ავთანდილ აბესლამიძე საქართველოს სახელით ყაზახურ მუსიკალურ კონკურსში მონაწილეობს

ბათუმელი შემსრულებელი ავთანდილ აბესლამიძე რამდენიმე დღის წინ ყაზახეთში, ასტანაში გაემგზავრა, სადაც იმართება მუსიკალური კონკურსი Silk Way Star 2025, სადაც იგი საქართველოს წარმოადგენს. 

„პროექტი ყაზახეთში იმართება და მასში მონაწილეობას 12 ქვეყანა იღებს, მათ შორის საქართველო. სულ 10 ტურია და როგორც უკვე იცით, წარვადგენ საქართველოს და არა ჩემს სახელს. კონკურსი არის ევროვიზიის ანალოგი, რომელიც პირდაპირ ეთერში 20 სექტემბრიდან გავა, მანამდე კი, პირველი ტური უკვე ჩაიწერა და ვემზადებით მეორე ტურისთვის. თითო ტურიდან თითო მონაწილე ვარდება.

კონკურსანტის ტურიდან ტურში გადასვლის გადაწყვეტილებას ჟიური იღებს, როგორც უკვე იცით, კონკურსში მონაწილეობას 12 ქვეყანა იღებს, ჟიურიც სწორედ ამ 12 ქვეყნიდან არის. ჟიურიში ჩვენი ქვეყნიდან დათო კენჭიაშვილია, თუმცა ის საქართველოს ვერ შეაფასებს და შეაფასებს სხვა 11 ქვეყანას“ , - ამბობს ავთო ჩვენთან საუბრისას.