დონალდ ტრამპი მოლაპარაკებებს აწარმოებს ევროპელ მოკავშირეებთან ამერიკული კერძო სამხედრო კომპანიების უკრაინაში შესაძლო განლაგების შესახებ

აშშ-ის პრეზიდენტი, დონალდ ტრამპი მოლაპარაკებებს აწარმოებს ევროპელ მოკავშირეებთან ამერიკული კერძო სამხედრო კომპანიების უკრაინაში შესაძლო განლაგების შესახებ. როგორც ბრიტანული გამოცემა The Telegraph-ი წერს, გეგმის მიხედვით, ისინი ააგებენ თავდაცვით სიმაგრეებსა და ბაზებს, რათა დაიცვან ამერიკის ინტერესები ქვეყანაში.

ეს მიდგომა განიხილება, როგორც კომპრომისი მას შემდეგ, რაც ტრამპმა განაცხადა, რომ აშშ-ის რეგულარული ჯარები უკრაინაში არ განთავსდება.

გეგმის მიხედვით, კერძო სამხედრო კომპანიების ყოფნა კრემლისთვის უნდა იყოს სიგნალი, რომ მათზე ნებისმიერ თავდასხმას შესაძლოა მოჰყვეს აშშ-ის პასუხი.

ევროპელი ოფიციალური პირები მიიჩნევენ, რომ ამან შეიძლება გააძლიეროს შეკავების ეფექტი და, ამავდროულად, შეამციროს შიდა წინააღმდეგობა აშშ-ში „უცხოურ ჩარევასთან“ დაკავშირებით.

ეს გეგმა განიხილება უკრაინის უსაფრთხოების გარანტიებთან დაკავშირებული უფრო ფართო მოლაპარაკებების ფარგლებში, სადაც წამყვან როლს დიდი ბრიტანეთი და საფრანგეთი ასრულებენ.