მსოფლიო • 1770042900

აშშ-ის იუსტიციის დეპარტამენტის მიერ გამოქვეყნებულ ჯეფრი ეპშტეინის ფაილებში მიხეილ სააკაშვილიც არის ნახსენები

აშშ-ის იუსტიციის დეპარტამენტის მიერ გამოქვეყნებულ ჯეფრი ეპშტეინის ფაილებში საქართველოს ყოფილი პრეზიდენტის, მიხეილ სააკაშვილის სახელი იძებნება.კერძოდ, ერთ-ერთი დოკუმენტის მიხედვით, ილუზიონისტი დევიდ ბლეინი ქალისთვის, რომლის სახელი და გვარი დაფარულია, სავიზო აპლიკაციასთან დაკავშირებით დახმარებას ითხოვს.ბლეინი საკუთარი თავის წარდგენისას კი აცხადებს, რომ ცნობილი ილუზიონისტია და საქართველოს პრეზიდენტისთვის, მიხეილ სააკაშვილისთვის აქვს წარმოდგენა გამართული.„გამოსვლები მქონდა მთელ მსოფლიოში და დავამყარე თუ მოვხსენი არაერთი მსოფლიო რეკორდი, მათ შორის: სუნთქვის შეკავება 17 წუთზე მეტხანს, 35 საათის გატარება დაახლოებით 32 მეტრის სიმაღლის ბოძზე და ერთი კვირის განმავლობაში კუბოში დამარხული ყოფნა. საერთაშორისო მოგზაურობებისას კერძო მაგიურ ნომრებს ვასრულებდი პრეზიდენტ ბილ კლინტონისა და სახელმწიფო მდივან ჰილარი კლინტონისთვის, პრეზიდენტ ჯორჯ ბუშისთვის, თავდაცვის მდივან დონალდ რამსფელდისთვის პენტაგონში, გუბერნატორ არნოლდ შვარცენეგერისთვის, ჰენრი კისინჯერისთვის, ბილ გეითსისა და მერ მაიკლ ბლუმბერგისთვის. ასევე, მაგიური ნომრები შევასრულე რუსეთის პრეზიდენტ დიმიტრი მედვედევისთვის, საქართველოს პრეზიდენტ მიხეილ სააკაშვილისთვის, უკრაინის პრეზიდენტ ვიქტორ იანუკოვიჩისა და ყაზახეთის პრეზიდენტ ნურსულთან ნაზარბაევისთვის“, - წერს ბლეინი წერილში.

პოლიტიკა • 1769760854

შალვა პაპუაშვილი: ევროკავშირის ელჩი როგორც კი იტყვის, რომ მიუღებელია პრეზიდენტის სასახლეზე შტურმი, იმ ადამიანებს, რომლებიც ამას ევროკავშირის დროშით აკეთებენ, გამოაცლის ბრიუსელის ლეგიტიმაციას

იმ მომენტში, როგორც კი ევროკავშირის ელჩი იტყვის, რომ პრეზიდენტის სასახლეზე ძალადობრივი შტურმი არის მიუღებელი, იმ ადამიანებს, რომლებიც ამას ევროკავშირის დროშით აკეთებენ, გამოაცლის ბრიუსელის ლეგიტიმაციას, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.მისივე თქმით, 4 ოქტომბრის მოვლენები არის ევროკავშირის და ევროკავშირის ელჩის, პაველ ჰერჩინკის მხრიდან დუმილის შედეგი.„4 ოქტომბერი არის დუმილის შედეგი. 4 ოქტომბერთან დაკავშირებით, დუმილზე უარესი იყო ის, რომ პირდაპირ მხარი დაუჭირა ევროკომისიის პრესსპიკერმა ხელისუფლების დამხობის სცენარს, რაც არის კატასტროფა. კატასტროფაა, რომ ბრიუსელის  ბრიფინგების ოთახში მოვისმინეთ ჩვენ ნეპალის სცენარის მხარდაჭერა. ამაზე უარესი რა უნდა დაემართოს ბრიუსელს, რომ აღიაროს, ცივილიზაციურ უფსკრულში მიაქანებს ევროკავშირს.მარტივი კითხვა არის ევროკავშირის და მისი ელჩის მიმართ, მაგალითად, რატომ ერთხელ მაინც არ დაგმო მარიამ ლაშხზე და მის მცირეწლოვან ბავშვებზე თავდასხმა. ხომ შეეძლო, ეთქვა, რომ საქართველოს პარლამენტის წევრ, ქალბატონ მარიამ ლაშხზე, მის არასრულწლოვან შვილებზე თავდასხმა არის მიუღებელი. რატომ არ ამბობს ამას? ხომ შეეძლო ერთი მარტივი წინადადება ეთქვა, რომ საქართველოს პრეზიდენტის სასახლეზე ძალადობრივი შტურმი არის მიუღებელი და დასაგმობი. რატომ არ ამბობს? მოგიწოდებთ ჟურნალისტებს, სადაც შეგხვდებათ ევროკავშირის ელჩი, დაუსვათ ეს კითხვა – რატომ არ გმობს ცალსახად და პირდაპირ საქართველოს პრეზიდენტის სასახლეზე შტურმს, თან მაშინ, როდესაც ამ შტურმსა და პროცესში ჩართული იყვნენ ადამიანები, რომლებიც მხარდაჭერილი და დაფინანსებული არიან ევროკავშირის ბიუჯეტიდან. იმ მომენტში, როგორც კი ევროკავშირის ელჩი იტყვის, რომ პრეზიდენტის სასახლეზე ძალადობრივი შტურმი არის მიუღებელი, იმ ადამიანებს, რომლებიც ამას ევროკავშირის დროშით აკეთებენ, მათ გამოაცლის ბრიუსელის ლეგიტიმაციას. დღეს ისინი სინამდვილეში იმიტომ ბედავენ ევროკავშირის დროშით ხელში იძალადონ, დაწვან პარლამენტი, შტურმი მიიტანონ პრეზიდენტის სასახლეზე, რომ ამის ლეგიტიმაციას აძლევს ბრიუსელი, რომ ევროკავშირის დროშით იძალადონ. ფოტოებიც ხანდახან საჩვენებლად აქვთ გამოტანილი ევროკავშირის სტრუქტურებს, როგორც მისაბაძი მაგალითი, როგორ უნდა იძალადოს ადამიანმა და როგორ უნდა იყოს ძალადობრივი პროტესტი “, – განაცხადა პაპუაშვილმა.

პოლიტიკა • 1769696940

საქართველოს პრეზიდენტი პარლამენტში ყოველწლიური მოხსენებით 17 თებერვალს წარდგება

საქართველოს პრეზიდენტი მიხეილ ყაველაშვილი, ყოველწლიური მოხსენებით ქვეყნის მდგომარეობის უმნიშვნელოვანეს საკითხებზე პარლამენტის წინაშე 17 თებერვალს წარდგება, - ამის შესახებ პარლამენტის თავმჯდომარემ, შალვა პაპუაშვილმა ბიუროს დღევანდელ სხდომაზე განაცხადა.მისივე თქმით, პარლამენტის რეგლამენტით, პარლამენტი საგაზაფხულო სესიის პირველი პლენარული სხდომის დღეს, საქართველოს კონსტიტუციის შესაბამისად ისმენს საქართველოს პრეზიდენტის ყოველწლიურ მოხსენებას ქვეყნის მდგომარეობის უმნიშვნელოვანეს საკითხებზე, თუმცა, თარიღის შეცვლა შესაძლებელია პარლამენტის თავმჯდომარესთან შეთანხმებით.„აღნიშნულ საკითხზე კონსულტაცია გვქონდა და შევთანხმდით, რომ 17 თებერვალს იქნება პრეზიდენტის ყოველწლიური მოხსენება. გადაწყვეტილების მიღებისას გათვალისწინებული იყო ის ფაქტი, რომ მომავალ კვირაში დაგეგმილია პრემიერ-მინისტრის ქვეყნის გარეთ ვიზიტი და მნიშვნელოვანია, რომ მთავრობა და პრემიერ-მინისტრი წარმოდგენილი იყვნენ პრეზიდენტის ყოველწლიური მოხსენების დროს“, - განაცხადა პარლამენტის თავმჯდომარემ.

პოლიტიკა • 1769690413

საქართველოს პრეზიდენტი მიხეილ ყაველაშვილი პარლამენტში ყოველწლიური მოხსენებით 17 თებერვალს წარდგება

საქართველოს პრეზიდენტი მიხეილ ყაველაშვილი პარლამენტის წინაშე ყოველწლიური მოხსენებით შემდეგი სასესიო კვირის სამშაბათს, 17 თებერვალს წარდგება.ამის შესახებ საქართველოს პარლამენტის თავმჯდომარემ, შალვა პაპუაშვილმა პარლამენტის ბიუროს დღევანდელ სხდომაზე განაცხადა.„საქართველოს პარლამენტის რეგლამენტით, საგაზაფხულო სესიის პირველ პლენარულ სხდომაზე, როგორც წესი, არის პრეზიდენტის ყოველწლიური მოხსენება და პარლამენტის თავმჯდომარესთან შეთანხმებით, შეიძლება, ეს თარიღი შეიცვალოს. ჩვენ გვქონდა კონსულტაცია პრეზიდენტთან. მათ შორის იმის გათვალისწინებით, რომ მომავალ კვირას დაგეგმილია საქართველოს პრემიერ-მინისტრის ვიზიტი ქვეყნის გარეთ და მნიშვნელოვანია, მთავრობა, პრემიერ-მინისტრიც წარმოდგენილი იყოს პრეზიდენტის ყოველწლიური მოხსენების დროს, საერთო კონსულტაციით შევთანხმდით, რომ შემდეგ სასესიო კვირას, სამშაბათს, 17 თებერვალს იქნება პრეზიდენტის ყოველწლიური მოხსენება. როგორც იცით, პრეზიდენტის ყოველწლიური მოხსენების დღეს, პლენარულ სხდომაზე სხვა საკითხები არ განიხილება. ასე რომ, 17 თებერვალს გვექნება ეს ერთი უმნიშვნელოვანესი საკითხი“, – განაცხადა შალვა პაპუაშვილმა.

პოლიტიკა • 1769689587

მიხეილ ყაველაშვილმა საქართველოს ეროვნული პრემიის კონკურსის გამარჯვებულები დააჯილდოვა

საქართველოს პრეზიდენტმა, მიხეილ ყაველაშვილმა საქართველოს ეროვნული პრემიის კონკურსის გამარჯვებულები დააჯილდოვა.პრეზიდენტმა გამარჯვებულებს მადლობა გადაუხადა.„უდიდესი პატივისცემით მოგესალმებით თქვენ – ჩვენს სახელოვან მეცნიერებს, ადამიანებს, რომლებსაც უდიდესი ღვაწლი მიგიძღვით ჩვენი ერისა და სამშობლოს წინაშე. მინდა, მადლობა გადაგიხადოთ იმ ღირსეული წვლილისთვის, რომელიც არა მხოლოდ ქართული, არამედ მსოფლიოს სამეცნიერო საქმიანობის გამდიდრებაში შეგაქვთ. მეცნიერების როლი ნებისმიერი საზოგადოებისთვის ფუნდამენტურია, რადგანაც სწორედ თქვენ ქმნით ობიექტურ და დასაბუთებულ ცოდნას. თქვენი წარმატებული, აღიარებული საქმიანობა რომ არა, ურთულესი იქნებოდა ჩვენი წარსულის გააზრება და მომავლის განსაზღვრა, იდენტობისა და ღირებულებების შენარჩუნება, სიცრუისა და სიმართლის გარჩევა, მსოფლიოს უკეთეს ადგილად ქცევა და იმ გამოწვევების დაძლევა, რომელიც საუკუნეების განმავლობაში კაცობრიობისთვის გადაულახავ ბარიერად იყო ქცეული. დღეს, როდესაც სამყარო იცვლება და ვითარდება, კიდევ უფრო დიდი მნიშვნელობა ენიჭება ფაქტებითა და ანალიზით გამყარებულ მეცნიერულ კვლევას, რომელიც, პრაქტიკულ საქმიანობაში საზოგადოების ინტერესებისა და კეთილდღეობის უზრუნველყოფაზე იქნება ორიენტირებული“, – აღნიშნა მიხეილ ყაველაშვილმა.როგორც მიხეილ ყაველაშვილმა განაცხადა, „ეროვნული პრემიის“ მთავარი იდეა მეცნიერების მიერ გაკეთებული საქვეყნო საქმის დაფასებაა.„აუცილებლად უნდა აღვნიშნო, რომ თქვენი წვლილი ფასდაუდებელია ჩვენი ქვეყნისა და ხალხის ინტერესების დაცვასა და განმტკიცებაში, რადგანაც, გარდა უდიდესი სამეცნიერო ღირებულებისა, თქვენი ნაშრომების ინტეგრირება შესაძლებელია საგანმანათლებლო პროცესში, როგორც სასკოლო, ისე საუნივერსიტეტო დონეზე. ეს კი გრძელვადიან პერსპექტივაში, მომავალი თაობებისთვის ხარისხიანი განათლების მიღებისა და ქართული, პატრიოტული სულისკვეთებით აღზრდის მყარ საფუძველს ქმნის. ამ პროცესში, ძალიან მნიშვნელოვანია სახელმწიფოს ჩართულობა და ის ხელშეწყობა, რომელიც ჩვენი მეცნიერებისთვის კიდევ უფრო მეტ შესაძლებლობას აჩენს. „ეროვნული პრემიის“ იდეაც სწორედ იმაში მდგომარეობას, რომ ჩვენი შესაძლებლობის ფარგლებში, დავაფასოთ ის საქვეყნო საქმე, რომელსაც თქვენ აკეთებთ. მოხარული ვარ, რომ გამოცხადებულ კონკურსს დიდი გამოხმაურება მოჰყვა. აქვე ვისარგებლებ შემთხვევით და მადლობას გადავუხდი „ეროვნული პრემიის“ კომისიის თითოეულ წევრს. მართლაც შთამბეჭდავი შემადგენლობაა, ნებისმიერ კომისიას დაამშვენებდა ჩვენი კომისიის წევრების მაღალი კვალიფიკაცია. გილოცავთ პრემიის მფლობელებს ამ გამარჯვებას. თქვენ ხართ მაგალითი ჩვენი ახალგაზრდა თაობისთვის. დარწმუნებული ვარ, კიდევ ბევრი ღირსეული ქართველი აღიზრდება თქვენს ღვაწლზე“, – განაცხადა მიხეილ ყაველაშვილმა.საქართველოს ეროვნული პრემიის კომისიის გადაწყვეტილების საფუძველზე, პრეზიდენტის განკარგულებით, საქართველოს ეროვნული პრემია მიენიჭათ:ლევან ჯაფარიძეს – სამეცნიერო ნაშრომთა ციკლისათვის: „მიწისქვეშა ნაგებობების მექანიკა“, „მიწისქვეშა ნაგებობათა სამაგრის გაანგარიშება ზღვრულ მდგომარეობებზე“, „მიწისქვეშა ნაგებობების ზღვრული საექსპლუატაციო მდგომარეობები“; ავტორთა ჯგუფს: როინ მეტრეველს, ვახტანგ გურულს, ლელა მიქიაშვილს, ვალერიანე ვაშაკიძეს, გიორგი ჭეიშვილს, ოთარ ჯანელიძეს, ჯონი კვიციანსა და ალექსანდრე დაუშვილს – სამეცნიერო მონოგრაფიული ნაშრომისათვის „კავკასიის ისტორია“ (ორტომეული).მიხეილ ყაველაშვილმა საქართველოს ეროვნული პრემიის გამარჯვებულებს საქართველოს ეროვნული პრემიის ლაურეატის დიპლომები, სამკერდე ნიშნები და შესაბამისი ფულადი გასაცემელი გადასცა.კონკურსი 2025 წლის 12 დეკემბერს გამოცხადდა. ეროვნული პრემიის კომისიის შემადგენლობაში იყვნენ:კომისიის თავმჯდომარე – სამართლის დოქტორი, პროფესორი, საქართველოს განათლების, მეცნიერებისა და ახალგაზრდობის მინისტრის მოადგილე, ზვიად გაბისონია კომისიის წევრები: ისტორიის მეცნიერებათა დოქტორი, პროფესორი, სსიპ – ივანე ჯავახიშვილის სახელობის თბილისის სახელმწიფო უნივერსიტეტის რექტორი, სსიპ – საქართველოს მეცნიერებათა ეროვნული აკადემიის აკადემიკოსი ჯაბა სამუშია ტექნიკის მეცნიერებათა კანდიდატი, პროფესორი, სსიპ – საქართველოს ტექნიკური უნივერსიტეტის რექტორი, სსიპ – საქართველოს მეცნიერებათა ეროვნული აკადემიის აკადემიკოსი დავით გურგენიძე; ეკონომიკის მეცნიერებათა დოქტორი, სსიპ საქართველოს მეცნიერებათა ეროვნული აკადემიის აკადემიკოსი-მდივანი ვლადიმერ პაპავა ეკონომიკის მეცნიერებათა დოქტორი, პროფესორი, აკადემიკოსი, სსიპ – საქართველოს სოფლის მეურნეობის მეცნიერებათა აკადემიის პრეზიდენტი გივი ჯაფარიძე; ფიზიკის მეცნიერებათა დოქტორი, სსიპ – ილიას სახელმწიფო უნივერსიტეტის პროფესორი, სსიპ – საქართველოს მეცნიერებათა ეროვნული აკადემიის აკადემიკოსი გიორგი ჯაფარიძე; მედიცინის დოქტორი, პროფესორი, სსიპ – თბილისის სახელმწიფო სამედიცინო უნივერსიტეტის რექტორი ირაკლი ნატროშვილი; ბიოლოგიის მეცნიერებათა დოქტორი, სსიპ – გიორგი ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტის დირექტორის მოვალეობის შემსრულებელი მზია ქუთათელაძე; ფილოლოგიის მეცნიერებათა დოქტორი, სსიპ – ივანე ჯავახიშვილის სახელობის თბილისის სახელმწიფო უნივერსიტეტის პროფესორი, თსუ-ს არნოლდ ჩიქობავას სახელობის ენათმეცნიერების ინსტიტუტის დირექტორი ნანა მაჭავარიანი.პრეზიდენტის სასახლეში გამართულ ცერემონიას საქართველოს განათლების, მეცნიერებისა და ახალგაზრდობის მინისტრი გივი მიქანაძე, საქართველოს განათლების, მეცნიერებისა და ახალგაზრდობის მინისტრის მოადგილე, ეროვნული პრემიის კომისიის თავმჯდომარე ზვიად გაბისონია და საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი და განათლების, მეცნიერებისა და კომიტეტის თავმჯდომარის პირველი მოადგილე, გიორგი ჩაკვეტაძე ესწრებოდნენ.ინფორმაციას საქართველოს პრეზიდენტის ადმინისტრაცია ავრცელებს.  

საზოგადოება • 1769672568

თბილისის სატრანსპორტო კომპანიის" 17 თანამშრომელს საპატიო თანამშრომლის წოდება მიენიჭა

თბილისის მეტროს 60 წლის იუბილესთან დაკავშირებით, "თბილისის სატრანსპორტო კომპანიის" 17 თანამშრომელს საპატიო თანამშრომლის წოდება მიენიჭა.აღნიშნულ თანამშრომლებს დღეს თბილისის მერმა კახა კალაძემ მერიაში უმასპინძლა და განსაკუთრებული მადლობა დედაქალაქის მთავრობის სხდომაზე გადაუხადა."ჩვენ ძალიან ბევრს ვსაუბრობთ სატრანსპორტო პოლიტიკაზე, რომელშიც განსაკუთრებული ადგილი უკავია მეტროს. წელს თბილისის მეტროს გახსნიდან 60 წელი შეუსრულდა, რომელთან დაკავშირებითაც ხვალ საზეიმო ღონისძიება გაიმართება. არ დავიწყებ საუბარს იმაზე, თუ რა მძიმე მემკვიდრეობა დაგვხვდა ამ მიმართულებით, რა მნიშვნელოვანი ღონისძიებები და პროექტები განვახორციელეთ ბოლო წლებში და რა გამოწვევებს ვეჯახებით დღემდე, როცა საქმე სწორედ მეტროსადგურების რეაბილიტაციას და გამართულ მუშაობას ეხება. თბილისის მეტრო 1966 წლის 10 იანვარს საზეიმო ვითარებაში გაიხსნა. მეტრო დღის განმავლობაში უამრავ ადამიანს ემსახურება. მას დღეში, დაახლოებით, 500 ათასი მოქალაქე გადაჰყავს", - განაცხადა კახა კალაძემ.მისივე თქმით, თბილისის მეტროს ფუნქციონირებაში და შეუფერხებელ მუშაობაში სულ 2 800-მდე თანამშრომელია ჩართული."მინდა, მათ განსაკუთრებული მადლობა გადავუხადო. ასევე, მეტროს 60 წლის იუბილესთან დაკავშირებით, გვინდა, საპატიო თანამშრომლის წოდება მივანიჭოთ "თბილისის სატრანსპორტო კომპანიის" 17 თანამშრომელს, რომელთაც სპეციალური სიგელები გადაეცემათ. მინდა, უდიდესი მადლობა გადაგიხადოთ გაწეული შრომისთვის, პროფესიონალიზმისთვის, იმისთვის, რომ დღემდე სიყვარულითა და პატიოსნებით ემსახურებით ჩვენს ულამაზეს დედაქალაქს და მის მცხოვრებლებს", - აღნიშნა თბილისის მერმა."თბილისის სატრანსპორტო კომპანიის" თანამშრომლები, რომლებიც მერმა დააჯილდოვა, არიან:1. თამაზ ნაყოფია - გაერთიანებული სახელოსნოს უფროსის მოადგილე;2. ბადრი კაპანაძე - ელექტროდეპო გლდანის N5 აწევითი საამქროს უფროსი ოსტატი;3. ლევან ხარაიძე - ელექტრომექანიკური სამსახურის ელექტრომექანიკური დისტანციის უფროსი;4. თამაზ შათირიშვილი - ელექტრომომარაგების სამსახურის ელექტრომომარაგების და ავტო-ტელემართვის დისტანციის სახელოსნოს უფროსი;5. ემზარი გოგაძე - მოძრაობის სამსახურის უფროსის მოადგილე;6. ვასილ ბიჭაშვილი - ელექტროდეპო ნაძალადევის N4 აწევითი საამქროს უფროსი;7. ხვიჩა ქადაგიშვილი - სალიანდაგო და გვირაბნაგებობათა სამსახურის ექსპლუატაციის უფროსი;8. კობა ქველაძე - ელექტროდეპო ნაძალადევის N2 საექსპლუატაციო საამქროს ხაზის მემანქანე;9. მედეა ბაქრაძე - გენერალური დირექტორის აპარატის არქივის წამყვანი სპეციალისტი;10. ლიანა კოშაძე - ბუღალტერიის ფულადი სახსრების მოძრაობის განყოფილების წამყვანი სპეციალისტი;11. ავთანდილ მჭედლიშვილი - ლაბორატორიული ცენტრის საგამოცდო ლაბორატორიის კოროზიისა და წინაღობის გაზომვის სპეციალისტი;12. ლუიზა ღონღაძე - შიდა მონიტორინგის სამსახურის ინსპექტირების განყოფილების ვიდეომონიტორინგის ინსპექტორი;13. ავთანდილ ხუჭუა - სიგნალიზაციის და კავშირგაბმულობის სამსახურის სარემონტო-ტექნოლოგიური დისტანციის უფროსი;14. მურთაზ მამუჩიშვილი - ექსპლუატაციის სამსახურის ექსპლუატაციის ზედამხედველობის განყოფილების დეფექტოსკოპიის ლაბორატორიის ოპერატორი;15. ბესიკ ხარატიშვილი - თბილისის მეტროპოლიტენის მუშაკთა პროფესიული კავშირის თავმჯდომარე.16. იური გაბელია - სალიანდაგო და გვირაბნაგებობათა სამსახურის ლიანდაგის მონტიორი;17. მერი კობახიძე - ელექტროდეპო "ნაძალადევის" უფროსი განმწესებელი.გარდა ამისა, დედაქალაქის მერის თქმით, ხვალინდელ საზეიმო ღონისძიებაზე საქართველოს პრეზიდენტი ღირსების ორდენით დააჯილდოებს თბილისის მეტროს ცხრა ღვაწლმოსილ თანამშრომელს, რომლებმაც განსაკუთრებული წვლილი შეიტანეს მეტროს საქმიანობაში."ჩვენ ამ მიმართულებით კიდევ ძალიან ბევრი გვაქვს სამუშაო. დარწმუნებული ვარ, თითოეული თქვენგანის ჩართულობით, პროფესიონალიზმითა და საქმისადმი ერთგულებით, ყველა გამოწვევას გავუმკლავდებით და ღირსეულად ვუპასუხებთ", - განაცხადა კახა კალაძემ.

პოლიტიკა • 1769598104

შალვა პაპუაშვილი მაია სანდუზე: როდესაც სახელმწიფოს მეთაური ამბობს, რომ ეპატარავება საკუთარი სახელმწიფო და იმდენად მცირედ მიაჩნია, რომ გადასარჩენად საჭიროა გაუქმდეს, ფაქტია, რომ სხვადასხვა ორბიტაზე ვართ

ეს [განცხადება] ასევე აჩვენებს იმას, რომ ამას სხვების კარნახით აკეთებს, რადგან წელიწადში ერთხელ გავახსენდებით ხოლმე და რატომღაც ფიქრობს, რომ აქვს რაიმე მორალური, პოლიტიკური, იდეოლოგიური უპირატესობა, რომ ქართველ ხალხს ესაუბროს ამ ტონით, - განაცხადა საქართველოს პარლამენტის თავმჯდომარე შალვა პაპუაშვილმა.ჟურნალისტებმა მას საქართველოსთან დაკავშირებით, მოლდოვის პრეზიდენტის მაია სანდუს განცხადების შეფასება სთხოვეს."ყველას შეგახსენებთ, რომ მაია სანდუ არის ის ადამიანი, რომელმაც [საქართველოში] 4 ოქტომბერს ხელისუფლების დამხობის პროცესს მხარი დაუჭირა. მაშინ, როდესაც საქართველოს პრეზიდენტის სასახლეზე მიდიოდა ძალადობრივი შტურმი, მან საჯარო განცხადებით მხარი დაუჭირა ხელისუფლების დამხობაში მონაწილე ჯგუფს, რაც აჩვენებს რა ღირებულებების საწყისზე დგას ეს ადამიანი. ეს [განცხადება] ასევე აჩვენებს იმას, რომ ამას სხვების კარნახით აკეთებს, რადგან წელიწადში ერთხელ გავახსენდებით ხოლმე და რატომღაც ფიქრობს, რომ აქვს რაიმე მორალური, პოლიტიკური, იდეოლოგიური უპირატესობა, რომ ქართველ ხალხს ესაუბროს ამ ტონით. როდესაც ვისმენთ ამგვარ ანტიქართულ რიტორიკას მოლდოვის პრეზიდენტის მხრიდან, ეს სრულიად აღმაშფოთებელია და მნიშვნელოვანია, რომ ამაზე იყოს რეაქცია. ალბათ თავის დროზეც უნდა გვქონოდა ძალიან მკაფიო რეაქცია, როდესაც მოლდოვის პრეზიდენტმა ღიად დაუჭირა მხარი ხელისუფლების ძალადობრივად დამხობაში მონაწილე ჯგუფებს.ეს არის ადამიანი, რომელიც მხარს უჭერს საკუთარი სახელმწიფოს გაუქმებას და არ მგონია, რომ აქ სალაპარაკო გვქონდეს რაიმე სახელმწიფოებრივ ღირებულებებზე. როგორც წესი, ჩვენი შინ ნაზარდი ძალად ევროპელები ყველას ექომაგებიან ხოლმე საქართველოს და საკუთარი ქვეყნის გარდა და შეგახსენებთ რა იყო ქალბატონი სანდუს [განცხადების] დასაბუთება. მისი დასაბუთება იყო, რომ მოლდოვა არის პატარა სახელმწიფო, ვერ გადარჩება და ამიტომ უნდა შეუერთდეს დიდ სახელმწიფოს. როდესაც სახელმწიფოს მეთაური ამბობს, რომ ეპატარავება საკუთარი სახელმწიფო და იმდენად მცირედ მიაჩნია, რომ იმისთვის რომ გადარჩეს, საჭიროა გაუქმდეს, ფაქტია, რომ მართლაც სხვადასხვა ორბიტაზე ვართ ღირებულებების მხრივ და მოლდოვას რაიმე კონკურენციას ვერ გავუწევთ ამ მხრივ“, - აღნიშნა პაპუაშვილმა.

პოლიტიკა • 1769535617

საქართველოს პრეზიდენტმა 59 პირი შეიწყალა

საქართველოს პრეზიდენტმა მიხეილ ყაველაშვილმა ნინოობის დღესასწაულთან დაკავშირებით 59 პირი შეიწყალა. შეწყალების აქტი შეეხო 57 მსჯავრდებულს, ხოლო 2 პირს მოეხსნა ნასამართლობა.საქართველოს პრეზიდენტის მიერ მისთვის კონსტიტუციით მინიჭებული ექსკლუზიური უფლებამოსილების გამოყენება ეფუძნება ჰუმანიზმის პრინციპს, ასევე სახელმწიფო ინტერესს.

კულტურა • 1769407860

მიხეილ ყაველაშვილი რუსთაველის თეატრში სპექტაკლს „მიჯაჭვული პრომეთე“ დაესწრო

საქართველოს პრეზიდენტი მიხეილ ყაველაშვილი რუსთაველის თეატრში კულტურის მინისტრთან თინათინ რუხაძესთან ერთად, სპექტაკლს „მიჯაჭვული პრომეთე“ დაესწრო.პრეზიდენტმა მადლობა გადაუხადა რობერტ სტურუას და რუსთაველის თეატრის დასს უნიკალური სპექტაკლის შექმნისთვის და აღნიშნა, რომ უდიდესი ბედნიერებაა გამორჩეული და გენიალური რეჟისორის შემოქმედების ხილვა.„უდიდესი ბედნიერებაა ჩვენი გამორჩეული და გენიალური რეჟისორის შემოქმედების ხილვა, რომელიც  ყოველ ჯერზე ახალ  ინტერპრეტაციას გვთავაზობს დაგვაიძულებს, დავფიქრდეთ როგორც კაცობრიობის, ისე ერთი ადამიანის საზრისზე, ბედზე.კიდევ ერთხელ, დიდი მადლობა ბატონ რობიკოს და რუსთაველის თეატრის დასს ამ უნიკალური სპექტაკლის შექმნისთვის“, – აღნიშნა მიხეილ ყაველაშვილმა.რუსთაველის ეროვნულ თეატრში სპექტაკლის „მიჯაჭვული პრომეთე“ პრემიერა 2024 წელს შედგა.

პოლიტიკა • 1769406967

ნეიტრალური საქართველო: გამაოგნებელია, რომ ვერ ვიხილეთ ევრობიუროკრატების შეფასებები მინეაპოლისის მოვლენებთან დაკავშირებით, განსაკუთრებით იმ ფონზე, როცა ისინი საქართველოში გაცილებით უმნიშვნელო პროცესებზეც კი, მუდმივად მყისიერად რეაგირებენ

გვსურს გამოვეხმაუროთ ამერიკის შეერთებულ შტატებში, კერძოდ მინეაპოლისში მიმდინარე საგანგაშო პროცესებს და იმ ძალადობას, რომელსაც ჩვენ ვხედავთ ერთი მხრივ სახელმწიფოს, ამ შემთხვევაში − სასაზღვრო სამსახურის აგენტების მხრიდან, რასაც უკვე ორი ადამიანის მკვლელობა მოჰყვა, მეორე მხრივ კი, საპროტესტო აქციის მონაწილეების მიერ გამოვლენილ ძალადობის ფაქტებს და მათ მიერ მოწყობილ არეულობას, - ნათქვამია ერთიანი ნეიტრალური საქართველოს განცხადებაში.როგორც განცხადებაში ვკითხულობთ, ევროპული ინსტიტუტები თუ კონკრეტული ლიდერები საქართველოში განვითარებულ უმნიშვნელო პროცესებზეც კი მუდმივად რეაგირებენ, მაშინ როდესაც აშშ-ში მიმდინარე საგანგაშო პროცესებთან დაკავშირებით „პირში წყალი აქვთ ჩაგუბებული“.„ერთიან ნეიტრალურ საქართველოში“ მიიჩნევენ, რომ ეს კიდევ ერთი დადასტურებაა იმ ორმაგი სტანდარტის, რასაც საქართველოს მიმართ წლებია ადგილი აქვს.„რა თქმა უნდა, ყველა, ვინც ამ პროცესებს აკვირდება, კარგად ხედავს, რომ ვითარება მძიმე და საგანგაშოა, რასაც აშშ-ის პრეზიდენტის განცხადებაც მოწმობს, რომლითაც დონალდ ტრამპმა მინეაპოლისში მომხდარ მკვლელობაში ბრალეულობა ქალაქის მერს, ასევე მინესოტას გუბერნატორს დააკისრა, და „აჯანყების წაქეზებაში“ დაადანაშაულა. გამაოგნებელია, რომ ამერიკის შეერთებულ შტატებში ამ საგანგაშო პროცესებისა და ორმხრივი ძალადობის დაწყების დღიდან მოყოლებული, ჩვენ ვერ ვიხილეთ ევროპული ინსტიტუტების თუ კონკრეტული ლიდერების შეფასებითი განცხადებებიც კი, მინეაპოლისში მიმდინარე მოვლენებთან დაკავშირებით. განსაკუთრებით იმ ფონზე, როდესაც ევროპული ინსტიტუტები, რიგი ევროპული სახელმწიფოების ლიდერები თუ ევრობიუროკრატები არათუ მსგავს, არამედ გაცილებით უმნიშვნელო პროცესებზეც კი, მუდმივად მყისიერად რეაგირებენ. ამის ყველაზე თვალსაჩინო მაგალითი საქართველო და ჩვენს ქვეყანაში ბოლო 4 წლის განმავლობაში განვითარებული რევოლუციური პროცესებია. არა მხოლოდ პოლიტიკოსები, არამედ ჩვენი ქვეყნის მოსახლეობა ნათლად ხედავდა, რომ მომიტინგეთა მხრიდან გამოვლენილი ძალადობის, სამართალდამცველებისთვის მიყენებული ჯანმრთელობის მძიმე დაზიანებების, ე.წ. მოლოტოვის კოქტეილების გამოყენების, საქართველოს პარლამენტის გადაწვის მცდელობისა თუ სხვა, უკანონო ქმედებების მიუხედავად, რაც, საბოლოო ჯამში, კანონიერად არჩეული ხელისუფლების დამხობისკენ იყო მიმართული, ქართულმა სამართალდამცავმა უწყებებმა იუველირული სიზუსტით იმოქმედეს და ყოველგვარი მსხვერპლის გარეშე, იხსნეს სახელმწიფო უდიდესი საფრთხისგან.აღნიშნული პროცესები 4 ოქტომბრის „მშვიდობიანი დამხობის“ ძალადობრივი აქტით დაგვირგვინდა, რომლის ფარგლებში, აქციის მონაწილეები საქართველოს პრეზიდენტის რეზიდენციის ეზოში შეიჭრნენ და სახელმწიფო ინსტიტუტის ძალით დაკავება სცადეს. ამავდროულად, წინა შემთხვევებისგან განსხვავებით, საქმეში ფიგურირებდა ცეცხლსასროლი იარაღისა და ასაფეთქებელი ნივთიერების საკითხი. „მშვიდობიანი დამხობის“ მიმდინარეობის პარალელურად, რაც სხვა არაფერი იყო, თუ არა სახელმწიფო გადატრიალების ძალადობრივი მცდელობა, ყველამ ნათლად დავინახეთ, რომ ევროპელი ლიდერები თუ ევრობიუროკრატები არათუ სახელმწიფო გადატრიალების მცდელობას არ გმობდნენ, არამედ სინქრონულ რეჟიმში, მოძალადე მომიტინგეებს უჭერდნენ მხარს, რითაც სახელმწიფო გადატრიალების მცდელობას ღიად ახალისებდნენ! და რომ არა სპეციალური სამსახურების ეფექტიანი ქმედებები, რასაც სამწუხაროდ, არაერთი სამართალდამცველის ფიზიკური დაზიანება მოჰყვა, შესაძლოა ქვეყანას ეს უდიდესი საფრთხე თავიდან ვერ აერიდებინა.ამერიკის შეერთებულ შტატებში მიმდინარე პროცესებისგან განსხვავებით, აღნიშნული ძალადობრივი პროცესების ფარგლებში, ჩვენ არაერთი ევროპელი ლიდერის, აშშ-ის წინა ადმინისტრაციის წარმომადგენლის და ევროპელი ბიუროკრატის აბსურდული განცხადება ვიხილეთ, რომლითაც ისინი ხელისუფლებას „მშვიდობიანი მომიტინგეების“ მიმართ ძალის გამოყენებაში უტიფრად ადანაშაულებდნენ. ბოლოს საქმე იქამდეც კი მივიდა, რომ BBC-იმ „ქართულ ოცნებას“ პირველი მსოფლიო ომის დროინდელი, აკრძალული ნივთიერების − „კამიტის“ გამოყენება დააბრალა, არადა, როგორც გამოძიებამ დაადგინა, „კამიტი“ არათუ მიტინგების დაშლისას არ გამოყენებულა, არამედ შინაგან საქმეთა სამინისტროს ეს ნივთიერება არასდროს, მათ შორის „ნაციონალური მოძრაობის“ მმართველობის დროსაც კი, არ შეუძენია.აქვე, ხაზგასმით უნდა აღვნიშნოთ, რომ საქართველოს ხელისუფლების მრავალგზის მოწოდების მიუხედავად, ევროპელ ლიდერებს თუ ბიუროკრატებს არათუ მომიტინგეთა მხრიდან გამოვლენილი ძალადობის არცერთი ფაქტი არ დაუგმიათ, არამედ საქართველოში პროცესების რადიკალიზაციისა და ხელისუფლების რევოლუციური გზით შეცვლის მცდელობებში ფიზიკურადაც კი იყვნენ ჩართულნი. სიმართლის გარკვევის შემდეგ, საქართველოს წინააღმდეგ ორგანიზებულ კამპანიაზე არცერთ მათგანს პასუხისმგებლობა არ აუღია!ყოველივე ზემოთქმული მხოლოდ მცირე შეჯამებაა იმ სამარცხვინო პროცესებისა, რასაც „დიფ სთეითის“ მორჩილი აქტორები საქართველოს წინააღმდეგ აწარმოებდნენ, დღეს კი, ამ ადამიანებს ამერიკის შეერთებულ შტატებში მიმდინარე პროცესებთან დაკავშირებით პირში წყალი აქვთ ჩაგუბებული და გამაყრუებლად დუმან! ეს ყველაფერი კიდევ ერთხელ ადასტურებს იმას, რაზედაც წლებია ღიად და საჯაროდ ვაცხადებთ, რომ რეალურად, ამერიკის შეერთებული შტატებიც, ევროპული ქვეყნების თუ ბრიუსელის ბიუროკრატიის დიდი ნაწილი, „დიფ სთეითის“ მიერ იმართება, შესაბამისად, არაფერია გასაკვირი იმაში, რომ ისინი მინეაპოლისში მიმდინარე პროცესებს უბრალოდ არ იმჩნევენ. ამავდროულად, ეს კიდევ ერთი, ნათელი დადასტურებაა იმ უსამართლო დამოკიდებულებისა და ორმაგი სტანდარტისა, რასაც საქართველოსთან მიმართებით წლებია ვხედავთ, თუმცა, სამწუხაროდ, მიგვაჩნია, რომ დღევანდელ, სწრაფად ცვალებად პოლიტიკურ გარემოში, რომელიც ძირითადად, „დიფ სთეითის“ დიქტატით იცვლება, ჩვენი ქვეყნის მიმართ ამგვარი დამოკიდებულების მაგალითები არათუ შემცირდება, შესაძლოა კიდევ უფრო იმატოს, რადგან სწორედ ასეთია მშვიდობისა და სუვერენიტეტის დაცვის ფასი“, - წერია განცხადებაში.

პოლიტიკა • 1768896885

ნებისმიერ ჰუმანურ აქტში პოლიტიკური ანგაჟირების შეტანა ამ აქტს აფუჭებს და ცრუ მოლოდინებს წარმოშობს, უნდათ, ხელოვნურად შექმნან მოლოდინები - თენგიზ შარმანაშვილი

 საქართველოს პრეზიდენტს 24 საათის განმავლობაში შეუძლია, ნებისმიერი აქტის გამოცემა, რაც მის ექსკლუზიურ უფლებამოსილებას შეესაბამება, შეიძლება რაღაც ტექნიკური საკითხები იყო დასაზუსტებელი, რაღაც დოკუმენტაცია იყო დამატებით მოსაძიებელი, რაც მთავარია, შეწყალების აქტი გამოიცა, – ამის შესახებ საპარლამენტო უმრავლესობის წევრი თენგიზ შარმანაშვილმა განაცხადა.მისივე თქმით, ერთი კაცის გათავისუფლებაც ღირს, რომ ერთი საათით გვიან გამოსცე ასეთი აქტი.„შეიძლება, თუნდაც ერთი ადამიანის საკითხი იყო დასაზუსტებელი. ერთი კაცის გათავისუფლებაც ღირს, რომ ერთი საათით გვიან გამოსცე ასეთი აქტი. ვერ გეტყვით რასთან იყო ეს დაკავშირებული, მაგრამ, თუნდაც ერთი ან ორი კაცის დამატებითი ინფორმაციის მოძიება, რომ შეწყალებულთა სიაში მოხვედრილიყვნენ, ღირდა, რომ ერთი, ორი ან მეტი საათით გვიან გამოცემულიყო ეს აქტი. პრეზიდენტს უფლება აქვს, შეწყალების აქტის გამოცემამდე ვინმესთან კონსულტაცია არც კი გაიაროს. შეწყალების აქტები პერიოდულად გამოდის და არ არის დაკავშირებული მხოლოდ რელიგიურ დღესასწაულებთან. მომავალშიც იქნება ეს ჰუმანური აქტები, საქართველოს პრეზიდენტი ვინმეს თუ თვლის შესაწყალებლად, მომავალშიც არ იქნება გვიან ასეთი გამოცემა“, – განაცხადა თენგიზ შარმანაშვილმა.როგორც შარმანაშვილი აცხადებს, საპარლამენტო რესპუბლიკების პრეზიდენტები კონსტიტუციურად პოლიტიკისგან მოწყვეტილი არიან, როდესაც ასეთი ტიპის აქტებთან გვაქვს საქმე.„ნებისმიერ ჰუმანურ აქტში პოლიტიკური ანგაჟირების შეტანა ამ აქტს აფუჭებს და ცრუ მოლოდინებს წარმოშობს. გავყვეთ ჩვენს კონსტიტუციურ ჩანაწერს. კონსტიტუციამ გადაწყვიტა, რომ ეს უნდა იყოს ჰუმანიტარული, აპოლიტიკური აქტი, მხოლოდ პრეზიდენტის უფლებამოსილების სფერო და არა სხვა ვინმესი. ასეთ ვითარებაში უფრო მეტი ჰუმანიზმია, ვიდრე პოლიტიკური ანგაჟირების დროს. არავითარი მოლოდინები არ შექმნილა, უბრალოდ, უნდათ, ხელოვნურად შექმნან ასეთი მოლოდინები. ნებისმიერი სიტუაცია, რომელიც საქართველოში ტრიალებს, უნდათ, პოლიტიკური დაპირპირებებისა და ურთიერთბრალდებების სფეროში გადაიტანონ. ეს ძალიან ცუდია და ხელს უშლის შიდა სამოქალაქო ინტეგრაციას საქართველოში. ბოლო წლების განმავლობადი რა გვესმის? არ გცნობ, არ მინდა, პარლამენტში არ შემოვალ, შენ ვინ ხარ საერთოდ, არ გცნობ და როგორც გინდა, ისე მოიქეცი, არ მაინტერსებს. ამავე დროს, უნდათ, შექმნან მოლოდინი, რომ ადამიანი, რომელიც არაკანონიერად მიაჩნიათ, უნდა იქცეოდეს ისე, როგორც მათ სურთ. იმდენად აბსურდული სიტუაციაა, რომ ასე გაგრძელება წესით აღარ უნდა შეიძლებოდეს. ჩვენ უკვე მიგვაჩვიეს ამ აბსურდულობას და ამ დაპირისპირებების საკითხებს“, – განაცხადა თენგიზ შარმანაშვილმა.მისი თქმით, ყველამ კარგად დაინახა, რომ შიდა დაპირისპირება საქართველოდან არ იმართება.„მილიონები იხარჯება, რომ ერთმანეთს არ დაველაპარაკოთ. უზარმაზარი შეცდომები დააშვებინეს ოპოზიციას. 61 ოპოზიციონერი დღეს საქართველოს პარლამენტში არ ზის და ოპონირებას უმრავლესობას არ უწევს. ერთი შეხედვით, თითქოს ჩვენთვის, უმრავლესობისთვის კომფორტულია, მაგრამ საქართველოს მომავლისთვის კომფორტული და სწორი არ არის. აქ უნდა ყოფილო პოლიტიკური ჭიდილის ასპარეზი. ეს ყველაფერი ამის გამოძახილია და ყალბი მოლოდინების შექმნაც ამის ნაწილია – ყველაფერი, მათ შორის ჰუმანური აქტებიც კი, გამოყენებული უნდა იყოს ქვეყანაში დესტაბილიზაციისა და  დაპირისპირებისთვის. დაპატიმრებულებისთვის მიმართვა და პედალირება, რომ მშობლებს განწყობა შეუქმნან პოლიტიკური ყალბი ნარატივებისთვის, ძალიან ცუდია“, – აღნიშნა თენგიზ შარმანაშვილმა.საქართველოს პრეზიდენტმა, მიხეილ ყაველაშვილმა ნათლისღების დღესასწაულთან დაკავშირებით 159 მსჯავრდებული პირი შეიწყალა.

პოლიტიკა • 1768887469

საქართველოს პრეზიდენტი მიხეილ ყაველაშვილი სამძიმრის წერილს ავრცელებს

საქართველოს პრეზიდენტი მიხეილ ყაველაშვილი სამძიმრის წერილს აქვეყნებს:,,ღრმა მწუხარებას გამოვთქვამ ესპანეთში დატრიალებულ ტრაგედისთან დაკავშირებით, როდესაც სარკინიგზო შემთხვევას ადამიანთა სიცოცხლე ემსხვერპლა.ვუსამძიმრებ დაღუპულთა ოჯახებს და ესპანელ ხალხს ამ რთულ დროს თანადგომას ვუცხადებ",-წერს მიხეილ ყაველაშვილი.