4 ოქტომბერს განვითარებული დანაშაულებრივი მოვლენების გამოძიების ფარგლებში 7 ოქტომბერს დაკავებულ 5 პირს პროკურატურა ბრალს დღეს წაუყენებს

 4 ოქტომბერს განვითარებული მოვლენების გამოძიების ფარგლებში 7 ოქტომბერს დაკავებულ 5 პირს პროკურატურა ბრალს დღეს წაუყენებს, რის შემდეგაც მათთვის აღმკვეთის ღონისძიების შეფარდებაზე სასამართლო იმსჯელებს.

გამოძიება სატრანსპორტო კომუნიკაციების ბლოკირების, მასობრივი არეულობის ორგანიზების, სხვისი საკუთრების დაზიანებისა და საქართველოს კონსტიტუციური წყობილების ძალადობრივი გზით შეცვლისკენ მოწოდების მუხლებით მიმდინარეობს. დაკავებულთა შორისაა ერთ-ერთი აქტივისტი ნანა სანდერი.

თბილისში 4 ოქტომბერს მიმდინარე აქციის ორგანიზატორებისა და მონაწილეების მიერ განხორციელებულ კანონსაწინააღმდეგო და ძალადობრივ ქმედებებთან დაკავშირებით, გამოძიება სისხლის სამართლის კოდექსის 317-ე, 187-ე, 222-ე და 225-ე მუხლებით დაიწყო, რაც პოლიციელზე თავდასხმას, საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას, ნივთის დაზიანებას ან განადგურებას, ჯგუფური ძალადობის ორგანიზებას, ხელმძღვანელობას ან მასში მონაწილეობას, ასევე, სტრატეგიული ან განსაკუთრებული მნიშვნელობის ობიექტის ხელში ჩაგდებას ან ბლოკირების მცდელობას გულისხმობს. შსს-ს ინფორმაციით, ამდროისთვის დაკავებულია 35 პირი.

შსს-მ 4 ოქტომბერს, თბილისში განვითარებულ დანაშაულებრივ მოვლენებთან დაკავშირებით 8 ოქტომბერს კიდევ 12 პირი დააკავა.

აღნიშნულ საქმეზე შსს-მ 5 ოქტომბრის ღამე პაატა ბურჭულაძე, მურთაზ ზოდელავა, ირაკლი ნადირაძე, პაატა მანჯგალაძე და ლაშა ბერიძე დააკავა.

შსს-ს მიერ 6 ოქტომბერს გამოქვეყნებული ინფორმაციის თანახმად, 4 ოქტომბერს თბილისში დანაშაულებრივ მოქმედებებთან დაკავშირებით გამოძიების ფარგლებში პირველ ეტაპზე 15 პირია იდენტიფიცირებული, სასამართლოს განჩინების საფუძველზე კი დაკავებულია 13 პირი.

7 ოქტომბერს ცნობილი გახდა, რომ შინაგან საქმეთა სამინისტრომ თბილისში განვითარებულ დანაშაულებრივ მოვლენებთან დაკავშირებით კიდევ 4 პირი დააკავა.

თბილისში 4 ოქტომბერს განვითარებულ მოვლენებთან დაკავშირებით შსს-მ ასევე კიდევ ერთი პირი - აქტივისტი ნანა სანდერი დააკავა.

სახელმწიფო უსაფრთხოების სამსახურმა 5 ოქტომბერს განაცხადა, რომ ოპერატიული ინფორმაციის საფუძველზე ჩატარებული საგამოძიებო მოქმედებების შედეგად აღმოჩენილია დიდი რაოდენობით ცეცხლსასროლი იარაღი, საბრძოლო მასალა და ასაფეთქებელი ნივთიერებები დეტონატორით.