თორნიკე ჭეიშვილი ხაზარაძე-ჯაფარიძეზე: დადასტურდა, რომ ქართული მხარე იყო აბსოლუტურად პირნათელი ანაკლიის პროექტთან მიმართებით - სამართალმა თავისი გზა იპოვა

საბოლოო ჯამში სამართალმა თავისი გზა იპოვა როგორც შიდა ეროვნულ დონეზე, ისე საერთაშორისო შესაბამის არბიტრაჟებში. დადასტურდა, რომ ქართული მხარე იყო აბსოლუტურად პირნათელი აღნიშნულ პროექტთან მიმართებით,- ასე ეხმიანება იურიდიულ საკითხთა საპარლამენტო კომიტეტის თავმჯდომარის პირველი მოადგილე, თორნიკე ჭეიშვილი ინფორმაციას, რომლის თანახმადაც ხაზარაძე/ჯაფარიძის პარტნიორმა აშშ-ში ანაკლიის პორტთან დაკავშირებით წაგებული არბიტრაჟის თანხა საქართველოს გადაუხადა.

ჭეიშვილი აღნიშნავს, ყველაფერი გაკეთდა იმისთვის, რომ ანაკლიის პროექტი წარმატებული ყოფილიყო.

„ამას ადასტურებს ისიც, რომ თუნდაც საქართველოს კონსტიტუციაში თავის დროზე შესაბამისი ნორმაც კი გაჩნდა, ერთგვარი დამატებითი გარანტი, რომ პროექტი წარმატებით განხორციელებულიყო. მიუხედავად ამისა, შესაბამისი პირების უნიათობით და მათი სხვადასხვა თაღლითური ზრახვების ფონზე ვხედავთ, რომ პროექტმა საბოლოო ჯამში დღის სინათლე ვერ იხილა, მაგრამ მიუხედავად ამისა, ისინი მაინც ამ თემის გამოყენებას ცდილობდნენ და უნდოდათ სოლიდური თანხა ჩაეგდოთ ხელში ქართველი ხალხისაგან“, - აღნიშნა თორნიკე ჭეიშვილმა.

ხაზარაძე/ჯაფარიძის პარტნიორმა აშშ-ში წაგებული არბიტრაჟის თანხა, 6,584,848 დოლარი საქართველოს გადაუხადა.