდენტი დონალდ ტრამპი ვლადიმერ პუტინის მიერ გამოცხადებულ ე.წ. სამდღიან ზავზე ამბობს, რომ „ეს ძალიან ბევრია იმასთან შედარებით, რაც ადრე იყო“. ამის შესახებ დონალდ ტრამპმა თეთრ სახლში ჟურნალისტებთან საუბრისას განაცხადა.

რუსეთ-უკრაინის ომის კონტექსტში სამშვიდობო ძალისხმევაზე საუბრისას ტრამპმა აღნიშნა, რომ ისინი კარგ პოზიციაში არიან შეთანხმების მისაღწევად.

„როგორც იცით, პუტინმა ახლახან გამოაცხადა სამდღიანი ზავი, რაც შეიძლება, დიდ მიღწევად არ ჩანდეს, მაგრამ ეს ძალიან ბევრია იმასთან შედარებით, თუ იცით, საიდან დავიწყეთ“, – თქვა ტრამპმა.

აშშ-ის პრეზიდენტმა განმარტა, რომ, მისი აზრით, ადრე რუსეთი არ იყო მზად რაიმე სახის ზავისთვის, რადგან მისი წინამორბედი ჯო ბაიდენი სამი წლის განმავლობაში არ ელაპარაკებოდა პუტინს.

შეგახსენებთ, რომ რუსეთის პრეზიდენტმა, ვლადიმერ პუტინმა მეორე მსოფლიო ომში გამარჯვების 80 წლისთავის აღსანიშნავ დღეებში, 9-11 მაისს უკრაინაში ცეცხლის შეწყვეტა გამოაცხადა.