„70-მდე ჭრილობა მიაყენეს და მიიმალნენ... დაჭრილი მოზარდი მეორე დღეს იპოვეს“ - როგორია პაციენტის ჯანმრთელობის მდგომარეობა

მოზარდი, რომელსაც 70-მდე ჭრილობა მიაყენეს, ამ დრომდე რჩება მარნეულის „ჯეო ჰოსპიტალსის“ მრავალპროფილურ სამედიცინო ცენტრში. ამის შესახებ „რადიო მარნეული“ წერს.

ექიმების ძალისხმევით, არასრულწლოვანი უკვე მოხსნილია აპარატიდან. მოზარდის ახლობლების თქმით, მიღებული უმძიმესი ჭრილობებიდან გამომდინარე, მისი ჯანმრთელობის მდგომარეობა კვლავ რჩება სტაბილურად მძიმე.

დაჭრის ფაქტი მარნეულის სოფელ ზემო ყულარში 10 ივლისს მოხდა, მოზარდი 11 ივლისს იპოვეს.

მომხდარ ფაქტზე შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს თანამშრომლებმა, ოპერატიული ღონისძიებებისა და საგამოძიებო მოქმედებების შედეგად, 2006 წელს დაბადებული ა.ა. არასრულწლოვანის მიმართ ჩადენილი განზრახ მკვლელობის მცდელობის ბრალდებით დააკავეს.

დანაშაული 20 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა, ურთიერთშელაპარაკების ნიადაგზე, ნაცნობს 2009 წელს დაბადებულ ნ.რ.-ს დანით სხეულის სხვადასხვა არეში მიაყენა ჭრილობები და შემთხვევის ადგილიდან მიიმალა. დაჭრილი ნ.რ. საავადმყოფოში მოათავსეს, სადაც ამ დრომდე შესაბამისი სამედიცინო დახმარება უტარდება.

დანაშაულის ჩადენის იარაღი - დანა ნივთმტკიცებადაა ამოღებული.

გამოძიება სისხლის სამართლის კოდექსის 19-109-ე მუხლის „ე“ ქვეპუნქტით მიმდინარეობს.